ދަތުރުފަތުރާއި ބެހޭ ވަޒީރު މުހައްމަދު އަމީންގެ އިތުބާރު ނެތްކަމުގެ މައްސަލަ އިދިކޮޅު އެމްޑީޕީން ރައްޔިތުންގެ މަޖިލީހަށް ހުށަހަޅައިފި އެވެ.

މިކަން ހާމަކުރެއްވީ، އެމްޑީޕީގެ ޕާލިމެންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޕީޖީ ގްރޫޕްގެ ލީޑަރު އިބްރާހިމް ނާޒިލެވެ.

ނާޒިލް ވިދާޅުވިގޮތުގައި، މި މައްސަލަ ހުށަހަޅާފައިވަނީ، ފުރާޅެއް މައްޗަށް ވެއްޓިފައި އޮއްވައި ފެނުނު 21 އަހަރުގެ ހައްވާ ޔުމްނު ރަޝީދުގެ މައްސަލައިގައި އާއްމުންގެ ހުރި ކަންބޮޑުވުންތަކާއި ގުޅިގެންނެވެ. 

Advertisement

"އަޅުގަނޑުމެންގެ ޕީޖީ ގުރޫޕްގެ 12 މެންބަރުންގެ ސޮޔާއެކު މަޖިލީހުގެ އިދާރާއަށް (ވަޒީރު އަމީން) ގެ ނޯ ކޮންފިޑެންސް މައްސަލަ ވާނީ ހުށަހަޅާފައި. އޭގައި އަޅުގަނޑުމެންނަށް ފާހަގަކުރެވުނު އެކި ގޮތްގޮތުން ލިބުނު މުހިންމު ކަންކަން ނޯ ކޮންފިޑެންސް އެތީގައި ހިއްސާކޮށްފައި ވާނެ" ނާޒިލް ވިދާޅުވި އެވެ.

އެމްޑީޕީ ނޫސްވެރިންގެ ބައްދަލުވުމުގެ ތެރެއިން: ފޮޓޯ/ މަޖިލިސް

ނާޒިލް ވިދާޅުވީ، ވަޒީރެއް ކޮށްގެން ނުވާނެ ކަންތައްތަކެއްގެ ވާހަކަ ގާނޫނު އަސާސީގައި ބަޔާންކޮށްފައުވާ ކަމަށާ، އޭގެ ތެރެއިން ވަރަށް ގިނަ ކަންކަން ވަޒީރު އަމީންގެ ފަރާތްޕުޅުން ފެނިފައިވާ ކަމަށެވެ. އެހެންކަމުން އެކަމާއި ގުޅިގެން އެމްޑީޕީ ޕާލަމެންޓްރީ ގުރޫޕްގެ ތެރޭގައި ވަރަށް ބޮޑަށް ބަހުސްކޮށް މަޝްވަރާ ކުރެވުނު ކަމަށާ، އެ މަޝްވަރާ ތަކަށްފަހު އިތުބާރު ނެތް ކަމުގެ މައްސަލަ ހުށަހެޅުއްވި ކަމަށް ނާޒިލް ވިދާޅުވިއެވެ.

މި މަހުގެ 18 ވަނަ ދުވަހު ޔުމްނު ވެއްޓުމުގެ ކުރިން އެ ހާދިސާގައި ހިމެނޭ މީހުން ވަޒީރު އަމީންގެ ގޭގައި މަސްތުވާތަކެތި ބޭނުންކޮށް ގާނޫނާ ހިލާފު އަމަލުތަކެއް ހިންގާފައިވާކަމަށް އެމްޑީޕީން ތުހުމަތު ކުރާއިރު، ޕާޓީ ކުރި މީހުންގެ ތެރޭގައި އަމީންގެ އާއިލީ ދެ މީހަކުވެސް ހިމެނެއެވެ.

އެހެންކަމުން، ވަޒީރު އަމީން އެ މައްސަލައިގެ ތަހުގީގަށް ނުފޫޒު ފޯރުވަމުންދާކަން ތަކުރާރުކޮށް އެމްޑީޕީން އަންނަނީ ފާހަގަކުރައްމުންނެވެ. ނަމަވެސް އަމީން އެކަން ދޮގު ކުރެއެވެ.