އިންޑިޔާއާއެކު ވެފައިވާ އެއްބަސްވުންތައް ހާމަނުކުރެވެނީ އެ އެއްބަސްވުން ތަކުގައި "ކޮންފިޑެންޝިއަލް ކްލޯޒް" ހިމަނާފައި ހުރުމުން ކަމަށް ދިފާޢީ ވަޒީރު މުހައްމަދު ޣައްސާން މައުމޫން ވިދާޅުވެއްޖެއެވެ. 

މިއަދު އޮތް ރައްޔިތުންގެ މަޖިލީހުގެ ޖަލްސާގައި ވައިކަރަދޫ ދާއިރާގެ މެމްބަރު ޙުސެއިން ޒިޔާދު ވަނީ، ދިވެހި ސަރުކާރުން އިންޑިޔާ އާއެކު ސޮއި ކޮށްފައިވާ އެއްބަސްވުންތައް މިހާތަނަށް ހާމަ ނުކޮށް އޮތީ ކޮން ސަބަބަބާ ހުރެތޯ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން އެ އެއްބަސްވުންތަކުގައި "ކޮންފިޑެންޝިއަލް ކްލޯޒް" ހިމެނޭތީ އެއްބަސްވުން ހާމަ ނުކުރެވި އޮތީ ކަމަށެވެ.

ނިމިދިޔަ އެމްޑީޕީގެ ސަރުކާރުން ދިވެހިރާއްޖޭގެ މިނިވަންކަމާއި ސިޔާދަތަށް ފުށުއަރާ ގޮތަށް އެއްބަސްވުންތަކެއް އެކުލަވާލާފައިވާކަމަށާ އެފަދަ އެއްބަސްވުންތައް ބަލައި، އޭގައި ހިމެނޭ ކަންކަން ރައްޔިތުންނަށް ހާމަކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންނެވިއެވެ.

އަދި ވެރިކަމާ ހަވާލުވުމަށްފަހު މިދިޔަ ސަރުކާރުން އެކި ޤައުމުތަކާއެކު އެކުލަވާލި އަސްކަރީ އެއްބަސްވުންތައް ބައްލަވައި އެ އެއްބަސްވުންތަކުގައި ހުރި ރާއްޖޭގެ މިނިވަންކަމާއި ސިޔާދަތަށް ގެއްލުންވާނެ މާއްދާތަކަށް ބަދަލު ގެންނަވާފައި ވާނެ ކަމަށާ އެފަދަ ކަމެއް އެ އެއްބަސްވުންތަކުގައި މިހާރު ނޯންނާނެކަމަށް ދާދިފަހުން ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވިއެވެ.

މީގެ އިތުރުން، ރައީސުލްޖުމްހޫރިއްޔާ ވިދާޅުވީ އެމަނިކުފާނު ވެވަޑައިގެންނެވި ވަޢުދާ އެއްގޮތަށް މިދިޔަ ސަރުކާރުން އެކުލަވާލި އެއްބަސްވުންތައް ހާމަކުރުމުގެ މަސައްކަތްވެސް ކުރައްވަމުން ގެންދަވާ ކަމަށާ މިހާތަނަށް އައިރު، އެއްބަސްވުންތައް ހާމަކުރެވިފައި ނުވަނީ އެ އެއްބަސްވުންތަކުގައި ކޮންފިޑެންޝިއަލިޓީ ކްލޯސްއެއް ނުވަތަ އެއްބަސްވުންތައް ހާމަނުކުރެވޭ މާއްދާއެއް ހިމަނާފައި އޮތުމުން ކަމަށާއި ޤައުމުތަކުގެ ރުހުމާ ނުލައި އެއްބަސްވުން ހާމަނުކުރެވޭނެކަމަށެވެ.

އެހެންކަމުން އެއްބަސްވުންތައް ހާމަކުރުމަށް އެ ޤައުމުތަކާ އެކު މަޝްވަރާތައް ކުރިއަށްދާކަމަށް ރައީސް ވިދާޅުވިއެވެ.