ދިވެހިރާއްޖޭގެ އެކި ކަންކޮޅުތަކުގައި ތިއްބެވި އިމާމުންނާއި ދީނީ ނަސޭހަތްތެރިންނަށް އަމާޒުކޮށްގެން ކުރިއަށްގެންދާ ޤާބިލުކަން އިތުރުކުރުމުގެ ޕްރޮގްރާމް ރަސްމީކޮށް ފަށައިފިއެވެ.
މި ޕްރޮގްރާމް ރަސްމީކޮށް ފައްޓަވައިދެއްވީ އިއްޔެ، އެކަމަށްޓަކައި ބޭއްވި ރަސްމިއްޔާތެއްގައި އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދެވެ.
މި ރަސްމިއްޔާތުގައި ބައިވެރިވެވަޑައިގަތް އެހެނިހެން އިއްޒަތްތެރިންގެ ތެރޭގައި ކުޅިވަރާބެހޭ ވަޒީރު ޢަބްދުﷲ ރާފިޢު އާއި އައި.އެމް.ސީ.ޓީ.ސީގެ ސެކްރެޓަރީ ޖެނެރަލް މޭޖަރ ޖެނެރަލް މުޙައްމަދު ބިން ސަޢީދު އަލް-މުޣައިދީ ހިމެނިވަޑައިގަންނަވައެވެ.
"އިމާމުންނާއި ދީނީ ނަސޭހަތްތެރިންގެ ޤާބިލުކަން އިތުރުކުރުން" މި ނަމުގައި ކުރިޔަށްދާ 5 ދުވަހުގެ ތަމްރީނު ޕްރޮގްރާމް ކުރިއަށްގެންދަނީ ކްރޮސްރޯޑްސް މޯލްޑިވްސްގައެވެ. މި ޕްރޮގްރާމް ކުރިއަށްގެންދަނީ، ސަޢޫދީ ޢަރަބިއްޔާގެ އިސްލާމިކް މިލިޓަރީ ކައުންޓަރ ޓެރަރިޒަމް ކޯލިޝަން (އައި.އެމް.ސީ.ޓީ.ސީ) އިން އިސްނަގައިގެން ހިންގާ "ވަސަޠާ" ގެ ދަށުންނެވެ. މަތީ ފެންވަރުގެ މި ތަމްރީނު ޕްރޮގްރާމުގައި ބައިވެރިވަނީ ހޮވާލެވިފައިވާ އިމާމުންނާއި، ދީނީ ނަސޭހަތްދެއްވާ ބޭފުޅުންނާއި، އަދި ޢިލްމުވެރިންނެވެ.
މި ޕްރޮގްރާމުގެ މަޤްޞަދަކީ ދީނީ އިސްވެރިންގެ ފިކުރީ، މުވާޞަލާތީ އަދި ޢަޤީދާގެ ހުނަރުތައް އިތުރުކުރުމުގެ ތެރެއިން ޓެރަރިޒަމްގެ އަސްލު ސަބަބުތަކާ ކުރިމަތިލުމަށް ތަޢުލީމީ ނަޒަރަކުން ބަލާ، އެ ހުނަރުތައް ތަރައްޤީކުރުންކަމަށް އިސްލާމިކް މިނިސްޓްރީން ބުނެއެވެ.
Advertisement
This content is created and paid for by advertisers and does not involve Voice Journalists
