މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ނާއިބު ރައީސަކަށް ޝިފްލާ އިބްރާހިމް އިންތިހާބު ކޮށްފި އެވެ.
ޝިފްލާ އެ މަގާމަށް އިންތިހާބު ކުރީ ކުރީން އެ މަގާމުގައި ހުންނެވި މުހައްމަދު ފަޒީން މެންބަރު ކަމުން އިސްތިއުފާ ދެއްވުމާއި ގުޅިގެންނެވެ. ފަޒީން އިސްތިއުފާ ދެއްވީ ބްރޯޑްކޮމްގެ އަންހެން މުވައްޒަފަކަށް ޖިންސީ ފުރައްސާރަ ކުރި ކަމުގެ ތުހުމަތުގައި، އާނާ މަގާމުން ވަކިކުރުމުގެ މަރުހަލާ މަޖިލީހުން ފަށާފައިވަނިކޮށެވެ.
ބްރޯޑްކޮމް އިން މިއަދު ބުނީ އެ ކޮމިޝަންގެ ނާއިބު ރައީސްގެ މަގާމަށް ޝިފްލާ އިންތިހާބު ކޮށްފައިވާ ކަމަށެވެ. ޝިފްލާއަށް އެ ކޮމިޝަނުން ވަނީ މަރުހަބާ ކިޔާފަ އެވެ.
ޝިފްލާ އަކީ މީޑިއާ އަދި ޖާނަލިޒަމް ކިޔަވައިގެން ހުންނެވި މި ދާއިރާގެ ވަރަށް ބޮޑު ތަޖުރިބާކާރެކެވެ. ޓީވީ ޕްރަގްރާމްތައް ހޯސްޓް ކުރުމާއި ހަބަރު ކިޔުމުގައި ވަރަށް ބޮޑު މަޝްހޫރު ކަމަކާއި މަގުބޫލު ކަމެއް ވަނީ ހޯދާފަ އެވެ. ޓީވީ މޯލްޑިވްސްގެ އެންމެ ފާހަގަކޮށްލެވޭ ޕްރަގްރާމްތައް އޭނާ ހުށައެޅި އެވެ. އަދި ވަރަށް ދިގު މުއްދަތަކަށް ޓީވީ އެމްގެ ހަބަރު ކިޔެ އެވެ. ފަހުން ސަންގު ޓީވީ ގައި ވެސް ހަބަރު ކިޔާފައިވެ އެވެ.
Advertisement
This content is created and paid for by advertisers and does not involve Voice Journalists
