ކުރާނެ މަސައްކަތެއް ނެތް ކަމަށް ބުނެ، ރައްޔިތުންގެ މަޖިލީހުގެ މިއަދުގެ ޖަލްސާ ވެސް އެޖެންޑާނުކޮށް ނުބާއްވަން ނިންމައިފިއެވެ.

މަޖިލީހުގެ ގަވާއިދު ބުނާގޮތުން ކޮންމެ ހަފްތާއަކު ތިން ދުވަހު ޖަލްސާއެއް ބާއްވަންޖެހެއެވެ. އާއްމުކޮށް ޖަލްސާ ބާއްވާ އުޅެނީ ހޯމަ، އަންގާރަ އަދި ބުދަ ދުވަހުއެވެ. ނަމަވެސް އިއްޔެއާއި މިއަދުވެސް މަޖިލީހުގެ ޖަލްސާއެއް ނުބާއްވައެވެ. 

ޖަލްސާ ނުބޭއްވި ނަމަވެސް އިއްޔެވެސް ކޮމިޓީ ތަކުގެ މަސައްކަތް ކުރިއަށް ގެންގޮސްފައިވާކަން ފާހަގަކޮށްލަންޖެހެއެވެ. އަދި މިއަދުވެސް ދެ ކޮމިޓީއެއްގެ މަސައްކަތް ވަނީ އެޖެންޑާ ކޮށްފައެވެ. 

Advertisement

މަޖިލީހުގެ ޖަލްސާތައް ނުބާއްވާ ކެންސަލް ކުރަންޖެހޭ އަސްލު ސަބަބެއް މަޖިލީހުގެ އިދާރާއިން ހާމައެއް ނުކުރެއެވެ.

މީގެ ކުރިން ޖަލްސާތައް ކެންސަލްވާތީ މަޖިލީހަށް ރައްޔިތުންގެ ފާޑުކިޔުންތައް އަމާޒުވުމުން، މެންބަރުންނާއި، މަޖިލީހުގެ ރައީސްވެސް ވަނީ އެއަށް ރައްދު ދެއްވައި ތަޅުމުގައި މަސައްކަތް ކުރިއަށް ނުދިޔަ ނަމަވެސް، ކޮމިޓީގައި ގިނަ މަސައްކަތް ތަކެއް ކުރިއަށްދާކަން ފާހަގަކުރައްވާފައެވެ. 

އެންމެ ފަހުންވެސް ޖަލްސާއެއް ބޭއްވީ މިދިޔަ ހަފްތާގެ ބުދަ ދުވަހުއެވެ. 

އެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް، އާއި އެނޫން މެންބަރުން މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް އާދަމް ނަޞީރު އިބްރާހީމް މަޖިލީހަށް ހާޒިރުކުރައްވައި ސުވާލު ކުރައްވާފައިވެއެވެ. 

މީގެ އިތުރުން، ބައެއް ގައުމުތަކަށް ނޮން-ރެސިޑެންޓް ސަފީރުން އައްޔަނު ކުރުމުގެ މަސައްކަތް ކުރިއަށް ގެންދެވުނެވެ.