މާލޭ އުތުރުފަރާތު ބޮޑުތަކުރުފާނުމަގު ސަރަހައްދު 4 ލޭނު ހިމަނައިގެން ޒަމާނީ ފެންވަރަށް ތަރައްޤީކުރަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ މިއަދު ހަވާލުކޮށްފިއެވެ.

ބޮޑުތަކުރުފާނުމަގުގެ އެމްޓީސީސީ ފެރީޓާމިނަލުން ފެށިގެން ލޯކަލް މާރުކޭޓާ ހަމަޔަށް މަގު ފުޅާކޮށް ތާރުއަޅައިގެން ޒަމާނީ ފެންވަރަށް  ތަރައްޤީކުރުމަށް ނިންމާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ، މިއަހަރުގެ ފެބުރުއަރީމަހުގެ 27 ވަނަ ދުވަހުގެ ރޭ ވިދާޅުވެފައެވެ. އެމަގު ތަރައްޤީ ކުރުމަށް ނިންމާފައިވަނީ ކޮޅަކަށް ދެ ލޭނު ހިމަނައިގެންނެވެ.

މިކަމުގެ އެއްބަސްވުމުގައި މިއަދު ސޮއިކޮށްފައިވާއިރު، މި  އެއްބަސްވުމުގައި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ ފަރާތުން ސޮއުކުރެއްވި، ވަޒީރު ޑރ. ޢަބްދުﷲ މުއްޠަލިބުއެވެ. އެމްޓީސީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޑީ.ސީ.ޕީ (ރިޓަޔަރޑް) އަހުމަދު ސައުދީއެވެ.

Advertisement

އުތުރުފަރާތު ބޮޑުތަކުރުފާނުމަގު ތަރައްޤީކުރުމުގެ މަސައްކަތް އެމްޓީސީސީއާ ހަވާލުކުރުމުގެ ތެރެއިން... ފޮޓޯ: އެމްޓީސީސީ

އެއްބަސްވުމުގައި ސޮއިކުރެއްވުމުގެ ރަސްމިއްޔާތުގައި ވާހަކަދައްކަވަމުން އިމާރާތް ކުރުމާބެހޭ ވުޒާރާގެ ވަޒީރު މުއްތަލިބް ވިދާޅުވީ، ބޮޑުތަކުރުފާނުމަގު ތަރައްޤީކުރުން ނޯތު ހާބަރާ ހަމަޔަށް ކުރިއަށްގެންދާނޭކަމަށެވެ. އެގޮތުން ފުރަތަމަ ފިޔަވަހީގެ މަސައްކަތް ކުރިއަށްދާނީ ލޯކަލް މާރުކެޓާ ހިސާބަށް ކަމަށާއި، މި މަސައްކަތް ކުރިއަށްގެންދަނީ ވަރަށް ރަނަގޅު ޕްލޭނެއްގެ ދަށުން ކަމަށެވެ. އެ ސަރަހައްދު ތަރައްޤީކުރާނީ ޓްރެފިކަށް ދަތި ނުވާނޭހެން ކަމަށްވެސް ވަޒީރު ވިދާޅުވިއެވެ.

އެމްޓީސީސީގެ މެނޭޖިންގ ޑިރެކްޓަރ ޑީ.ސީ.ޕީ (ރިޓަޔަރޑް) އަހުމަދު ސައުދީ ވިދާޅުވީ މި މަސައްކަތް ނިންމަން ކަނޑައެޅި ތާރީހަށްވުރެ ކުރިން މަސައްކަތް ނިންމާނޭ ކަމަށާއި ބާރުބޮޑު ސަރަހައްދެއްކަމުން، އެ މަސައްކަތް ކުރިއަށްދާއިރު ރައްޔިތުންގެ އެއްބާރުލުން ބޭނުންވާނޭކަމަށެވެ. 

އެއްބަސްަވުމުގެ ދަށުން ހުޅުމާލެ ފެރީ ޓަރމިނަލުން ފެށިގެން ލޯކަލް މާރުކޭޓް ސަރަހައްދާ ހަމަޔަށް އޮންނަ 800 މީޓަރުގެ ސަރަހައްދެއްގައި ތާރު އެޅުމަށް ހަމަޖެހިފައިވާކަމަށް އެމްޓީސީސީން ވަނީ ބުނެފައެވެ. މަގު ފުޅާ ކުރާއިރު ކީވޯލް ބޭރަށް ޖެއްސުމުގެ މަސައްކަތާއި، ފެން ހިންދާ ނިޒާމު ޤާއިމްކުރުމުގެ އިތުރުން ދުވާރުތައް ހެދުމާއި ރޯޑްމާކިން އަދި ސައިން ބޯޑުތައްވެސް ހަރުކުރެވިގެންދާނޭކަމަށް އެމްޓީސީސީން ބުނެއެވެ.

މި މަސައްކަތް އެމްޓީސީސީއާ ހަވާލުކުރީ 144.5 މިލިއަން ރުފިޔާގެ އަގަކަށެވެ. މަސައްކަތް ނިންމުމަށް ދީފައިވަނީ 455 ދުވަހެވެ.