ޤާނޫނު އަސާސީ އާއި ޤާނޫނުތައް ތަންފީޒުކުރުމުގައި، ޤާނޫނުގެ ވެރިކަން (ރޫލް އޮފް ލޯ) މި ޤަައުމުގައި ހިންގުމުގައި އެއްވެސް މީހަކު ތަފާތު ނުކުރައްވާ ކަމަށާ، އަދި ނުވެސް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައެވެ. 

”އެ މީހެއްގެ ޙަސަބަކަށް، ނަސަބަކަށް، މަޤާމަކަށް، މުއްސަނދިކަަމަކަށް، ރަޙްމަތްތެރިކަމަކަށް، ޢާއިލީ ތިމާގެ ކަމަކަށް، ސިޔާސީ ފިކުރަކަށް، އަދި އެ ނޫންވެސް ކަމަކަށް ބަލާ، މިކަމުގައި ކުރާނެ ތަފާތު ކުރުމެއް ނުއޮންނާނެ!“ ރައީސް މުޢިއްޒު ވިދާޅުވިއެވެ. 

Advertisement

ރައީސް މުޢިއްޒު މިހެން ވިދާޅުވެފައިވާއިރު، މިދިޔަ ބުރާސްފަތި ދުވަހުގެ ރޭ، ޕާޓީކޮށް މަސްތުވާތަކެތި ބޭނުން ކުރި މައްސަލައެއް ފެންމަތިވެ، އެ ހާދިސާގައި ހިމެނޭ އަންހެނަކު ގެއެއްގެ ފުރާޅުމައްޗަށް ވެއްޓުނު މައްސަލައެއްގައި ރައީސް އޮފީހުގައި ވަޒީފާ އަދާކުރި ބަޔަކު ހިމެނޭ ކަމަށްވެސް ފުލުހުން ވަނީ ތުހުމަތު ކޮށްފައެވެ. 

އެގޮތުން ތުހުމަތު ކުރެވުނީ، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ސްޓްރެޓެޖިކް ކޮމިޔުނިކޭޝަން މަގާމުގައި ހުންނެވި އިޒްދިޔާން މުޙައްމަދު މައުމޫނާއި، "ދިވެހި ޒުވާނުންގެ ޤައުމީ ލަފާދޭ ކޮމިޓީ"ގެ ރައީސް ކަމުގެ މަގާމުގައި ހުންނެވި ދާއޫދު އަޙްމަދަށެވެ. 

އެތަނުން، ދާވޫދު ޒުވާނުންގެ ލަފާދޭ ކޮމިޓީން ވަކިކޮށް، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޑިޖިޓަލް ސްޓްރެޓެޖީގެ މަގާމުން، މުސާރަ ނުލިބޭ ގޮތަށް މިއަދުން ފެށިގެން ވަނީ ސަސްޕެންޑް ކުރައްވައިފައެވެ.