އިސްރާއީލްގެ ހައްދުފަހަނަ އަޅާފައިވާ ސިފައިން ޢައްޒާގައި ހިންގަމުންދާ ހަނގުރާމައިގެ ޖަރީމާތައް ހައްދުފަހަނަ އަޅައިގެން ގޮސްފައިވަނިކޮށް، ޢައްޒާގައި ދެން އިތުރަށް ކެތްކުރެވެން ނެތްކަމަށް ބުނެ އެޤައުމުގެ ޑޮކްޓަރުން ޝަކުވާކުރަން ފަށައިފިއެވެ.

އިސްރާއީލްގެ ޗެނަލް 13 އިން ގެނެސްދިން ރިޕޯޓެއްގައި ބުނެފައިވަނީ، އިސްރާއީލްގެ މިލިޓަރީ ޑޮކްޓަރުން ޢައްޒާއިން ފޭބުމަށްއެދި 200 އަށްވުރެ ގިނަ ޑޮކްޓަރުންގެ ޕެޓިޝަނެއް ތައްޔާރުކޮށްފައިވާކަމަށެވެ. ޕެޓިޝަނުގައި ޑޮކްޓަރުން ބުނީ، ޢައްޒާގައި ދެން އެމީހުންނަށް އިތުރަށް ކެތްކުރެވެން ނެތްކަމަށާއި ހުރިހާ ޑޮކްޓަރުންވެސް މިހާރުތިބީ ވަރުބަލިވެފައިކަމަށެވެ.

"ޢައްޒާގައި ތިބޭވަރަށްވުރެ އަހަރެމެންގެ ލޮޑުވެއްޖެ. ސިފައިންގެ އެކި ޔުނިޓްތަކުގައި ބަންދުވެފައިތިބި ޑޮކްޓަރުން ދޫކޮށްލައި، އެންމެން ބޭނުންވަނީ ދެން މިތަނުން ނިކުންނަށް" ޕެޓިޝަނުގައި ލިޔެފައިވެއެވެ.

ޖެނިންގައި ހަރަކާތްތެރިޔާ ޔަހޫދީ ސިފައިންގެ ބަޔަކު... ފޮޓޯ: ރޮއިޓާސް

ޔަހޫދީ މިލިޓަރީ ޑޮކްޓަރުން ޕެޓިޝަނުގައި އިތުރަށް ބުނެފައިވަނީ، އިސްރާއީލް ސިފައިން ޢައްޒާގައި ފެށި ހަނގުރާމައިގެ މަޤްސަދު އޮޅުވާލައި މުޅިން އެހެންކަމަކަށްގޮސް ގެއްލިއްޖެކަމަށެވެ. އަދި މިއީ ވަކިބަޔަކު ސިޔާސީގޮތުން ވަކި މަޤްސަދުތަކެއް ހާސިލްކުރުމަށް ގެންދާ ހަނގުރާމައެއްކަމަށްވެސް ޔަހޫދީ ޑޮކްޓަރުންގެ ޓީމުން ތައްޔާރުކުރި ޕެޓިޝަނާ ގުޅޭގޮތުން ލިޔެފައިވެއެވެ.

އިސްރާއީލްގެ ބައެއް މީޑިއާތަކުންވެސް ވަނީ ޢައްޒާގައި ކުރަމުންގެންދާ ހަނގުރާމައިގައި މިހާރު އިސްރާއީލް ސިފައިންގެ ސަފުތައް ވަރަށްބޮޑަށް ބައިބައިވެއްޖެކަމަށް ރިޕޯޓްކޮށްފައެވެ. އެގޮތުން މިހާރު އިސްރާއީލްގެ ސިފައިންގެ ބައެއް ހަމަލާތައް ދެނީ އެއްވެސް ގޮތެއްފޮތެއް ނެތި ކޮމާންޑުން ބޭރުންކަމަށް އިސްރާއީލްގެ ބައެއް މީޑިއާތަކުން ވަނީ ރިޕޯޓްކޮށްފައެވެ.

އަލްޖަޒީރާއިން ބުނާގޮތުގައި އިސްރާއީލް ސިފައިންގެ ސަފްތައް މިހާރުވަނީ ވަރަށްބޮޑަށް ބައިބައިވެފައެވެ. އެގޮތުން 1،600 ސިފައިންނާއި އަަލަށް ހަނގުރާމައިގެ މައިދާނާ ގުޅުނު ސިފައިން ވަނީ ޢައްޒާ ހަނގުރާމަ އިތުރަށް ކުރިއަށްގެންދިއުމަށް ބޭނުން ނުވާކަމަށް ބުނެ ރަސްމީކޮށް އެކަން އެމީހުންގެ ކޮމާންޑަރުންނަށް ހުށަަހަޅާފައެވެ. 

އިސްރާއީލް ސިފައިން ޢައްޒާގައި ހިންގަމުންގެންދާ ޖަރީމާތަކުގައި މިހާރު އެންމެބޮޑު އިސްކަމެއްދީގެން ހަމަލާތައް ދެނީ ހޮސްޕިޓަލްތަކަށާއި ސްކޫލްތަކަށެވެ. އިސްރާއީލުން މިފަހުންފެށި ޢައްޒާ ގަތުލު އާއްމުތަކުގައި މިހާތަނަށް 60،000 ހާހަށްވުރެ ގިނަ ފަލަސްތީނުގެ ރައްޔިތުން ވަނީ ޝަހީދުކޮށްލާފައެވެ. މީގެތެރޭގައި ގިނައީ ކުޑަކުދިންނާއި، އަންހެނުންނާއި ޒުވާން ފުރައިގެ ކުދިންނެވެ. އިސްރާއީލްގެ އަމަލުތައް މިގޮތަށް ހުރުމުން ޢައްޒާގައި އިސްރާއީލް ސިފައިން ހިންގަމުން އަންނަ ޖަރީމާތައް ބައިނަލްއަޤްވާމީ ގިނަ ފަރާތްތަކަކުން ސިފަކުރަނީ ނަސްލު ނައްތާލުމަށް ރޭވިގެން ހިންގާ ޖަރީމާއެއްގެ ގޮތުގައެވެ.