ޣައްޒާ އަކީ މިހާރު "ގަތުލުގެ މައިދާނަކަށް" ވެފައިވާ ކަމަށް އދ ގެ ސެކްރެޓަރީ ޖެނެރަލް އަންޓޯނިއޯ ގުޓަރޭޒް ވިދާޅުވެއްޖެއެވެ. 

ހައްދުފަހަނައަޅާފައިވާ އިޒްރޭލުގެ ހަމަލާތައް ހުއްޓުމެއްނެތި ޣައްޒާއަށް ދެމުންދާއިރު، އިއްޔެ އެކަނިވެސް 26 ފަލަސްތީނުގެ ރައްޔިތުން ވަނީ ޝަހީދު ކޮށްލާފައެވެ. 

ނިއު ޔޯކްގައި ހުންނަ އދ.ގެ މައި މަރުކަޒުގައި ބޭއްވި ނޫސްވެރިންގެ ބައްދަލުވުމުގައި ގުޓަރޭޒް ވިދާޅުވީ، އެތަނެއްގެ އާންމުންނަށް ބޭނުންވާ ކާބޯތަކެއްޗާއި ބޭސްފަރުވާ ފޯރުކޮށްދިނުން އެތަނެއް ހިފައިގެން ތިބޭ ބައެއްގެ މައްޗަށް ލާޒިމް ވާ ކަމަށެވެ. އެހެން ނަމަވެސް އެއިން އެއްވެސް ކަމެއް ޣާއްޒާގައި ނުވާ ކަމަށާ، އިންސާނީ އެހީ އެއްވެސް ވަރަކަށް ޣައްޒާއަށް އެތެރެއެއް ނުވާ ކަމަށެވެ.

"ޣައްޒާއަށް އެހީގެ ކުޑަ މިންވަރެއް ވެސް އެތެރެ ނުކުރެވި މަހަށްވުރެ ގިނަ ދުވަސް ފާއިތުވެއްޖެ. ކާއެއްޗެއް ނެތް. ތެލެއް ނެތް. ބޭހެއް ވެސް ނެތް. ވިޔަފާރީގެ ސަޕްލައިއެއް ނެތް. އެހީ މެދުކެނޑި ހުރިހާ އެއްޗެއް ހުސްވެ މިހާރު ވަނީ އަނެއްކާ އެންމެ ނުރައްކާ ހާލަތު އާންމުވުމުގެ ބިރު ބޮޑުވެފައި،" ގުޓަރޭޒް ވިދާޅުވި އެވެ.

މީގެ އިތުރުން، އޭނާ ވަނީ ހުޅަނގު އައްސޭރީގައި ހިނގަމުންދާ ކަންކަމާމެދުވެސް ކަންބޮޑުވުން ފާޅުކުރައްވާފައެވެ.  

"މިއީ އިންސާނިއްޔަތުކަން ނެތިގެން ދިއުން ނިމުމަކަށް ގެންނަންވީ ވަގުތު. ރައްޔިތުން ހިމާޔަތްކުރުމުގެ ވަގުތު. ރަހީނުން ދޫކޮށްލުމުގެ ވަގުތު. ފުރާނަ ސަލާމަތްކުރުމުގެ އެހީ ފޯރުކޮށްދިނުމުގެ ވަގުތު. އަދި ހަނގުރާމަ ހުއްޓާލުމުގެ މުއާހަދާ އައުކުރުމުގެ ވަގުތު"ގުޓަރޭޒް ވިދާޅުވިއެވެ.

"އެހީތެރިކަން ހުއްޓިފައިވާ މި ވަގުތު، ބިރުވެރިކަމުގެ ދޮރުތައް އަލުން ހުޅުވިއްޖެ. ޣައްޒާއަކީ ޤަތުލުގެ މައިދާނެއް " އޭނާ އިތުރުކުރެއްވިއެވެ.

ޑޮކްޓަރސް ވިތައުޓް ބޯޑަރސް އިން ބުނެފައިވަނީ އިޒްރޭލުގެ ހަމަލާއެއް އެ ޖަމްޢިއްޔާގެ ކްލިނިކަކާ ކައިރިއަށް ވެސް އަމާޒުވި ކަމަށެވެ. މި ކްލިނިކް ހުރީ ރައްކާތެރި ސަރަޙައްދެއް ނުވަތަ ”ސޭފް ޒޯން“ ކަމަށް ކަނޑައަޅާފައިވާ ސަރަހައްދު ކަމަށްވާ އަލް-މަވާސީ ގައެވެ.

މީގެ އިތުރުންވެސް، އިޒްރޭލުގެ ބާރުތަކުން ޚާން ޔޫނިސްގައި ހުރި ހިލޭސާބަހަށް ކާންދޭ ބަދިގެއަކަށް ހަމަލާދީފައިވާ މަންޒަރު ފެންނަ ވީޑިއޯއެއް މިހާރު އަންނަނީ ދައުރުވަމުންނެވެ. 

ޣައްޒާގެ ސިއްޙީ ވުޒާރާއިން ބުނެފައިވާ ގޮތުގައި އިޒްރޭލުން ހިންގަމުންދާ ޤަތުލުޢާއްމުގައި މަދުވެގެން 50,810 ފަލަސްތީނުގެ ރައްޔިތުން ޝަހީދުވެފައިވާ ކަމަށް ކަށަވަރުވެފައިވެއެވެ. އަދި 115,688 މީހުން ޒަޚަމްވެފައިވެއެވެ. ސަރުކާރުގެ މީޑިއާ އޮފީހުން ޝަހީދުވި މީހުންގެ އަދަދު 61,700 އަށް އަޕްޑޭޓްކޮށްފައިވެއެވެ. މި އަދަދުގައި ހިމެނެނީ ވެއްޓިފައިވާ ޢިމާރާތްތަކުގެ ތެރޭގައި ގެއްލިފައިވާ މީހުންނެވެ.