ނިމިދިޔަ ރަމަޟާންމަހު އަލް އަސްރު އާއި ދާރިސް ޓީވީ ގުޅިގެން ގެނެސްދިން ފެށުން ސީރީޒް ގައި ހިމެނޭ، ”އުދަރެސް“ މަދަހައިގެ އޮފިޝަލް ވީޑިއޯ ނެރެފި އެވެ. 

ފެށުން ސީރީޒް އަކީ ރަމަޟާން މަހަށް ޚާއްސަ ކޮށްގެން ދާރިސް ޓީވީން ގެނެސްދިން ޢިބުރަތުން ފުރިގެންވާ ސީރީޒްއެކެވެ. މި ސީރީޒްގެ މައި ރޯލުން ފެނިގެންދަނީ ދަހްލާން ރިޒާ އެވެ. 

ސީރީޒްގެ މައި ރޯލުން ފެނިގެންދާ ކެރެކްޓާ އޭނާގެ ޙަޔާތް ދީނީ ކަންކަމާއި ދުރުގައި، ޚާއްސަކޮށް ނަމާދާއި ދުރުގައި ހޭދަކުރަމުންދަނިކޮށް، ކަނޑުމަތީގައި ދިމާވާ ހާދިސާއަކާއި ގުޅިގެން އޭނާގެ ޙަޔާތަށް އަންނަ ބަދަލު އެ ސީރީޒްއިން ފެނިގެންދެއެވެ. 

ސީރީޒްއަށް ގިނަ ބައެއްގެ މަގުބޫލުކަން ލިބިގެންގޮސްފައިވާއިރު، އޭގެ އޮފިޝަލް މަދަހައަށްވެސް އަންނަނީ ބޮޑު ތަރުޙީބެއް ލިބެމުންނެވެ. 

މޫސާ ޝިފާޢު ކިޔައިދީފައިވާ މި މަދަހައިގެ ޅެން ހަދާފައި ވަނީ ޝެއިޚް އަބްދުالله އެވެ. އަދި އޯޑިއޯ ރިކޯޑިންގ މޫސާ ތައުފީޤު ހަދައިދީފައިވާއިރު، ވީޑިއޯ އަކީ އޯކޭޒް ގެ އުފެއްދުމެކެވެ. 

މުޅި މަދަހައިގެ މަންޒަރުތައް ގެނެސްދީފައިވާ ގޮތް ފުރިހަމަ އެވެ. ދެ މިނެޓްގެ މި މަދަހައިން ގާތްގަނޑަކަށް މުޅި ސީރީޒްގެ ކުރު ޚުލާސާއެއް ދައްކުވައިދެއެވެ.  އެގޮތުން، މަންމައާއި ބައްޕައަކު އެމީހުންގެ ދަރިފުޅަށް ނަމާދުގެ މުހިންމުކަން ކިޔައި ދެ އެވެ. ދެން ފެނިގެންދަނީ މާސިންގާ ކަނޑުމަތީ، ކަނދުފައްޗެއްގެ މަތީގައި، އެކަނިމާއެކަނި އިނދެ، އެ ދަރިފުޅު ނަމާދު ކުރަމުންދާ ތަނެވެ. 

އެފަހުން ކާނެ އެއްޗެއް ނެތި ބަނޑުހައިހޫނުކަންމަތީގައި، އެ ކަނޑުފަތީގެ މަތީގައި އޮއްވައި، ކަނޑު ފުޅަންގެއް އޭގެ މައްޗަށް ފުންމައިލުމުން، އެކަމުންދިޔައިރު، އޭނާގެ މަންމަ ކައްކާ މީރު ކާނާ މަތިން ހަނދާންވާނެ ދުވަހެއް އަންނާނޭކަން މަންމަ ބުނެދިން ދުވަސް ހަނދާނަށް އަންނަ މަންޒަރު ދައްކުވައިދެއެވެ. އަދި އެކަން ވެގެންދިޔައީ އޭނާއަށް ފުން އަސަރުތަކެއް ކުރުވި ކަމެއްކަން ދައްކުވައިދިން މަންޒަރުން ހާމަވެއެވެ. 

މަދަހައިގެ ވީޑިއޯގެ ފުރިހަމަ ކަމާއި އެއްވަރަށް ޝިފާއު އެ މަދަހަ ކިޔައިދިން އަސަރާއި، އެ މަދަހައިގެ ޅެންވެސް ފުރިހަމައެވެ. ދުނިޔެއާއި އުޚުރަވީ ޙަޔާތަށް އަލިއަޅުވާލައި ލިޔެފައިވާ ޢިބުރަތުން ފުރިގެންވާ އެ ޅެން، ޝިފާޢު ކިޔައިދީފައިވަނީ އަހާލަން ފަސޭހަ، އަސަރުގަދަ ރީތި ރާގަކަށެވެ. ހަމަ އެހެންމެ ދަހްލާންގެ އެކްޓިންގއަށްވެސް ތައުރީފް ހައްގެވެ. 

ޖުމްލަކޮށް މުޅި މަދަހައިންވެސް ފެނިގެންދަނީ ފުރިހަމަކަމެވެ.