ރޭ ޒުވާނުން ކުރި މުޒާހަރާގައި ބަޔަކު ހައްޔަރުކުރުމާއި ގުޅިގެން ރައީސް ޑރ. މުޙައްމަދު މުޢިއްޒުގެ އަންހެން ދަރިފުޅު މީސްމީޑިއާގައި ކުރެއްވި ޕޯސްޓެއް ކަމަށް ބުނެ ފަތުރަމުންދަނީ ފޭކު ފޮޓޯއެއް ކަމަށް ރައީސްގެ އާއިލާގެ ގާނޫނީ ވަކީލް އައިޝަތު އާޒިމާ ޝަކޫރް ވިދާޅުވެއްޖެއެވެ.
ރޭގެ މުޒާހަރާގެ ތެރެއިން ހައްޔަރު ކުރީ، ނ.ކުޑަފަރި / ބަގީޗާގެ އަބްދުالله މަހްޒޫމް މާޖިދު (28އ) އާއި މ. ހަސްތީ / މާލެ، އާއިޝަތު ޝިމަން އަހްމަދު (19އ)އެވެ.
އެތަނުން އަބްދުالله މަހްޒޫމް މާޖިދު ފުލުހުންގެ ބެލުމުގެ ދަށަށް ގެނެސްފައި ވަނީ ފުލުހުންގެ ވާޖިބު އަދާކުރުމަށް ހުރަސްއަޅައި އަމުރަށް ނުކިޔަމަންތެރިވެ ފުލުހަކަށް ހަމަލާދޭން މަސައްކަތް ކުރި ކަމުގެ ތުހުމަތުގައި ކަމަށް ފުލުހުން ބުންޏެވެ.
އަދި އާއިޝަތު ޝިމަން އަހްމަދު ފުލުހުންގެ ބެލުމުގެ ދަށަށް ގެނެސްފައި ވަނީ ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސްއެޅިކަމުގެ ތުހުމަތުގައި ކަމަށެވެ.
އެކަމާއި ގުޅިގެން ރައީސް މުއިއްޒުގެ ދަރިކަނބަލުން ޔަސްމިން މުހައްމަދު މުއިއްޒު އިންސްޓަގްރާމް ސްޓޯރީގައި، މުޒާހަރާ ފުލުހުން ރޫޅާލީ ރަނގަޅަށްކަމަށް ބުނެ މުޒާހަރާއިން ހައްޔަރުކުރި ޒުވާނަކަށް މަލާމަތް ރައްދުވާ ގޮތަށް ވާހަކަތަކެއް ދެއްކާފައިވާ ފޮޓޯއެއް އަންނަނީ މީސްމީޑިއާގައި ދައުރުވަމުންނެވެ.
ހަސަން ކުރުސީ ނަމަކަށް ކިޔާ އެކައުންޓަކުން ހިއްސާކުރި އެ ފޮޓޯ އަކީ ފޭކު ފޮޓޯއެއްކަން ހާމަކުރައްވައި އާޒިމާ ޝަކޫރް އެކްސްގައި ކުރެއްވި ޕޯސްޓެއްގައި ވިދާޅުވީ އެފަދަ ދޮގު ހަބަރުތައް ނުފެތުރުމަށް ރައީސްގެ އާއިލާއިން އެދޭކަމަށް އާޒިމާ ވިދާޅުވިއެވެ.
"މިފަދަ ދޮގު މައުލޫމާތު ފެތުރުމާއި ރައްޔިތުންނަށް އޮޅުވާލުން ހުއްޓާލުމަށް އާއިލާއިން އެދޭ." އާޒިމާ ކުރެއްވި ޕޯސްޓްގައިވެއެވެ.
ރޭގ އިހްތިޖާޖު ރޫޅާލި ސަބަބު ހާމަކޮށް ފުލުހުން ނެރުނު ބަޔާނެއްގައި ބުނީ، އެ އިހްތިޖާޖުގެ ސަބަބުން އެ ސަރަހައްދުގައި ދިރިއުޅޭ ރައްޔިތުންނާއި ވިޔަފާރިތަކަށް ނޭދެވޭ އަސަރު ކުރާކަމުގެ ޝަކުވާ ކެނޑިނޭޅި ދިޔައީ ލިބެމުން ކަމަށެވެ.
މި އިހްތިޖާޖުގައި މަޖީދީމަގު ފަދަ މުހިންމު މަގެއް ދަތުރުފަތުރަށް ބަންދުކޮށް މިއުޒިކު ކުޅުމާއި ޓޭބަލް ޓެނިސް އަދި ކެރަމް ކުޅުން ފަދަ އާންމު މަސްލަހަތަށް ފުށުއަރާ ކަންތައްތަކެއް ކުރަމުން ގެންދާތީ އެކަންކަން ނުކުރުމަށް ތަކުރާރުކޮށް ނަސޭހަތްތެރިވެފައިވާނެ ކަމަށެވެ.
މީގެ އިތުރުން މާދަމާއަކީ ޖީސީއީ އޯލެވަލް އިމްތިހާނަށް ގިނަ ދަރިވަރުން ހާޒިރުވާން ޖެހޭ ދުވަހަކަށް ވާތީ އެކިރޭ މަތީން ތަކުރާރުކޮށް ނަސޭހަތްތެރިވެ ގާނޫނީ އިންޒާރު ދިނުމަށް ފަހު މިރޭގެ އިހްތިޖާޖު ރޫޅާލާފައިވާ ކަމަށް ފުލުހުން ބުންޏެވެ.
މި ފިޔަވަޅު އަޅާފައިވަނީ ދަރިވަރުންގެ ތައުލީމީ މަސްލަހަތާއި އާންމު ރައްޔިތުންގެ ދިރިއުޅުމަށް ކުރާ އަސަރުތަކަށް ރިއާޔަތް ކުރުމަށް ފަހު ކަމަށް ވެސް ފުލުހުން ބުންޏެވެ.
Advertisement
This content is created and paid for by advertisers and does not involve Voice Journalists
