އިރާގުގެ ވެރިރަށް ބަގްދާދުގައި ކުރިއަށްދާ "ބަގްދާދް މިލިޓަރީ އެކްސްޕޯ 2025" ގައި އީރާނުގެ ސްޓޯލަށް މީޑިއާތަކުގެ ނަޒަރު ހުއްޓިއްޖެއެވެ.

ބަގްދާދުގައި ކުރިއަށްދާ މި މައުރަޒުގައި ދުނިޔޭގެ ބައެއް ޤައުމުތަކުން ބައިވެރިވާއިރު، މި މައުރަޒުގައި އެންމެބޮޑު ސަމާލުކަމެއް ލިބިގެންގޮސްފައިވަނީ އީރާނުގެ ސްޓޯލަށެވެ. އެގޮތުން އަރަބި ގިނަ މީޑިއާތަކެއްގެ ސަމާލުކަން ލިބިގެންގޮސްފައިވަނީ، މި މައުރަޒުގައި ކަނަކަށްވާގޮތަށް ބަހައްޓާފައިހުރި ޑްރޯންއަށެވެ. 

މި ޑްރޯންއަކީ އީރާނުގައި އުފެއްދުމެއްކަމަށްވާ "ޝާހިދު 136" ނަމަކަށް ކިޔާ ޑްރޯންއެވެ. މިބާވަތުގެ ޑްރޯންއަކީ ރަޝިއާއިން ޔުކްރެއިނަށް ހަމަލާދިނުމުގައި ވަރަށްގިނައިން ބޭނުންކުރި ޑްރޯނެކެވެ. މީގެ އިތުރުން އީރާނުން މިދިޔަ އަހަރުގެ އޭޕްރިލްމަހު އިސްރާއީލަށް ހަމަލާދިންއިރު އެޤައުމުން ވަނީ މި ޑްރޯން ބޭނުންކޮށްފައެވެ. މި ޑްރޯންއަކީ 200 ކިލޯގެ ގޮވާތަކެތި އުފުލޭ އަދި 2،500 ކިލޯ މިޓަރު ދުރަށް ގޮސް ހަމަލާދިނުމުގެ ގާބިލުކަން ލިބިގެންދާ އީރާނުގެ އަމިއްލަ އުފެއްދުމެކެވެ. ގިނަބަޔަކު އެންމެބޮޑު ޝައުގުވެރިކަމެއް ލިބިގެންގޮސްފައިވަނީ މިފަދަ ދަނޑިވަޅެއްގައި އީރާނުގެ އަސްކަރިއްޔާއިން އެތަކެތި ދައްކާލުމުންނެވެ. 

ބަގްދާދް މިލިޓަރީ މައުރަޒުގެ އީރާން ސްޓޯލް.. ފޮޓޯ: ޝަފަޤް

"ބަގްދާދް މިލިޓަރީ އެކްސްޕޯ 2025 ގައި މިފަހަރު 14 ޤައުމަކުން އެޤައުމުތަކުގެ އަސްކަރިއްޔާގެ އިތުރުން 30 ޤައުމަކުން ބައިވެރިވެއެވެ. މި މައުރަޒަކީ ބިމާއި، ކަނޑާއި ވައިގެ އޮޕަރޭޝަންތަކުގައި އަސްކަރިއްޔާތަކުން ބޭނުންކުރާ ފަހުގެ ޓެކްނޮލޮކޯ ދައްކާލުމަށް ބާއްވާ މައުރަޒެކެވެ.

މި މައުރަޒުގައި ޗައިނާ، ދެކުނު ކޮރެއާ، ޖަޕާންގެ އިތުރުން މެދުއިރުމައްޗާއި އޭޝިއާގެ ޤައުމުތަކުގެ ދިފާއީ ވުޒާރާތަކާއި، ހަތިޔާރާއި ޓެކްނޮލޮޖީ ކުންފުނިތަކުން ބައިވެރިވެއެވެ. މިހިނގާ ފެބުރުއަރީމަހުގެ 19 ވަނަ ދުވަހު ފެށި މި މައުރަޒު މިއަދު ނިމޭނެއެވެ.