ޗައިނާއިން އުފެއްދި ސީ-919 މަރުކާގެ މަތިންދާބޯޓު ޔޫރަޕްގެ ޤައުމުތަކުގައި އުދުހުމަށް ބޭނުންވާ ހުއްދަ ދިނުމަށް އަދި އަހަރުތަކެއް ނަގާނެކަމަށް ޔޫރަޕިއަން އޭވިއޭޝަން ސޭފްޓީ އެޖެންސީ (އިއާސާ) އިން ބުނެފިއެވެ.

އިއާސާގެ އެގްޒެކެޓިވް ޑިރެކްޓަރ ފްލޯރިއަން ގުލިމަރ ވިދާޅުވީ މިއަހަރު އެ މަތިންދާބޯޓަށް ހުއްދަ ނުދެވޭނެކަމަށާއި، އެކަން ކުރަން އަދި 3 އަހަރާއި 6 އަހަރާއި ދެމެދުގެ މުއްދަތެއް ބޭނުންވާ ކަމަށެވެ. ޔޫރަޕްގެ އެއަރބަސްއާއި އެމެރިކާގެ ބޮއިންއާ ވާދަކުރުމަށް ޗައިނާއިން އުފެއްދި ސީ-919 އަކީ ނެރޯ ބޮޑީ މާކެޓްގައި ވާދަވެރި އުފެއްދުމަކަށް ވާނެކަމަށް ޗައިނާއިން އުއްމީދުކުރެއެވެ. މި މަރުކާގެ މަތިންދާބޯޓަށް ޗައިނާއިން 2022 ގައި ހުއްދަދީ، 2023 ވަނަ އަހަރުން ފެށިގެން ޗައިނާ އަދި ހޮންކޮންގްގެ އެތެރޭގެ އުދުހުންތަކުގައި އަންނަނީ ބޭނުންކުރަމުންނެވެ.

ބައިނަލްއަޤްވާމީ ބާޒާރުގައި ޗައިނާގެ އަމިއްލަ މަތިންދާބޯޓުތައް ވިއްކުމަށް އިއާސާ ނުވަތަ އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަންފަދަ އިދާރާއަކުން އެމަތިންދާބޯޓެއްގެ ސަލާމަތީ ކަންކަން ފާސްކުރަން ޖެހެއެވެ. ޔޫރަޕްގެ އެޖެންސީއާއެކު ޗައިނާއިން މަސައްކަތްކުރަމުން އައިނަމަވެސް، އަދިވެސް އެމެރިކާގެ އެފް.އޭ.އޭ ގެ ހުއްދަ ހޯދަން ޗައިނާއިން މަސައްކަތެއް ނުކުރެއެވެ. ހުޅަނގުގެ ބައެއް ޤައުމުތަކުން ތުހުމަތުކުރާ ގޮތުގައި މަތިންދާބޯޓު އުފެއްދުމަށްވެސް ޗައިނާއިން ވަނީ ހުޅަނގުގެ ބައެއް ޓެކްނޮލޮޖީތައް ނަކަލުކޮށްފައެވެ.

Advertisement