ގދ.ގައްދޫއިން ފުރައިގެން ހުޅުމާލެއަށް ދަތުރުކުރި މުދާއުފުލާ ދޯންޏެއް ގެއްލިގެން ހޯދުމުގެ މަސައްކަތް ފަށައިފިއެވެ.

ފުލުހުން ބުނީ ގެއްލިގެން ހޯދަމުންދަނީ، "ބްރިލިއަންޓް ކެރިއަރ" ނަމަކަށް ކިޔާ ދޯންޏެއް ކަމަށެވެ. މި ދޯނި ގައްދޫއިން  ފުރާފައިވަނީ، ރޭ އިރާކޮޅު 8 ޖަހާ އެހާކަންހާއިރުކަމަށް ފުލުހުން ބުންޏެވެ.  މި ދޯނީގައި ތިބީ 5 މީހުންނެވެ. އެއީ 3 ދިވެހިންނާއި 2 ބިދޭސީންނެވެ.

ދޯންޏާ އެންމެ ފަހުން ގުޅިފައިވާކަމަށް ފުލުހުން ބުނެފައިވަނީ، ރޭ މެންދަމު 2:40 ގައެވެ. އެއިރު ކެޕްޓަން ބުނެފައިވަނީ، ހުވަދުއަތޮޅަށް ވަންނަން ކައިރިވެފައިވާ ކަމަށެވެ. އޭގެ ފަހުން ދޯންޏާ ގުޅިފައިނުވާކަމަށް ފުލުހުން ބުންޏެވެ.

Advertisement

ގެއްލުނު ދޯނި

މި މައްސަލަ މިއަދު ހަވީރު 6:00 ގައި ގައްދޫ ޕޮލިސް ސްޓޭޝަނަށް ރިޕޯޓުކުރެވި، އެމް.އެން.ޑީ.އެފްގެ ސަދަން ރީޖަން ކޮމާންޑަށް ވަނީ މައުލޫމާތު ދީފައެވެ. ދޯނި ހޯދުމުގެ މަސައްކަތް އެހާތަނުން ފެށުނުކަމަށް ފުލުހުން ބުނެއެވެ.

މި ދޯންޏާ ބެހޭ އެއްވެސް މައުލޫމާތެއް ލިބިފައިވާނަމަ، ނެޝަނަލް އިމަޖެންސީ ނަންބަރު 911 އަށް ނުވަތަ އެންމެ ކައިރި ފުލުހުންގެ މަރުކަޒަކަށް ރިޕޯޓްކުރުމަށް ފުލުހުން ވަނީ އެދިފައެވެ.