ހުޅުމާލޭގައި މީހުން އާބާދުވިތާ 21 އަހަރު ފުރުން ފާހަގަކުރުމަށް، ކުލަގަދަ ފެސްޓިވަލެއް ބޭއްވުމަށް އެޗްޑީސީން އިން ނިންމައިފި އެވެ.
މި ފެސްޓިވަލް ބާއްވާނީ "މައި ހުޅުމާލޭ ފެސްޓިވަލް" ގެ ނަމުގަ އެވެ. އެޗްޑީސީން ބުނީ އެ ފެސްޓިވަލް ފޯރިގަދަ ހަރަކާތްތަކާއެކު ބާއްވާ މެއި 10 ގައި ފެށުމަށް ނިންމާފައިވާ ކަމަށެވެ. އެ ފެސްޓިވަލް ހަފްތާއަކަށް ދެމިގެންދާނެ ކަމަށް ވެސް ބުންޏެވެ.
އެގޮތުން، އެކި ދުވަސްތަކަށް ބަހާލައިގެން ހުޅުމާލޭގެ އެކި ސަރަހައްދުތަކުގައި ކުރިއަށްގެންދާ މި ފެސްޓިވަލްގައި ހުރިހާ އުމުރުފުރާއެއްގެ ފަރާތްތަކަށް ހާއްސަ ހަރަކާތްތައް ވެސް ހިމެނޭނެ އެވެ.
އަހަރީ ދުވަހުގެ ބައެއް ހަރަކާތްތަކުގެ ތެރޭގައި ފޮޓޯގްރަފީ ކޮމްޕެޓިޝަން އާއި ފެމިލީކާނިވަލް އާއި ހުޅުމާލޭ ޑިސްކައުންޓް ވީކާއި ހެލްތް ކޭމްޕާއި ހުޅުމާލޭ ސްޓޯރީ ފޮޓޯ ވޯކް އާއި މަސްރޭހާއި ސައިކްލިން ޗެމްޕިއަންޝިޕް އަދި ބީޗް ފެސްޓް ހިމެނެ އެވެ.
މީގެ 21 އަހަރު ކުރީން ހުޅުމާލޭގައި ފުރަތަމަ މީހުން އާބާދުވީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގަ އެވެ. އެ ބިޔަ މަޝްރޫއު ފެށުނީވެސް ރައީސް މައުމޫންގެ ވެރިކަމުގަ އެވެ.
މިއަދު ހުޅުމާލެ އަކީ މުޅި ދުނިޔެއިން ވެސް އެންމެ ފާހަގަކޮށްލެވޭ އެއް އަވަށެވެ.
Advertisement
This content is created and paid for by advertisers and does not involve Voice Journalists
