ޗައިނާގެ ބަހާއި ސަގާފަތު ކުރިއަރުވައި ފެތުރުމަށް މަސައްކަތްކުރާ ކޮންފިއުޝަސް އިންސްޓިޓިއުޓްތައް ބަންދުކުރުމަށް އޮސްޓްރޭލިއާގެ ހަ ޔުނިވަރސިޓީއަކުން ނިންމަފިއެވެ. ދުނިޔޭގެ އެކި ކަންކޮޅުތަކުގައި ހިންގާ ޔުނިވަރސިޓީތަކުގައި ކޮންފިއުޝަސް އިންސްޓިޓިއުޓްގެ ގޮފިތައް ހިންގައެވެ. މި ތަންތަން ހިންގުމުގައި ޗައިނާ ސަރުކާރުގެ ނުސީދާ ދައުރެއް އޮވެއެވެ.
ކޮންފިއުޝަސް އިންސްޓިޓިއުޓްގެ ގޮފިތަކެއް ބަންދުކުރުމަށް އޮސްޓްރޭލިއާގެ ޔުނިވަރސިޓީތަކަކުން ނިންމީ، އެ މަރުކަޒުތައް ބޭނުންކޮށްގެން ޗައިނާއިން ޖާސޫސުކުރުމާއި، ޕްރޮޕަގަންޑާ ފެތުރުން އާއްމުވެފައިވާކަމަށް ތުހުމަތުވެފައިވާ ދަނޑިވަޅެއްގައެވެ. އޮސްޓްރޭލިއާގެ ގިނަ ޔުނިވަރސިޓީތަކަކުން ކޮންފިއުޝަސް އިންސްޓިޓިއުޓްތައް ބަންދުކުރިނަމަވެސް، އަދި ބާކީ 7 ތަނެއް އޮސްޓްރޭލިއާގައި އެބަހުއްޓެވެ. ކޮންފިއުޝަސް އިންސްޓިޓިއުޓްތައް ބަންދުކުރުމަށް ނިންމި ޔުނިވަރސިޓީތަކަކީ، ޔުނިވަރސިޓީ އޮފް މެލްބަން، ޔުނިވަރސިޓީ އޮފް ކުއީންސްލެންޑް، ޔުނިވަރސިޓީ އޮފް ވެސްޓަރން އޮސްޓްރޭލިއާ، ޔުނިވަރސިޓީ އޮފް ނިއު ސައުތު ވޭލްސް އަދި ރޯޔަލް މެލްބަން އިންސްޓިޓިއުޓް އޮފް ޓެކްނޮލޮޖީ އެވެ. މީގެ ތެރެއިން ކުއީންސްލެންޑް ޔުނިވަރސިޓީއިން ބުނީ އެ ޔުނިވަރސިޓީއިން ކޮންފިއުޝަސް އިންސްޓިޓިއުޓް ބަންދުކުރީ އެތަން ހިންގަން ހަދާފައިވާ ކޮންޓްރެކްޓް މިދިޔަ އަހަރުގެ ނިޔަލަށް ހަމަވުމުން ކަމަށެވެ. އެހެން ޔުނިވަރސިޓީތަކުންވެސް އެކި ހުއްޖަތްތައް ދައްކާފައިވެއެވެ.
އޮސްޓްރޭލިއާގެ ފެޑެރަލް ސަރުކާރުން މީގެ ކުރިން ވަނީ އިތުރު ކޮންފިއުޝަސް އިންސްޓިޓިއުޓެއް ހުޅުވަން ހުއްދަ ނުދޭނެކަމުގެ އިޝާރާތެއް ދީފައެވެ.
Advertisement
This content is created and paid for by advertisers and does not involve Voice Journalists
