ދިވެހި މަސްވެރިން ދައުލަތް ދަންނަ ބަޔަކަށް ވެއްޖެކަމަށާއި، މިއަދަކީ މަސްވެރި އާއިލާތަކަށް ވަރަށް އުފާވެރި ދުވަހެއްކަމަށް، މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
ރަހުނަކާ ނުލައި މަސްވެރިންނަށް ލޯނު ލިބޭނޭ މަގުފަހިކޮށްދިނުމުގެ ގޮތުން މިއަދު ބޭންކް އޮފް މޯލްޑިވްސް އާއެކު ވެވުނު އެއްބަސްވުމަށްފަހު އެކްސްގައި ކުރެއްވި ޕޯސްޓެއްގައި ޝިޔާމް ވިދާޅުވީ، މަސްވެރިންނަކީ ރަސްމީ ވަޒީފާއެއް އަދާކުރާބައެއްގެ ގޮތުގައި ކަނޑައަޅުއްވާ ބޭންކުތަކާ ދައުލަތުގެ މުއައްސަސާތަކުގައި ވަޒީފާ އަދާކުރައްވާ އެހެން ފަރާތްތަކަށް ފަހިކޮށްދެވޭ ފުރުޞަތުތަކުން މަހުރޫމް ނުވާނެ ބައެއްގެ ގޮތުގައި މަސްވެރިން ހެއްދެވުމަކީ ރައީސް ޑރ.މުހައްމަދު މުއިއްޒުގެ ސިޔާސަތެއްކަމަށެވެ. މިއަދު އެ ސިޔާސަތު ފުރިހަމަ ވެގެންދާކަން ފާހަގަކުރައްވައި ވަޒީރު ވިދާޅުވީ، މިއަދު ދައުލަތް ދަންނަ ބައެއްގެ ގޮތުގައި މަސްވެރިން ވެއްޖެކަމަށެވެ.
ވަޒީރު ޝިޔާމް ވަނީ މަސްވެރިްނގެ ދަފްތަރުގައި ރަޖިސްޓަރީ ވުމަށް ޚާއްސަ ސަމާލުކަމެއް ދެއްވުމަށް އޮޑިވެރިންނަށާ މަސްވެރިންނަށް އިލްތިމާސްކުރައްވާފައެވެ.
ފިޝަރީޒް މިނިސްޓްރީން ބީއެމްއެލްއާއެކު މިއަދު ވެވުނު އެއްބަސްވުމުގެ ދަށުން ނެޝަނަލް ފިޝަރމަންސް ރެޖިސްޓަރީގައި ދަފްތަރުވެފައިވާ މަސްވެރިންނަށް އެމީހުންގެ އާމްދަނީއަށް ބަލައި، އަމިއްލަ ފައިނޭންސިންގ، ކްރެޑިޓް ކާޑު އަދި ގެދޮރު ލޯނު ފަދަ އެކި ބާވަތުގެ ކްރެޑިޓް ފެސިލިޓީތައް ލިބުމަށް މަގު ފަހިވެގެންދާނެއެވެ.
މި އިންތިޒާމުގެ ދަށުން، ޝަރުތު ހަމަވާ މަސްވެރިންނަށް ރަހުނެއް ނުވަތަ އިކުއިޓީއަކާ ނުލައި 300,000 ރުފިޔާއާ ހަމައަށް އަމިއްލަ ފައިނޭންސިންގ ލިބޭނެއެވެ. އެގޮތުން މޫސުމާއެކު މަސްވެރިކަމުގެ އާމްދަނީއަށް އަންނަ ބަދަލުތަކަށް ރިޢާޔަތްކޮށް ލޯނު އަނބުރާ ދެއްކުމުގެ ތާވަލެއްވެސް އެކުލަވާލެވިގެންދާނޭކަމަށް ފިޝަރީޒް މިނިސްޓްރީން ބުނެއެވެ.
ޕާސަނަލް ފައިނޭންސިންގގެ އިތުރުން، ނެޝަނަލް ފިޝަރމަންސް ރެޖިސްޓަރީގައި ރަޖިސްޓަރީވުމަށްފަހު، މަސްވެރިންނަށް ގެ އިމާރާތްކުރުމުގެ ފައިނޭންސިންގ، ގެ ގަތުމުގެ ފައިނޭންސިންގ އަދި ގެ މަރާމާތުކުރުމުގެ ފައިނޭންސިންގއަށް އެދި ހުށަހެޅުމުގެ ފުރުޞަތު ވެސް ލިބިގެންދާނެ ކަމަށް ބޭންކުން ބުނެއެވެ.
Advertisement
This content is created and paid for by advertisers and does not involve Voice Journalists
