ޕެންޝަނާ ގުޅިގެން ހުރި މައްސަލަތައް ހައްލުކުރަންވާނީ މިހާރު ލިބޭވަރު މަދުނުވާ ގޮތަށް ކަމަށް ޕެންޝަން އޮފީހުގެ ސީއީއޯ ސުޖާތާ ހަލީމް ވިދާޅުވެއްޖެއެވެ.

މަޖިލީހުގެ މިއަދުގެ މާލިއްޔަތު ކޮމިޓީގެ ބައްދަލުވުމުގައި ޕެންޝަން އޮފީހާއި ސިވިލް ސަރވިސް ކޮމިޝަންގެ މެންބަރުންނާ ބައްދަލުކޮށްފައިވާއިރު، އެ ބައްދަލުވުމުގައި، ރާއްޖޭގައި ޕެންޝަން ދިނުމުގައި ހުރި މައްސަލަތައް ހައްލު ކުރުމާ ގުޅޭ މަޝްވަރާތައް ވަނީ ކުރިއަށް ގެންގޮސްފައެވެ. 

ކޮމިޓީ ބައްދަލުވުމުގައި ވާހަކަ ދައްކަވަމުން ދިއްގަރު ދާއިރާގެ މެންބަރު އަހުމަދު ނާޒިމް ވަނީ މިހާރު ޢަމަލުކުރަމުންދާ ޕެންޝަނާއި ބެހޭ އުސޫލު ދޫކޮށްލައި، ސިވިލް ސާވިސްގެ މުވައްޒަފުންވެސް ޕެންޝަނާ ބެހޭ ޤާނޫނުގެ ދަށަށް ގެންނަން ބޭނުންވާކަން ހާމަކުރައްވާފައެވެ. އެކަމަށްޓަކައި ޕެންޝަނާބެހޭ ގާނޫނަށް ގެންނަން ޖެހޭ އިސްލާހްތަކާއި ސިވިލް ސާވިސްގެ ގާނޫނަށް ގެންނަން ޖެހޭ އިސްލާޙްތަކާ ގުޅޭ ގޮތުން އެ ދެމުވައްސަސާގެ ޚިޔާލު ހުރިގޮތް ހިއްސާކުރެއްވުމަށް ވަނީ އެދިލައްވާފައެވެ. 

ނާޒިމްގެ ވާހަކަފުޅާއި ގުޅިގެން، ވާހަކަ ދައްކަވަމުން ސުޖާތާ ވިދާޅުވީ ޕެންޝަން ގާނޫނު ވުޖޫދަށް އައިތާ މިހާރު 15 އަހަރުވެފައިވާ ކަމަށެވެ.

ސުޖާތާ ވިދާޅުވީ، ޕެންޝަނުގެ ކަންކަން އެންމެ އެދެވޭ ގޮތެއްގައި ކުރިއަށް ގެންދެވޭނީ އެކަންކަމަށް ބަލައިގެން ކުރިއަށް ދިޔުމުން ކަމަށެވެ. 

ޝުޖާތާ އިތުރަށް ވިދާޅުވީ، މިހާރު އޮތް ޕެންޝަން ގާނޫނުގެ ދަށުން ހުރިހާ ކަމެއްވެސް ކުރިއަށްދަނީ، ޑިފައިންޑް ކޮންޓްރިބިޔުޓަރީ ސިސްޓަމަކަށް ކަމަށާ، އެހެންކަމުން، އެ ޕެންޝަނަށް ކޮންމެ އަހަރެއްގެ ދައުލަތުގެ ބަޖެޓުން އިތުރަށް ދައްކަންޖެހޭ ފައިސާއެއް ނުހުންނާނެ ކަމަށެވެ. އެހެނީ، މުވައްޒަފު ރިޓަޔަރ ވެގެންދާއިރު އެ ފައިސާ ރައްކާ ކުރެވިފައި ހުންނާނެ ކަމަށް އޭނާ ވިދާޅުވިއެވެ. 

މިއާއެކު ސުޖާތާ ވަނީ ޕެންޝަން ގާނޫނުގެ ބޭރުން ހިންގާ ސްކީމުތަކުގެ ސަބަބުން ޚަރަދުތައް ބޮޑުވެ، ތަފާތުކުރުން ބޮޑުވެފައިވާ ނިޒާމެއް އުފެދިފައިވާކަން ފާހަގަކުރައްވައި އެކަމާ ކަންބޮޑުވުން ފާޅުކުރައްވާފައެވެ. ކޮންޓްރިބިއުޓް ކުރެވޭ ނިޒާމެއް ޕެންޝަން ޤާނޫނުގެ ދަށުން އުފައްދާފައިވާއިރު އޭގެ ބޭރުން ކޮންޓްރިބިއުޝަނަކާ ނުލައި ދޭ ޑިފައިންޑް ބެނިފިޓްގެ ސަބަބުން، އެ ޤާނޫނުގެ ތެރެއިން ހިންގާ ސްކީމުގައި ބައިވެރިވާން ބޭނުންވާ މީހުން މަދުވާނެ ކަމަށް ވިދާޅުވިއެވެ.

މީގެ އިތުރުން، މިހާރު 65 އަހަރުން މަތީގެ އާބާދީ %4 ހުރިއިރު ބޭސިކް ޕެންޝަނަށް މަހަކު 100 މިލިޔަން ރުފިޔާ ޚަރަދުވާ ކަމަށާ، 2030އާ ހަމައަށްދާއިރު 65 އަހަރުން މަތީ މީހުންގެ އިންސައްތަ %7 އަށް އަރާނެ ކަމަށް ލަފާ ކުރެވޭއިރު މީގެ ސަބަބުންވެސް ޕެންޝަނަށް ކުރަންޖެހޭ ޚަރަދު ބޮޑުވެގެންދާނެ ކަމަށް އޭނާ ވިދާޅުވިއެވެ.