ރާއްޖޭގެ އިގްތިސާދު ސިންދަފާތުކުރުމުގެ ގޮތުން ސަރުކާރުން ހިންގުމަށް ނިންމާފައިވާ މުހިންމު ޕްރޮގްރާމެއް ކަމަށްވާ "ޕާލް ރެސިޑެންސް" އާ ގުޅިގެން ކަންބޮޑުވުންތަކެއް ހުރިކަމަށް ބުނެ އިލްމުވެރިންގެ ގުޅުމުން މަޝްވަރާ ބައްދަލުވުންތަކެއް ބޭއްވުމަށް ނިންމައިފިއެވެ.

މިކަން ހާމަކޮށްފައިވަނީ އިލްމުވެރިންގެ ގުޅުމުގެ ފަރާތުން ސޯޝަލް މީޑިއާގައި އެ ޖަމާއަތުން ކުރި ޕޯސްޓެއްގައެވެ. އިލްމްވެރިންގެ ގުޅުމުގެ ފަރާތުން ކުރި އެ ޕޯސްޓްގައި ވަނީ، ދިވެހިރާއްޖޭގެ އިޤްތިޞާދު ވަރުގަދަކުރުމުގެ މަޤްޞަދު 'ޕާލް ރެސިޑެންސް' ގެ ނަމުގައި އިކޮނޮމިކް މިނިސްޓްރީން ކުރިއަށްގެންދާ ރެސިޑެންސީ ޕްރޮގްރާމުގެ ސަބަބުން، ދިވެހިރާއްޖޭގެ އިސްލާމީ ވަޙްދަތަށާއި ސިޔާދަތަށް އެކަމުގެ ނުރައްކާ އެބައޮތް ކަމަށެވެ.

އެގޮތުން މަޝްވަރާ ބައްދަލުވުން ކުރިއަށް ގެންދިއުމަށް ނިންމީ އިޖުތިމާޢީ ގޮތުންނާއި ދިވެހީންގެ ޘަޤާފަތާއި އިޤްތިޞާދީ މިނިވަންކަމަށް ޢިޔާދަ ނުކުރެވޭ ފަދަ ބޮޑެތި ގެއްލުންތަކެއް ލިބި، އިންތިހާއަށް ނުރައްކާ ކުރިމަތިވެދާނެ ކަމުގެ ކަންބޮޑުވުން ދީނީ ޢިލްމުވެރިންގެ މެދުގައި އުފެދިފައިވާތީ ކަމަށް އިލްމުވެރިންގެ ގުޅުމުން ބުންޏެވެ.

ޕާލް ރެސިޑެންސް ޕްރޮގްރާމާ ގުޅިގެން އިލްމުވެރިންގެ ގުޅުމުން ކަންބޮޑުވުން ފާޅުކުރިއިރު އިދިކޮޅު އެމްޑީޕީންވެސް ވަނީ އެކަމުގެ ކަންބޮޑުވުން ފާޅުކޮށްފައެވެ. ނަމަވެސް ޕާލް ރެސިޑެންސް ޕްރޮގްރާމާ ގުޅޭގޮތުން ސަރުކާރުން ބުނެފައިވަނީ، މިއީ ރާއްޖެއަށް ގެއްލުންވާ ބީދައިން ކުރިއަށްގެންދާ ޕްރޮގްރާމެއް ނޫންކަމަށެވެ. ރައްޔިތުންގެ މަޖިލީހުގައި ވާހަކަދައްކަވަމުން މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް) ވިދާޅުވެފައިވަނީ މިހާރުވެސް ރާއްޖޭގައި އިންވެސްޓްކުރާ ފަރާތްތަކަށް އެ އޮންނަ އުސޫލުގެ މަތިން ރެސިޑެންސް ވިސާ ދެމުން އަންނަ ކަމަށާއި މިއީ އަލަށް ކުރާ ކަމެއް ނޫންކަމަށެވެ. 

މިދިޔަ އަހަރުގެ ޖުލައިމަހު ސިންގަޕޫރުގައި ބޭއްވި އިންވެސްޓްމެންޓް ފޯރަމްގައި ވަނީ ރައްޖޭގައި އިންވެސްޓްކުރުމުން ރާއްޖޭގައި ވަޒަންވެރިވެގެން އުޅުމުގެ ފުރުސަތު ލިބޭ ޕްރޮގްރާމެއް އިފްތިތާހްކޮށްފައެވެ. އެގޮތުން ދިވެހި ސަރުކާރާއި ހެންލީ އެންޑް ޕާޓްނާސް އާއި ދެމެދު ރެޒިޑެންސީ ބައި އިންވެސްޓްމަންޓް އެއްބަސްވުމެއްގައި ވަނީ ސޮއިކޮށްފައެވެ.