މިއަދު ފަތިހު ޕާކިސްތާނާ ދެކޮޅަށް އިންޑިއާއިން ހިންގި އަސްކަރީ އޮޕަރޭޝަނަކީ ހިތާމަވެރި ކަމެއްކަމުގައި ޗައިނާއިން ސިފަކޮށްފިއެވެ.

ދެކުނު އޭޝިއާގެ ދެ ވާދަވެރި ޤައުމުކަމަށްވާ އިންޑިއާ އާއި ފާކިސްތާނުގެ ދެމެދުގައި އިތުރުވަމުންދާ ހަމަލާތަކާބެހޭ ގޮތުން ކުރެވުނު ސުވާލަކަށް ޖަވާބު ދެއްވަމުން، ޚާރިޖިއްޔާ ވުޒާރާގެ ތަރުޖަމާނު ވިދާޅުވީ މިހާރު ކުރިމަތިވެފައިވާ ހާލަތާމެދު  ޗައިނާއިން ކަންބޮޑުވާ ކަމަށެވެ.

އަދި ދެ ޤައުމަށްވެސް ގޮވާލާފައިވަނީ ހަމަޖެހުން ދަމަހައްޓައި، ކެތްތެރިކަން އިސްކޮށް، ހާލަތު އިތުރަށް އުނދަގޫވެދާނެ ފަދަ ޢަމަލުތަކުން ދުރުހެލިވުމަށްވެސް ގޮވާލާފައިވެއެވެ.

އިންޑިއާ އާއި ޕާކިސްތާނަކީ އަބަދުވެސް އެއްޤައުމު އަނެއް ޤައުމުގެ އަވައްޓެރިންކަމަށާއި، އަދި އެ ދެ ޤައުމަކީވެސް ޗައިނާގެ އަވައްޓެރިންކަމަށް ތަރުޖަމާނު ވިދާޅުވިއެވެ. އަދި ޗައިނާއިން ހުރިހާ ބާވަތެއްގެ ޓެރަރިޒަމަކަށްވެސް ދެކޮޅުހަދާކަން ފާހަގަކުރެއްވާފައިވެއެވެ.

މި ދެޤައުމު ދެމެދުގައި ހަމަނުޖެހުން އުފެދިގެން އައީ ކަޝްމީރުގެ އިންޑިއާ ކޮންޓްރޯލް އޮންނަ ސަރަހައްދުގައި ބަޑިން ހަމަލާދީ 26 މީހަކު މަރާލި ހާދިސާއަށް ފަހުގަ އެވެ. އޭޕްރީލް 22، ގައި ދިން ހަމަލާގެ ޒިންމާ އިންޑިއާއިން އަޅުވަނީ ޕާކިސްތާނުގެ ބޮލުގަ އެވެ. ޕާކިސްތާނުން އެ ތުހުމަތުތައް ދޮގުކުރެ އެވެ.

އިންޑިއާގެ ހަނގުރާމަ ވެރި މަތިންދާބޯޓުތަކުން ކުރިންވެސް ވަނީ ދެ ޤައުމުގެ ދެމެދުގައި ހަމަނުޖެހުން އިތުރުވަމުން އައި ދުވަސްވަރު ޕާކިސްތާނުގެ ސަރަޙައްދުތަކަށް ބޮން އަޅާފައެވެ.

ނަމަވެސް ބުދަ ދުވަހު ހިންގި މި އޮޕަރޭޝަނަކީ 1971 ވަނަ އަހަރު އިންޑިއާ-ޕާކިސްތާން ހަނގުރާމައިގެ ފަހުން، އިންޑިއާއިން އެ ޤައުމުގެ އަވައްޓެރި ޤައުމުގެ އެންމެ އެތެރެއަށް ވަދެ ހިންގި އެންމެ ފުން ހަމަލާކަމަށް ސީއެންއެންގެ ރިޕޯޓްތަކުގައި ފާހަގަކޮށްފައިވެއެވެ.