ރާއްޖޭގެ މަތީތައުލީމް ދާއިރާގައި ބާއްވާ އެންމެ ބޮޑު ފުޓްސަލް މުބާރާތް "11 ވަނަ އެމްއެންޔޫއެސްޔޫ ފުޓްސަލް ފިއެސްޓާ 2025" ގެ ޓައިޓަލް ސްޕޮންސަރ އަކަށް ދިރާގު ހަމަޖައްސައިފިއެވެ.

މުބާރާތުގެ ޓައިޓަލް ސްޕޮންސަރ އެކު ބޭއްވި ސޮއިކުރުމުގެ ރަސްމިއްޔާތުގައި ދިރާގުގެ ފަރާތުން ސޮއިކުރެއްވީ މެނޭޖަރ ބްރޭންޑް އެންޑް އިވެންޓްސް ނާޔާ ޝަރީފް އެވެ. އަދި އެމްއެންޔޫއެސްޔޫގެ ފަރާތުން މިއެއްބަސްވުމުގައި ސޮއި ކުރެއްވީ އެމްއެންޔޫއެސްޔޫގެ ރައީސް އިބްރާހިމް މިޝާލް މޫސާ އެވެ.

މި މުބާރާތަކީ ދިވެހިރާއްޖޭގައި މަތީތައުލީމު ހާސިލްކުރަމުންދާ ދަރިވަރުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން، ހުނަރުވެރި ފުޓްސަލް ކުޅުންތެރިންތަކެއް ބިނާކުރުމުގެ މަގުސަދުގައި ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ޔޫނިއަންގެ ފަރާތުން އިންތިޒާމުކޮށް 2013 ވަނަ އަހަރުން ފެށިގެން ކޮންމެ އަހަރަކު ވެސް ބާއްވަމުން އަންނަ މުބާރާތެކެވެ.

ނަމަވެސް ކޮވިޑްގެ ސަބަބުން 2020 ވަނަ އަހަރު މުބާރާތް ބޭއްވިފައި ނުވާއިރު، މިދިޔަ އަހަރުގެ މުބާރާތުގެ ފިރިހެން ޑިވިޝަންގެ ޗެންޕިއަންކަން އެމްއައި ކޮލެޖް ހޯދިއިރު، އަންހެން ޑިވިޝަންގެ ޗެންޕިއަންކަން ހޯދީ މޯލްޑިވްސް ބިޒްނަސް ސްކޫލް (އެމްބީއެސް) އިންނެވެ.

މިއަހަރުގެ މުބާރާތުގައި ޖުމްލަ 25 ޓީމަކުން ބައިވެރިވެފައިވާއިރު، އޭގެ ތެރޭގައި ހިމެނެނީ ފިރިހެން 12 ޓީމާއި އަންހެން 17 ޓީމެވެ. އަދި ދެޑިވިޝަނަކަށް ބަހާލައިގެން ކުރިއަށް ގެންދާ މިމުބާރާތުގައި އަންހެން އަދި ފިރިހެން ޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ޓީމުތައް ހަތަރު ގުރޫޕަކަށް ބަހާލައިގެންނެެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ.

15 މެއި 2025 އިން 30 މެއި 2025 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ ހުޅުމާލޭ ރެހެނދި ފުޓްސަލް ދަނޑުގައެވެ. އަދި މުބާރާތް ފެށުމުގެ ގޮތުން ކުޅޭ ވިކްޓްރީ ޝީލްޑު މެޗުގައި ވާދަކުރާނީ 2023 ވަނަ އަހަރުގެ ފިރިހެން ޑިވިޝަންގެ ޗެމްޕިއަން އެމްއެންޔޫ ބިޒްނަސް ސްކޫލް(އެމްއެންޔޫ ބީއެސް) އާއި އެންމެ ފަހުގެ ޗެންޕިއަން އެމްއައި ކޮލެޖެވެ.