ބ.އަތޮޅު ތުޅާދޫ ފަޅުތެރޭ ފީނަނިކޮށް ޒުވާނެއްގެ ފަޔަށް ތޮޅިއެއްގެ ތުންގަނޑު ހެރިއްޖެއެވެ.
ވޮއިސްއަށް މައުލޫމާތު ހިއްސާކުރި އެރަށު މީހަކު ބުނީ، މިކަމެއް ހިނގާފައިވަނީ މީގެ ގަޑިއިރެއްހާ އިރު ކުރިން ކަމަށެވެ. ތޮޅީގެ ތުންގަނޑު ހެރުނީ ތުޅާދޫ ފަޅުތެރެއަށް މަސްހިފަންވެގެން ފީނަނިކޮށްކަމަށް އޭނާ ބުންޏެވެ.
ތޮޅީގެ ތުންގަނޑު ފަޔަށް ހެރުމާއެކު ޒުވާނާ ވަނީ ވަގުތުން ތުޅާދޫއަށް ގެނެސްފައެވެ. ތޮޅީގެ ތުންގަނޑު ހެރިފައިވަނީ ފަލަމަސްގަނޑަށާއި ކަކޫ ކައިރިއަށެވެ. މައުލޫމާތު ލިބޭ ގޮތުގައި އޭނާގެ ހާލު ރަނގަޅެވެ. ތޮޅި ހެރުމާއެކު އޭނާ އެންމެ ފުރަތަމަ ގެންދިޔައީ ތުލާދޫ ސިއްހީމަރުކަޒަށެވެ. ނަމަވެސް އެތަނުން އެކަމަށް ފަރުވާދެވެން ނެތުމުން ފަހުން ވަނީ އޭދަފުށީ ހޮސްޕިޓަލަށް ގެންގޮސްފައެވެ.
ފޮޓޯއިން ފެންނަ ގޮތުގައި އޭނާގެ ފައިގެ ދެ ތަނަކަށް ވަނީ ތޮޅީގެ ތުންގަނޑު ވަދެފައެވެ. އަދި ފަހުން ހެރުނުތަނަށް ވަނީ ތުންގަނޑު ބިނދިފައެވެ.
ރޭގަނޑު ފީނަން އުޅުމުގެ ތެރޭގައި މީހުންގެ ގަޔަށް ތޮޅީގެ ތުންގަނޑު ހެރުމުގެ ނުރައްކާތެރި ގިނަ ހާދިސާތަކެއް ރާއްޖޭގައި ހިނގާފައި އެބަހުއްޓެވެ.
މިފަދަ ބައެއް ހާދިސާތަކުގައި ބައެއް މީހުންގެ ފުރާނަގޮސް އަނެއްބައި މީހުން ނުކުޅެދޭ ހާލަތަށްވެސް ގޮސްފައި އެބަހުއްޓެވެ. އެގޮތުން 2018 ވަނަ އަހަރު ލަނޑާނަގަން މޫދަށް އެރިއުޅެނިކޮށް، ނ. މާޅަންދުއަށް ނިސްބަތްވާ ޒުވާނެއްގެ ކަރަށް ތޮޅިއެއްގެ ތުންގަނޑު ހެރުމުގެ ސަބަބުން ވަނީ ނިޔާވެފައެވެ.
Advertisement
This content is created and paid for by advertisers and does not involve Voice Journalists
