އިންޑިއާގެ އުއްތަރު ޕްރަދޭޝް ސްޓޭޓްގެ ޝަމްލީ ޑިސްޓްރިކްޓްގެ ޖިންޖާނާގައި މުސްލިމަކަށް ކޯރާޑީއަކުން ހަމަލާދީ ޒަޚަމްކޮށްލައިފިއެވެ.  

މި ހާދިސާގައި ސަރްފަރާޒް ނަމަކަށް ކިޔާ މުސްލިމަކަށް ހަމަލާ ދީފައިވަނީ ގޮވިންދު ނަމަކަށް ކިޔާ މީހަކެވެ. ގޯވިންދު ހަމަލާދިން މަންޒަރު ސީސީޓީވީ ކެމެރާއިން ރެކޯޑުވެފައިވާއިރު އެ ވީޑިއޯ މިހާރު އަންނަނީ މީސްމީޑިއާގައި ދައުރުވަމުންނެވެ. 

ވީޑިއޯއިން ފެންނަ ގޮތުގައި ސަރްފަރާޒް އޭނާގެ ކުޑަ ދަރިފުޅާއެކު ގޭ ބޭރުގައި އިންދާ ކުއްލިއަކަށް ގޮވިންދު އައިސް ކޯރާޑީއަކުން ހަމަލާދީފައިވެއެވެ. މި ހާދިސާ ހިނގިއިރު ގޮވިންދު ގޮވަމުން ދިޔައީ "26 މީހުންގެ ބަދަލުގައި 26 މަރާނަން" މިހެންނެވެ.

މިއީ ޖަމްމޫ އަދި ކަޝްމީރުގެ ޕަހަލްގާމްގައި ދާދިފަހުން ހިނގި ޓެރަރިސްޓް ހަމަލާގައި އިންޑިޔާގެ 26 ފަތުރުވެރިއަކު މަރާލާފައިވާތީ އެމީހުންގެ ބަދަލުގައި 26 މުސްލިމުން މަރާނެ ކަމަށްބުނެ އޭނާ ދިން އިންޒާރެކެވެ. 

ސަރްފަރާޒްގެ އާއިލާއިން ބުނާ ގޮތުގައި އޭނާއަށް ހަމަލާ ދެމުން ގޮވިންދު ވަނީ "ސަލާމަތްވެވޭތޯ ބަލާބަލަ.. މިގޮތަށް މަރާނަން" އެފަދައިންވެސް ގޮވާފައެވެ. އަދި ހަމަލާދިނުމަށްފަހު އެ ހަމަލާދިން ކޯރާޑީ ހިފައިގެން އޭނާ އެ ސަރަހައްދުގައި ހިނގާފައިވާ ކަމަށްވެސް ބުނެފައިވެއެވެ.

މި ހާދިސާގައި ސަރްފަރާޒްގެ މޫނާއި ކަރުދަށަށް ބޮޑެތި އަނިޔާތަކެއްވެ، މިހާރު ވަނީ ހޮސްޕިޓަލްގައި ފަރުވާދެމުންނެވެ. އޭނާގެ ހާލު ނާޒުކު ކަމަށް އާއިލާއިން މައުލޫމާތު ދޭއިރު އިތުރު ހަމަލާތަކެއް ދީފާނެ ކަމުގެ ބިރަށް އާއިލާއިން ވަނީ ފުލުހުންގެ ހިމާޔަތަށް އެދިފައެވެ.

މި ހާދިސާއާ ގުޅިގެން ފުލުހުން ވަނީ ތަޙުޤީޤު ފަށައި، ގޮވިންދު ހޯދުމުގެ މަސައްކަތް ކުރަމުންދާ ކަމަށް ބުނެފައެވެ.

ނަމަވެސް މިއީ "ބަދަލުހިފުމުގެ ހަމަލާއެއް" ކަމަށް ބެލުމަށް ފުލުހުން ފަސްޖެހޭ ކަމަށް ބައެއް ފަރާތްތަކުން ފާހަގަކޮށްފައިވެއެވެ.

ޕަހަލްގާމްގެ ހާދިސާާދިސާއާ ގުޅިގެން އިންޑިއާގެ އެކި ސަރަޙައްދުތަކުގައި މުސްލިމުންނާ ދެކޮޅަށް ހިންގާ އަނިޔާވެރި ޢަމަލުތައް އިތުރުވެފައިވާ ކަމަށް ރިޕޯޓުތަކުން ދައްކައެވެ.

މީގެ ތެރޭގައި މުސްލިމުންނާ ދެކޮޅަށް ނަފްރަތު އުފެއްދުމާއި، މުސްލިމުން ހިންގާ ފިހާރަތަކަށް ހަމަލާދިނުމާއި، މުސްލިމު ބަލިމީހުންނަށް ފަރުވާދިނުމަށް ހޮސްޕިޓަލު ތަކުން އިންކާރުކުރުން ފަދަ ކަންކަން ހިމެނެއެވެ.