ޘަޤާފަތުގެ ތެރެއިން ކުރަމުން އައި ކަމެއް ނަމަވެސް، ޝަރުޢީ އުސޫލުން ބަލާއިރު އެކަން މަނާވާނަމަ، ޘަޤާފަތަށްވުރެ ބޮޑަށް އިސްކަންދޭންވާނީ އިސްލާމް ދީނަށް ކަމަށް ދީނީ ޢިލްމުވެރިޔާ އައްޝައިޚް އަހުމަދު ސަމީރު ވިދާޅުވެއްޖެއެވެ.
"އީދު އުފާ އިމުގެތެރޭ" ނަމުގައި ބޮޑު ކެމްޕެއިނެެއް ފެށުމަށް، އދ. ދަނގެތީގައި ހުކުރު ދުވަހުގެރޭގައި ބޭއްވުނު ފޯރަމްގައި ވާހަކަދައްކަވަމުން، ޝެއިޚް ސަމީރު ވިދާޅުވީ، ރަސޫލާ ﷺ މަދީނާއަށް ހިޖުރައަށް ވަޑައިގެންނެވިއިރު، މަދީނާގެ އަހުލުވެރިންވެސް ދެ ޢީދެއް ފާހަގަކުރަމުން އައި ކަމަށެވެ. އަދި އެމީހުންގެ ތެރޭގައިވެސް ކުޅިވަރުކުޅުމާއި މަޖާކުރުން ކުރިއަށް ދިޔަ ކަމަށެވެ.
ނަމަވެސް އެ ދެޢީދުގެ ބަދަލުގައި މުސްލިމުން ފާހަގަކުރާ ދެޢީދު، ޢީދު ކަމުގައި ފަހުން ކަނޑައެޅިގެންދިޔަކަން ޝެއިޚް ފާހަގަކުރެއްވިއެވެ. އަދީ އެމީހުންވެސް ކުރަމުން އައި ކަންކަމުގެ ތެރޭގައި ހިމެނޭ އިސްލާމް ދީނާ ޚިލާފް ކަންކަން ރަސޫލާ ﷺ މަނާކުރެއްވި ކަމަށް ޝެއިޚް ވިދާޅުވިއެވެ.
އެހެންކަމުން ރާއްޖޭގައިވެސް ޘަޤާފީގޮތުން ކުރެވެމުން އައި ކަންކަން ކަމުގައި ވިޔަށް، އަޅުގަނޑުމެން އަޅާކިޔަން މިޖެހެނީ، އިސްލާމްދީނުގެ އިމުގެ ތެރޭގައި އެކަންކަން ހިމެނޭތީ ނުހިމެނޭތޯ… ދިނުގައި މަނާކޮށްފައި އޮތް ކަންކަން ނުހިމަނޭ ގޮތަށް ކޮންމެ ކުޅިވަރެއް ކުޅުނަސް އެއީ މައްސަލައެއް ނޫން. ޖުވާ ހިމެނިގެން ނުވާނެ، ދެ ޖިންސު މަސްހުނިވެގެން ނުވާނެ. މިޔުޒިކު ހިމެނިގެން ނުވާނެ. އެކަންކަން ހުރިނަމަ އެކަން މަނާވެގެންދާނެ.
އައްޝައިޚް އަޙުމަދު ސަމީރު
މީގެ އިތުރުން ޝެއިޚް ވިދާޅުވީ، ޢީދު ފާހަގަކުރުމުގެ ގޮތުން ތާރަ ޖެހުމަކީ ހުއްދަ ކަމެއް ނަމަވެސް، އޭގައި ގިގުނި ފާޑުގެ އެއްޗެހި ލައިގެން މިޔުޒިކު ކުޅޭ އެހެން ސާމާނު ބޭނުން ކުރާ ނަމަ އެވެސް ޙަރާމް ވެގެންވާނެ ކަމަށެވެ. އަދި ތާރަ ޖެހުނު ކަމުގައިވެސް ބެރަކީ ހުއްދަ އެއްޗެއް ނޫންކަމަށާ އެއީ ޙަރާމް އެއްޗެއްކަން ސުންނަތުން އެނގޭ ކަމަށް ޝެއިޚް ވިދާޅުވިއެވެ.
އެހެންވީމާ ޘަޤާފަތުގެ ތެރެއިން އަޅުގަނޑުމެން ކުރަމުން އަންނަ ކަމެއް ކަމުގައި ވިޔަސް، އެކަމެއް، ޝަރުޢީ އުސޫލުން މަނާވާނެ އޮވެއްޖެއްޔާމުން އަޅުގަނޑުމެން އިސްކަންދޭންވާނީ އަޅުގަނޑުމެންގެ ދީނުގައި އޮންނަ ގޮތަށް.
އައްޝައިޚް އަޙުމަދު ސަމީރު
ޢީދު އުފާ އިމުގެތެރޭ ފޯރަމްގެ ތެރެއިން: ފޮޓޯ/ ހުޝާން
މީގެ އިތުރުން ދިވެހިން ޘަޤާފަތޭ ބުނާއިރު، އެ ޘަޤާފަތް ބިނާވެގެންވާނީ ދިވެހި ދައުލަތް އެ އަސާސެއްގެ މައްޗަށް ބިނާވެފައުވާ އެންމެ މަތީ ބަހާ ކަމުގައިވާ އިސްލާމް ދީނުގެ ހަމަތަކުގެ މައްޗަށް ކަމަށް ޝެއިޚް ވިދާޅުވިއެވެ.
އެހެންކަމުން އެހެން ދީނެއްގެ ކަންކަމާއި އިސްލާމްދީން މަނާ ކުރާ ކަންކަން ހިމަނައިގެން، ދީނުގެ ޝިޢާރެއް ފާހަގައެއް ނުކުރެވޭނެ ކަމަށް ޝެއިޚް ވިދާޅުވިއެވެ.
”އެހެންވީމާ ޘަޤާފަތެއްނޫން މީގައި އިސްވާނީ. އިސްވާނީ ދީނީ ޝަރުޢީ ހަމަ.“
އައްޝައިޚް އަޙުމަދު ސަމީރު
"އީދު އުފާ އިމުގެތެރޭ" އަކީ ގިނަ އަދަދެއްގެ މަދަނީ ޖަމިއްޔާތައް ގުޅިގެން އުފައްދާފައިވާ "ފަލަސް" ހަރަކާތުން ފެށި ކެމްޕެއިނެކެވެ. "ފަލަސް" ހަރަކާތަކީ މިދިޔަ އަހަރު އުފެއްދި ހަރަކާތެކެވެ. އެއީ ރާއްޖޭގެ ދައުވަތުގެ މައިދާނުގައި އެންމެ ހަރަކާތްތެރި ޖަމިއްޔަތުއް ސަލަފުގެ އިސް ނެގުމަށް ރާއްޖޭގެ ކޮންމެ އަތޮޅަކުން ޖަމިއްޔާއެއް ހިމެނޭގޮތަށް އިފްތިތާހު ކުރި ހަރަކާތެކެވެ.
އެ ހަރަކާތުން "އީދު އުފާ އިމުގެތެރޭ" ނަމުގައި ޚާއްސަ ކެމްޕެއިނެއް ފެށީ އީދުގެ ހަރަކާތްތައް އިސްލާމްދީނުގެ އިމުގެ ތެރޭގައި އެ ދީން ހުއްދަ ކުރާ ގޮތަށް ކުރިއަށް ގެންދިއުމަށް ބާރު އެޅުމުގެ ގޮތުންނެވެ.
Advertisement
This content is created and paid for by advertisers and does not involve Voice Journalists
