ހއ.ކެލާގައި ތަރައްޤީކުރުމަށް ނިންމާފައިވާ ރަށްވެހި އާސާރުގެ ތަރައްޤީކުރުމުގެ އަމަލީ މަސައްކަތް ފެށުމަށް ތައްޔާރުވެއްޖެއެވެ.

ކެލާ ރަށްވެހި އާސާރުގެ ތަރައްޤީކުރުމުގެ މަސައްކަތް ހަވާލުކޮށްފައިވަނީ، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާ އެވެ. އެކުންފުނިން މިއަދު އެކްސްގައި ކުރި ޕޯސްޓެއްގައި ވަނީ ރަށްވެހި އާސާރުގެ ތަރައްޤީކުރުމުގެ މަސައްކަތް ކުރިއަށްގޮސްފައިވާ ހިސާބު ހާމަކޮށްފައެވެ.

އާރުޑިސީން ބުނީ، ކެލާގެ ރަށްވެހި އާސާރު ތަރައްޤީކުރުމުގެ މަސައްކަތް ފެށުމަށް ޓަކައި، މަސައްކަތް ފެށުމަށް ހަމަޖެހިފައިވާ ސައިޓް އިންްސްޕެކްޓް ކުރުމުގެ މަސައްކަތް މިހާރު ކުރިއަށްދާކަމަށެވެ. މި މަސައްކަތް ކުރިއަށްގެންދަނީ،  ދިވެހިބަހާއި ސަގާފަތާއި ތަރިކައާ ބެހޭ ވުޒާރާ އާއި އާރުޑީސީއާ ގުޅިގެންނެވެ.

ހއ. ކެލާގައި ރަށްވެހި އާސާރު ތަރައްގީ ކުރުމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާ ހަވާލުކޮށްފައިވަނީ، މިއަހަރުގެ މާޗްމަހުގެ ތެރޭގައެވެ. މި މަޝްރޫޢު 45 ދުވަހުގެ ތެރޭގައި ނިންމަން ޖެހޭއިރު، މަސައްކަތުގެ އަގަކީ، 453،400 ރުފިޔާއެވެ.

ކެލާއަކީ ތާރީހީގޮތުން ވަރަށްގިނަ ކަންކަން ހިމެނޭ ރަށެކެވެ. މީގެ ތެރޭގައި 17 ވަނަ ޤަރުނުގައި ބިނާކޮށްފައިވާ މިސްކިތް ފާހަގަކޮށްލެވެއެވެ.