ދިވެހި ސަރުކާރުން އެމްބީއެސް ގްލޯބަލް އިންވެސްޓްމަންޓާ ގުޅިގެން 8.8 ބިލިއަން ޑޮލަރުގެ އިންޓަރނޭޝަނަލް ފައިނޭޝަލް ސެންޓަރެއް ޤާއިމްކުރުމަށް ނިންމައިފިއެވެ.

އެމްބީއެސް ގްލޯބަލް އިންވެސްޓްމަންޓާ ގުޅިގެން ބައިނަލްއަޤްވާމީ ފައިނޭންސަލް ސެންޓަރެއް ޤާއިމްކުރުމަށް ނިންމައި އެކަން ހާމަކޮށްފައިވަނީ މިރޭ އެކަމަށްޓަކައި ކުރުނބާ މޯލްޑިވްސްގައި ބޭއްވި ރަސްމިއްޔާތެއްގައެވެ. މިކަމާ ގުޅޭގޮތުން މާލީ ވުޒާރާއިން ބުނީ، މިއީ މާލޭގައި ޤާއިމުކުރެވޭ، މުޅިން ދެމެހެއްޓެނިވި، މާލީ މިނިވަން ސަރަޙައްދެއް ކަމަށާއި، މި ސަރަޙައްދު ފަރުމާކުރެވިފައިވަނީ ދުނިޔޭގެ މާލީ މުއައްސަސާތަކާއި، ޑިޖިޓަލް ސިނާޢަތުގައި ހަރަކާތްތެރިވާ ފަރާތްތަކަށް އެކަށޭނަ ގޮތަކަށް ކަމަށެވެ.

ފިނޭންސުން ބުނީ މަޝްރޫޢުގެ ސަބަބުން ދިވެހިރާއްޖެއަށް ފަތުރުވެރިކަމުގެ އިތުރުން އެހެން ދާއިރާތަކަށް އިޤްތިޞާދު ފުޅާކުރުމުގެ ފުރުޞަތު ލިބިގެންދާނޭ ކަމަށެވެ. އަދި މުސްތަޤުބަލުގެ މާލީ ދާއިރާ ޤާއިމްކޮށް، ތަފާތު ބޭނުންތަކަށް ބޭނުންކުރެވޭ ސަރަޙައްދެއްގެ ޒަރީއާއިން، އިންޑިއާ ކަނޑުގެ ސަރަޙައްދުގައި އެންމެ ފާހަގަކޮށްލެވޭ މާލީ މަރުކަޒުގެ ގޮތުގައި ދިވެހިރާއްޖެ ޤާއިމުކުރެވިގެންދާނޭ ކަމަށްވެސް އެ މިނިސްޓްރީން ބުންޏެވެ.

އިންޓަރނޭޝަނަލް ފައިނޭޝަލް ސެންޓަރު އިފްތިތާހުކުރުމުގެ ތެރެއިން... ފޮޓޯ: ރައީސް އޮފީސް

މި ރަސްމިއްޔާތުގައި ވާހަކަދައްކަވަމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ، ރާއްޖޭގައި ޤާއިމްކުރެވޭ މި ފައިނޭންސް ސެންޓަރާއެކު، އެކުލަވާލެވިގެންދާނީ މާދަމާގެ ދިވެހި ރާއްޖެ ކަމަށެވެ. 

މާލީ ވަޒީރު މޫސާ ޒަމީރު ވިދާޅުވީ، މި ފައިނޭންޝަލް ސެންޓަރަކީ ވަރަށް މުހިންމު މަޝްރޫޢެއް ކަމަށާއި، މިއީ ދިވެހިންގެ އަމާޒުތަކާ އެއްގޮތަށް ފަތުރުވެރިކަމުގެ އިތުރުން އިޤްތިޞާދު ތަނަވަސްކުރުމަށް ލިބޭ ރަނގަޅު ފުރުޞަތެއް ކަމަށެވެ. މީގެ ސަބަބުން ދުނިޔޭގެ އެންމެ ރަނގަޅު ވިޔަފާރިތަކާއި އައު ޚިޔާލުތައް ގެންގުޅޭ ވިޔަފާރިވެރިން ރާއްޖެ އައުމުގެ މަގުފަހިވެގެންދާނޭކަމަށް ވަޒީރު ވިދާޅުވިއެވެ.

މާލީ ވުޒާރާއިން ބުނީ، ގިނަ ބޭނުންތަކަށް ބޭނުންކުރެވޭ ތަރައްޤީގެ މި މަޝްރޫޢު ފަރުމާކޮށްފައިވަނީ މާސްޓަރ ޕްލޭނަރ އާކިޓެކްޓް ޖިއާނީ ރަނާއުލޯއެވެ. މުޅި މާސްޓަރ ޕްލޭނުން ފެށިގެން ވަކިވަކި ޢިމާރާތްތަކާ ހަމައަށް ކޮންމެ ސްޓްރަކްޗަރެއްވެސް ފަރުމާކޮށްފައިވަނީ ދިވެހިރާއްޖޭގެ ދިރޭތަކެއްޗާއި ކަނޑުގެ ތިމާވެށީގެ ނިޒާމަށް ބިނާކޮށް ކަމަށާއި، މި މަޝްރޫޢުގެ ޖުމްލަ ބޮޑުމިނަކީ 780,000 އަކަމީޓަރު ކަމަށެވެ. މި ސަރަޙައްދުގައި 6,500 އަށްވުރެ ގިނަ މީހުންނަށް ދިރިއުޅެވޭގޮތަށް އިންތިޒާމްކޮށްފައިވާއިރު، ދުވާލެއްގެ މައްޗަށް އެ ސަރަހައްދަށް 35,000 މީހުން ޒިޔާރަތްކުރާނެ ކަމަށް ލަފާކުރެވޭކަަމަށް މާލީ ވުޒާރާއިން ބުނެއެވެ.