އިސްރާއީލުން ވެރިކޮށްފައިވާ ފަލަސްތީނުގެ ބިންތަކުގެ މައްސަލާގައި އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ބަންޑާރަ ނައިބު އަހުމަދު އުޝާމް މާދަމާ ބަޔާނެއް ދެއްވާނޭކަމަށް ބަންޑާރަ ނައިބުގެ އޮފީހުން ބުނެފިއެވެ.

އިސްރާއީލުގެ ބާރުގެ ދަށަށް ގެނެސްފައިވާ ފަލަސްތީނުގެ ބިންތަކުގައި އދ އާއި އެހެނިހެން ބައިނަލްއަޤްވާމީ ޖަމިއްޔާތަކާއި، އެހެން ޤައުމުތަކުން ތިބުމާއި، އެ ބިންތަކުގައި އެފަރާތްތަކުން ހިންގާ ހަރަކާތްތަކާއި ގުޅިގެން އިސްރާއީލްގެ އިލްތިޒާމްތަކާ ގުޅޭގޮތުން އައިސީޖޭގެ އިސްތިޝާރީ ލަފަޔަކަށް އެދި ހުށަހަޅާފައިވާ މައްސަލައިގެ އަޑުއެހުންތައް މިހާރު ކުރިއަށްދާއިރު، މި މައްސަލާގައި ރާއްޖޭގެ ފަރާތުން ބަންޑާރަ ނައިބު އަހުމަދު އުޝާމްގެ ފަރާތްޕުޅުން ދެއްވާ ބަޔާން މާދަމާ ހުށަހެޅުމަށް ވަނީ ހަމަޖެހިފައެވެ.

މި މައްސަލައަކީ ބައިނަލްއަޤްވާމީ ޖަމާއަތްތަކުން ފަލަސްތީނުގެ އާއްމު ރައްޔިތުންނަށް ދެމުންގެންދާ އިންސާނީ އެހީތެރިކަމަށް ހުރަސްއަޅައި، ފަލަސްތީނުގެ ރެފިއުޖީންނަށް އިންސާނީ އެހީތެރިކަން ފޯރުކޮށްދެމުން އަންނަ އދ ގެ ޖަމިއްޔާ ޔޫއެންޑީއާރުޑަބްލިއުއޭ ގެ މަސައްކަތްތައް ހުއްޓުވާލުމަށްޓަކައި އިސްރާއީލްގެ ޤާނޫނު ހަދާ މަޖިލީހުން ނިންމުމާއި، ޢައްޒާގައި އިންސާނީ އެހީތެރިކަން ފޯރުކޮށްދިނުމަށްޓަކައި ހަރަކާތްތެރިވަމުންދާ ފަރާތްތަކަށް އިސްރާއީލުން ހަމަލާތައް ދެމުންދާތީވެ، އެޤައުމުން އުފުލަންޖެހޭ ޒިއްމާތަކާ ގުޅޭގޮތުން އައިސީޖޭއަށް އިޝްތިސާރީ ލަފައަކަށް އެދިހުށަހެޅުމަށް އދ ގެ އާންމު މަޖިލީހުން މިދިޔަ އަހަރުގެ ޑިސެމްބަރުމަހުގެ 19 ވަނަ ދުވަހު ފާސްކުރުމަށް ހުށަހަޅާފައިވާ މައްސަލައެކެވެ. މި މައްސަލާގައި ރާއްޖޭގެ ފަރާތުން  ބައިވެރިވެ މިދިޔަ އަހަރުގެ ފެބުރުއަރީމަހު ވަނީ ލިޔުމުން ބަޔާނެއް ހުށަހަޅާފައެވެ. 

Advertisement

އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންގެންދާ ޖަރީމާތަކާ ގުޅިގެން އައިސީޖޭ އަށް އިޒްރާއީލާ ދެކޮޅަށް ދެކުނު އެފްރިކާއިން ހުށަހެޅި މައްސަލައިގެ ތެރެއަށްވެސް ދިވެހިރާއްޖެއިން ވަނީ ތަދައްޚުލްވާން ނިންމާފައެވެ. މި މައްސަލައިގެ ތެރެއަށް ދިވެހިރާއްޖެއިން ވަދެފައިވަނީ މިދިޔަ އަހަރުގެ އޮކްޓޯބަރުމަހުގެ ތެރޭގައެވެ. މި މައްސަލައިގައި، ދެކުނު އެފްރިކާއިން ހުށަހަޅާފައިވަނީ، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ޣައްޒާގައި ހިންގަމުންދާ ނިރުބަވެރި އަމަލުތަކަކީ 1948 ވަނަ އަހަރުގެ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ޖެނޮސައިޑް ކޮންވެންޝަން) އާ ޚިލާފު ޢަމަލުތަކެއްކަމަށެވެ. 

އައިސީޖޭ އަށް އިޒްރާއީލާ ދެކޮޅަށް ހުށަހެޅި މައްސަލައިގެ އަޑުއެހުމެއްގެ ތެރެއިން.. ފޮޓޯ: ރޮއިޓާސް

އިސްރާއީލުން ހިފާފައިވާ ފަލަސްތީނުގެ ބިންތަކުގައި ހިންގަމުންދާ ޢަމަލުތައް ކުށްވެރިކޮށް، އެ ޢަމަލުތަކަކީ ނިރުބަވެރި އަމަލުތަކެއްކަމަށް ދިވެހި ސަރުކާރުން ދަނީ ބައިނަލްއަޤްވާމީ މައިދާނުގައި އަޑުއުފުލަމުންނެވެ. މިގޮތުން އ.ދ. ގެ ޢާންމު މަޖިލީހުގައި މިދިޔަ އަހަރު ބޭއްވި  79 ވަނަ ސެޝަންގެ ޢާންމު ބަހުސްގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ޣައްޒާގައި އިޒްރާއީލުން ހިންގަމުންދާ ނިރުބަވެރި ޢަމަލުތަކަށް އިޒްރާއީލުން ޖަވާބުދާރީ ކުރުވެން ޖެހޭނެކަމަށް ވިދާޅުވެ ވާހަކަފުޅު ދައްކަވާފައެވެ.