މަރުކަޒީ ބޭންކް، އެމްއެމްއޭގެ ޑެޕިއުޓީ ގަވަރުނަރުކަމުގެ މަގާމަށް އެ ބޭންކުގެ މެނޭޖިން ޑިރެކްޓަރު ކަމުގެ މަގާމުގައި ހުންނެވި އައިޝަތު އަސްނާ ހަމްދު ހަމަޖައްސަން ރައްޔިތުންގެ މަޖިލީހަށް ފޮނުވައިފި އެވެ.

މިއަދު ބޭއްވި މަޖިލީހުގެ ޖަލްސާގައި އަސްނާ އެ މަގާމަށް ހަމަޖައްސަން ރައީސް މުހައްމަދު މުއިއްޒު ފޮނުއްވި ސިޓީ އިއްވާފައިވާއިރު އެ މައްސަލަ ދިރާސާ ކުރުމަށް މާލިއްޔަތު ކޮމިޓީއަށް ވަނީ މިއަދު ފޮނުވައިފަ އެވެ. 

އަސްނާ އެމްއެމްއޭގައި ހިދުމަތް ކުރައްވާތާ 15 ވަރަކަށް އަހަރު ވެފައިވާއިރު، މިވަގުތު އޭނާ ހުންނެވީ މާލީ އިދާރާ ކުރިއެރުވުމާ ގުޅޭ އެމްއެމްއޭގެ ޑިޕާޓްމަންޓުގެ ވެރިޔާގެ ގޮތުގަ އެވެ. އޭނާ އެ މަގާމަށް ހަމަޖެއްސެވީ ގަވަރުނަރުގެ މަގާމަށް މުނައްވަރު ވަޑައިގެން މިދިޔަ ނޮވެމްބަރު މަހު ގެންނެވި ބަދަލުތަކުގެ ތެރެއިންނެވެ. 

Advertisement

ޑެޕިޔުޓީ ގަވަރުނަރުގެ މަގާމަށް ބޭފުޅަކު ހަމަޖެއްސުމަށް ނަން ފޮނުވާފައި މިވަނީ އެ މަގާމުގައި ކުރިން ހުންނެވި އަހުމަދު އިމާދު މަގާމުން ވަކި ކުރުމުގެ މަސައްކަތް ފަށާފައިވަނިކޮށް އިސްތިއުފާ ދެއްވުމާ ގުޅިގެންނެވެ. 

އިމާދު މަގާމުން އިސްތިއުފާ ދެއްވީ މިދިޔަ މާޗު މަހުގެ 17 ވަނަ ދުވަހުއެވެ.