ނިމިދިޔަ އޭޕްރީލް މަހުގެ 18 ވީ ހުކުރު ދުވަހުގެ ފަތިހު 4:30 ހާއިރު ހ. ފެންޓެނޯއީގޭގެ ނުވަވަނަ ފްލޯއިން ޖެހިގެން ހުރި ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި، ހައްވާ ޔުމްނު ރަޝީދު (21 އަހަރު) މިހާރު ހޭ އަރާފައިވާކަމަށާއި، އޭނާގެ ޙާލު މަޑުމަޑުން ރަނގަޅުވަމުން އަންނަކަމަށް، ޢާއިލާގެ ފަރާތުން ބުނެފިއެވެ.

ޢާއިލާގެ ފަރާތުން މިކަން ހާމަކޮށްފައިވަނީ އާއިލާގެ މެންބަރަކު ކުރި އެކްސް ޕޯސްޓެއްގައެވެ.

ޔުމްނުއަށް އައިޖީއެމްއެޗުގެ އައިސީޔޫގަ ފަރުވާދިނުމަށްފަހު އިތުރު ފަރުވާއަށް މެލޭޝިއާއަށް ފޮނުވާލެވިފައިވަނީ އޭޕްރީލް މަހުގެ 26 ވަނަ ދުވަހުއެވެ.

މެލޭޝިޔާގައި ގިނަ ފަރުވާތަކަށްފަހު ޔުމްނު ހޭ އަރާފައިމިވަނީ އެ ހާދިސާ ހިނގިތާ 17 ވަނައަށްވީ ދުވަހުއެވެ. އާއިލާއިން ހާމަކޮށްފައިވާ ގޮތުގައި ޔުމްނުއަށް ކާންދިނުމަށް ބޭނުންކުރި ޓިއުބު މިހާރު ވަނީ ނަގާފައެވެ. އަދި މިހާރު އޭނާއަށް މުގުރާފައި ހުންނަ ކާނާ ދެވޭނެއެވެ.

ޔުމްނުގެ ފަރުވާއަށް ދެން އޮތް ސާޖަރީ އޮންނާނީ މިހަފްތާ ބުރާސްފަތި ދުވަހުކަމަށާއި، މި ސަރޖަރީގައި އޭނާގެ އުނަގަނޑާއި އުޅަބޮށީގައި ހުރި ކުދިކުދި ފްރެގްމަންޓްތައް ނެގުމާއި، އުނަގަނޑު ރަނގަޅަށް ހަމަ ޖެއްސުމުގެ މަސައްކަތް ކުރެވޭނެކަމަށްވެސް ފާހަގަކޮށްފައިވެއެވެ.

މީގެ ކުރިންވެސް ޔުމްނުގެ ފަރުވާގެ ތެރެއިން ގިނަ އޮޕަރޭޝަންތަކެއް ކުރެވިފައިވާއިރު އެންމެ ނާޒުކު އަދި އެންމެ ނުރައްކާތެރި ސާޖަރީ ކުރެވިފައިވަނީ މިދިޔަ އޭޕްރީލް މަހުގެ 30 ވަނަ ދުވަހުކަމަށާއި، އެ ސާޖަރީއަށް ފަސް ގަޑިއިރަށް ވުރެ ގިނައިރު ހޭދަވި ކަމަށް އާއިލާ އިން ބުނެއެވެ. މި އޮޕަރޭޝަން ކުރަން ޖެހުނީ ޔުމްނުގެ ކަރާ ދިމާލުން މައިބަދައިގެ ކަށިގަނޑުގައި ރެނދެއް ލާފައި ވާތީކަމަށްވެސް އާއިލާއިން ޙިއްޞާކޮށްފައިވެއެވެ.

މި މައްސަލައާ ގުޅިގެން ކޯޓު އަމުރެއްގެ ދަށުން މާލެ، ގ. އެރިއަދޫ، ރައުދު އަޙްމަދު ޛިލާލް (21 އަހަރު) 24 އޭޕްރިލް ވީ ބުރާސްފަތިދުވަހު ހައްޔަރުކޮށް، 5 ދުވަހު ބަންދުގައި ބެހެއްޓުމަށްފަހު، އިތުރު 10 ދުވަހަށް ބަންދުގައި ބަހައްޓަން ކްރިމިނަލް ކޯޓުންވަނީ 30 އޭޕްރީލް ވީ ބުދަ ދުވަހު އަމުރުކޮށްފައެވެ.