ރަޝިއާއިން ޔުކްރެއިނާ ދެކޮޅަށް ކުރަމުންގެންދާ ހަނގުރާމައިގައި ރަޝިއާގެ ފައުޖުގައި ބައިވެރިކުރުމަށް އަނެއްކާވެސް އުތުރު ކޮރެއާގެ ސިފައިން ފޮނުވުމަށް ނިންމައިފިއެވެ.

މިކަމާ ގުޅޭގޮތުން އުތުރު ކޮރެއާގެ ދައުލަތުގެ މީޑިއާ، ކޮރެއަން ސެންޓްރަލް ނިއުސް އޭޖެންސީން ބުނެފައިވަނީ، ޔުކްރެއިން ހަނގުރާމައިގައި ރަޝިއާއަށް ވާގިވެރިވުމަށްޓަކައި، އުތުރު ކޮރެއާގެ އަސްކަރިއްޔާގެ ޓީމެއް ރަޝިއާއަށް ފޮނުވުމަށް ޒައީމް ކިމް ޖޮން އަމުރުކުރައްވާފައިވާކަމަށެވެ. ނަމަވެސް މިފަހަރު ފޮނުވާނީ ކިހާ ސިފައިންނެއްކަމެއް އުތުރު ކޮރެއާ އަދި ރަޝިއާއިންވެސް ހާމަކޮށްފައެއް ނުވެއެވެ.

ޔުކްރެއިނާ ރަޝިއާ ކުރަމުންގެންދާ ހަނގުރާމައަށް ދެވަނަ ފަހަރަށް އުތުރު ކޮރެއާ ސިފައިން ފޮނުވުމަށް ނިންމާފައިމިވަނީ ރަޝިއާގެ ޗީފް އޮފް ސްޓާފް ވެލެރީ ގެރާސިމޯވް، އުތުރު ކޮރެއާގެ އަސްކަރިއްޔާ ސިފައިންނަށް އަމާޒުކޮށް ވަރަށްބޮޑަށް ތައުރީފް ކުރައްވާފައިވަނިކޮށެވެ. އުތުރު ކޮރެއާއިން ވަނީ މީގެ ކުރިންވެސް ޔުކްރެއިން ހަނގުރާމައަށް ސިފައިން ފޮނުވާފައެވެ. ބީބީސީން ބުނާގޮތުގައި އުތުރު ކޮރެއާއިން އެފަހަރު ވަނީ ރަޝިއާގެ ފައުޖުގައި ބައިވެރިކުރުމަށް 11،000 ހާހާ ގާތްކުރާ އަދަދަކަށް ސިފައިން ފޮނުވާފައެވެ. އަދި ވޭތުވެދިޔަ ތިން މަހެއްހާ ދުވަހުގެ ތެރޭގައި އޭގެ ތެރެއިން ގިނަ އަދަދެއްގެ ސިފައިން މަރުވެފައިވާކަމަށްވެސް ބުނެއެވެ.

ޔުކްރެއިނާ ދެކޮޅަށް ހަނގުރާމަކުރުމަށް އުތުރު ކޮރެއާގެ ސިފައިން ފޮނުވުމަށް ނިންމިއިރު، ރަޝިއާ އާއި އުތުރުކޮރެއާއަކީ ސޯވިއެޓް ޒަމާނުއްސުރެ ވަރަށް ގާތް ދެ ޤައުމެވެ. އެގޮތުން ކޮރެއާ ހަނގުރާމައިގައި ރަޝިއާއިން ވަނީ އެޤައުމަށް ހަތިޔާރާއި ޕައިލެޓުން ފޮނުވާފައެވެ. އުތުރު ކޮރެއާއަށް އެންމެ ފަސޭހައިން އެތެރެވެވޭ ޤައުމުތަކުގެ ލިސްޓްގައި ރަޝިއާ ހިމެނެއެވެ. މީގެ އިތުރުން ރަޝިއާއަކީ މިހާރުވެސް ޗައިނާ ފިޔަވައި ވިޔަފާރިއާއި އެނޫންވެސް ގޮތްގޮތުން އުތުރު ކޮރެއާ އާ އެންމެ ގުޅުންބޮޑު ޤައުމެވެ. 

ރަޝިއާ އާއި ޔުކްރެއިން ހަނގުރާމައަކީ މިހާރު ދުނިޔޭގެ އިގްތިސާދަށް މިވަގުތު އޮތް އެންމެބޮޑު ގޮންޖެހުންގެ ގޮތުގައި އިގްތިސާދީ މާހިރުން އެއްބަސްވާ މައްސަލައެވެ. ޔުކްރެއިން ހަނގުރާމައަށް 3 އަހަރުވެފައިވާއިރު، މި ހަނގުރާމައިގެ ސަބަބުން މުޅި ދުނިޔޭގެ އިގްތިސާދަށް ލިބުނު ގެއްލުންތައް 3 ޓްރިލިއަން ޑޮލަރަށްވުރެ ބޮޑުކަމަށް ނިމިގެންދިޔަ ވަރލްޑް އިކޮނޮމިކް ފޯރަމްގެ ބައިވެރިން ވަނީ ފާހަގަކޮށްފައެވެ.