މި އަހަރުގެ މާޗު މަހުގެ ނިޔަލަށް އެންސްޕާ މެދުވެރިކޮށް، ނުކުޅެދުންތެރިކަން ހުންނަ ފަރާތްތަކަށް 25 މިލިއަން ރުފިޔާ ޚަރަދުކޮށްފައިވާ ކަމަށް އެ އެޖެންސީގެ ތަފާސް ހިސާބުތަކުން ހާމަވެއްޖެއެވެ.

ނުކުޅެދުންތެރިކަން ހުންނަ ކުދިންގެ ތެރަޕީ ހިދުމަތް ބޭނުންވާ ކުދިންގެ ތެރެއިން އެންސްޕާގައި ރެޖިސްޓްރީވެފައިވާ ކުދިންގެ އަދަދާއި އޭގެ ތެރެއިން ރާއްޖޭން ބޭރުގައި ދިރިއުޅޭ ކުދިންގެ އަދަދުގެ މައުލޫމާތު ހޯދުމަށް އެންސްޕާގައި އެދިލެއްވީ ގަލޮޅު އުތުރު ދާއިރާގެ މަޖިލިސް މެންބަރު މުހައްމަދު އިބްރާހިމް އެވެ.

މި މަހުގެ 1 ވަނަ ދުވަހު މެންބަރު މުހައްމަދު އިބްރާހިމް އެންސްޕާގެ ސީއީއޯ ހީނާ ވަލީދަށް ފޮނުއްވި ސިޓީގެ ޖަވާބުގައި އެ އިދާރާ އިން ވަނީ އެ ތަފާސް ހިސާބުތައް ހިއްސާކޮށްފައެވެ. މެމްބަރު މުހައްމަދު އިބްރާހިމް ވަނީ އެންސްޕާއިން ފޮނުވި މައުލޫމާތު ހިއްސާކުރައްވާފައެވެ.

އެގޮތުން މި އަހަރުގެ މާޗު މަހުގެ ނިޔަލަށް ނުކުޅެދުންތެރިކަން ހުންނަ މީހުންގެ ދަފްތަރުގައި ރަޖިސްޓްރީވެފައިވާ ފަރާތްތަކުގެ ތެރެއިން ތެރަޕިއުޓިކް ފަރުވާއަށް ޚަރަދު ހަމަޖައްސައިދިނުމުގެ ޕްރޮގްރާމް މެދުވެރިކޮށް 675 ފަރާތަކަށް އެހީ ހަމަޖައްސާދީފައިވާ ކަމަށް އެ އިދާރާގެ ތަފާސް ހިސާބުތަކުން ދައްކައެވެ.

މި އަހަރުގެ މާޗު މަހުގެ ނިޔަލަށް އެ ފަރާތްތަކަށް ޖުމްލަ 25.4 މިލިއަން ރުފިޔާ ހޭދަކޮށްފައިވެއެވެ. މި ޕްރޮގްރާމު މެދުވެރިކޮށް އެހީ ހަމަޖައްސައިދިން 18 އަހަރުން ދަށުގެ ކުދިންގެ އަދަދަކީ 652 އެވެ. އެއީ ޖުމްލަ 24.8 މިލިއަން ރުފިޔާ އެވެ. މީގެ ތެރޭގައި ރާއްޖެއިން ބޭރުގައި ހިމެނޭ 30 ކުދިން ހިމެނޭ އެވެ. އެކުދިންނަށް ވަނީ 1.2 މިލިއަން ރުފިޔާ ހޭދަކޮށްފައެވެ.

އެންސްޕާ އިން ހިއްސާކޮށްފައިވާ މައުލޫމާތަށް ބަލާއިރު ނުކުޅެދުންތެރިކަން ހުންނަ މީހުންގެ ދަފްތަރުގައި ރަޖިސްޓްރީވެފައިވާ ފަރާތްތަކުގެ ތެރެއިން ތެރަޕިއުޓިކް ފަރުވާއަށް ހަރަދު ހަމަޖައްސައިދިނުމުގެ ޕްރޮގްރާމް މެދުވެރިކޮށް މިދިޔަ އަހަރު 1،087 މީހަކަށް ޖުމްލަ 96.7 މިލިއަން ރުފިޔާ ހޭދަކޮށްފައިވެއެވެ.

މީގެ ތެރޭގައި:

* 18 އަހަރުން ދަށުގެ 1،031 ކުދިން ހިމެނޭއިރު އެ ކުދިންނަށް 94 މިލިއަން ރުފިޔާ

* ރާއްޖެއިން ބޭރުގައި އުޅޭ 54 ކުއްޖަކަށް4.2 މިލިއަން ރުފިޔާ

ނުކުޅެދުންތެރިކަން ހުންނަ ފަރާތްތަކަށް ތެރަޕީ ނުލިބުމާއި އެފަދަ ކުދިންނަށް މާލީ، ޖިސްމާނީ އަދި ނަފްސާނީ އެހީތެރިކަން ފޯރުކޮށްދިނުމަށް ނެޝަނަލް ސޯޝަލް ޕޮޓެކްޝަން އެޖެންސީ (އެންސްޕާ) ނުކުޅެދިފައިވާ ކަމަށް ބުނެ، އެކަމުގެ ތަހުގީގެއް ހިންގައިދިނުމަށް އެދި ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންގެ ފަރާތުން ރައްޔިތުންގެ މަޖިލީހަށް ވަނީ ޕެޓިޝަނެއް ހުށަހަޅައިފަ އެވެ.