އުރިދޫ މޯލްޑިވްސްއިން ކޮންމެ 20 ދުވަހަކުން، ކަސްޓަމަރަކަށް އުމްރާ ދަތުރެއް ދިނުމަށް ނިންމައިފިއެވެ.

އުރީދޫއިން މިގޮތަށް ނިންމާފައިވަނީ އެކުންފުންޏަށް 20 އަހަރު ފުރުމުގެ މުނާސަބާ ފާހަގަކުރުމާ ގުޅުވައިގެންނެވެ. އުރީދޫގެ އަހަރީ ދުވަހުގެ މުނާސަބަތުގައި މިއަދު އެކުންފުނިން ވަނީ "ލިވް އަންލިމިޓެޑް" ކެމްޕެއިން ލޯންޗުކޮށްފައެވެ. މިގޮތުން އެކުންފުނިން ވަނީ ކުރިއަށްމިއޮތް އަހަރު ހިންގާނޭ ހަރަކާތްތަކާއި ކަސްޓަމަރުންނަށް ހުރި އޮފާތައް ހާމަކޮށްފައެވެ.

މިގޮތުން އެންމެ ފާހަގަކޮށްލެވޭ އެއް ކަމަކީ އުރީދޫގެ ކަސްޓަމަރުންނަށް އުމްރާ އަދި ހައްޖު ދަތުރު ލިބޭ އޮފާއެވެ. އުރީދޫއިން ވަނީ އެކުންފުންޏަށް 20 އަހަރު ފުރުމުގެ މުނާސަބަތުގައި ކޮންމެ 20 ދުވަހަކުން 1 ކަސްޓަމަރަކަށް އުމްރާ ދަތުރެއް ލިބޭގޮތަށް ލަކީ ޑްރޯއެއް ކުރިއަށްގެންދިއުމަށް ނިންމާފައެވެ.

މިގޮތުން ކަނޑައެޅިފައިވާ މުއްދަތުގައި ޖުމްލަ 19 އުމްރާ ދަތުރު އަޅުގަނޑުމެން ދޭއިރު، ލަކީޑްރޯއެއް މެދުވެރިކޮށް 2 މީހަކަށް ޙައްޖު ދަތުރެއް ބޮޑު އިނާމުގެ ގޮތުގައި ދެވޭނޭކަމަށް އުރީދޫއިން ބުންޏެވެ. 

މީގެ އިތުރުން އުރީދޫން އިން ވަނީ، މިއަދުން ފެށިގެން އެޕަލް ވޮޗް ސީރީޒް 10 އަދި އެޕަލް ވޮޗް އަލްޓްރާއަށް އުރީދޫ އީސިމްގެ ހިދުމަތް ދޭން ފަށާފައެވެ.  މިއީ ރާއްޖޭގައި މިފަދަ ހިދުމަތެއް ދެވޭ ފުރަތަމަ ފަހަރެވެ. އަދި އުރީދޫ ގުރޫޕުގެ  ފަރާތުން މި ސާވިސް ފޯރުކޮށްދެވޭ 3 ވަނަ ގައުމެވެ.

އުރީދޫއިން ބުނީ، މި ހިދުމަތް ހުރިހާ މޮބައިލް ކަސްޓަމަރުންނަށް ހަ މަސް ދުވަހަށް ހިލޭ ލިބޭނެ ކަމަށާއި އެއަށް ފަހު މަހަކު 199 ރުފިޔާއަށް ހިދުމަތް ލިބޭނެ ކަމަށެވެ. މި ހިދުމަތުގެ ސަބަބުން ފޯނު ބޭނުން ނުކޮށް ސީދާ އެޕަލް ވޮޗުން ގުޅާލެވޭނެއެވެ. މި ހިދުމަތާ ބެހޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، އުރީދޫގެ ސީއީއޯ ހާލިދު އަލް ހަމާދީ ވިދާޅުވީ، މިހިދުމަތާއެކު އެކުންފުނީގެ ކަސްޓަމަރުންނަށް ޑިޖިޓަލް ހިދުމަތްތައް އެންމެ ފުރިހަމއަށް ތަޖުރިބާކޮށްލުމުގެ ފުރުސަތު ލިބިގެންދާނޭކަމަށެވެ. 

ނޫސްވެރިންގެ މި ބައްދަލުވުމުގައި އުރީދޫގެ ޗީފް ކޮމާޝަލް އޮފިސަރު ހުސެއިން ނިޔާޒް ވަނީ މިފަހަރުވެސް މަސް ރޭހާއި، ކަލަރ ރަން ފަދަ އާއްމުންގެ އެންމ2ެ ބޮޑު ޝައުގުވެރިކަން ލިބިގެންދާ ހަރަކާތްތައް ކުރިއަށްގެންދާނޭ ކަމަށެވެ. 

އުރީދޫގެ ފަން ރަން 2 ރަށެއްގައި ބޭއްވުމަށް ވަނީ ހަމަޖެހިފައެވެ. އެގޮތުން ޑިސެމްބަރު މަހު ހުޅުމާލޭގައި ފަން ރަން ބާއްވާއިރު، މިއަހަރުގެ އަތޮޅު އެޑިޝަން ބޭއްވުމަށް ހަމަޖެހިފައިވަނީ ޖޫންމަހުގެ 27 ވަނަ ދުވަހު އައްޑޫ ސިޓީގައެވެ.

މަސް ރޭސް 3 ސަރަހައްދެއްގައި ބޭއްވުމަށް ހަމަޖެހިފައިވާއިރު، މާލެ އަތޮޅާއި ރާއްޖޭގެ ދެކުނު އަދި އުތުރުގެ ރަށެއްގައި އޮގަސްޓު މަހު މަސްރޭސް ބޭއްވިގެންދާނޭކަމަށް އުރީދުއިން ބުނެއެވެ. މީގެ އިތުރުން ވަރަށް ގިނަ ރަށްރަށުން މަސްރޭސް ބޭއްވުމުގެ ރިކުއެސްޓްތައް ލިބެމުންދާތީ، އުތުރާއި ދެކުނުގެ ރަށު ކައުންސިލްތަކަށް މަސްރޭސް ބޭއްވުމަށް ޕްރޮޕޯސަލް ހުށަހެޅުމަށް ފުރުސަތު ހުޅުވާލާނޭކަމަށްވެސް އުރީދޫއިން ބުނެއެވެ.