ދުނިޔޭގެ އެކި ކަންކޮޅުތަކުގައި ތިބި މީހުން ގުޅުވައިދިނުމުގައި 22 އަހަރު ހޭދަކުރުމަށްފަހު، 5 މެއި 2025 ގައި ސްކައިޕް އުވާލުމަށް މައިކްރޯސޮފްޓުން ނިންމާފައިވެއެވެ. މިއީ އިންޓަރނެޓް މުވާސަލާތުގެ ދާއިރާގައި އެންމެ ކުރީ ސަފުގައި ހިމެނޭ އެއް ޚިދުމަތުގެ މެދުވެރިޔާ ނިމުމަކަށް އައުމެވެ.

2003 ވަނަ އަހަރު ތަޢާރަފުކުރެވުނު ސްކައިޕްއަކީ އިންޓަރނެޓް މެދުވެރިކޮށް ހިލޭ އަޑާއި ވީޑިއޯ ކޯލް ކުރުމަށް އައި އިންޤިލާބީ ވަސީލަތަކަށް ވެގެން ދިޔައެވެ. 2010 ގެ މެދުތެރޭގައި މަހަކު 300 މިލިއަނަށްވުރެ ގިނަ ބޭނުންކުރާ ސްކައިޕް ވެގެންދިޔައީ އެވަގުތު އެންމެ ގިނަބައެއްގެ މުވާސަލާތީ މެދުވެރިއަކަށެވެ.

ސްކައިޕް އުފެއްދީ 2003 ވަނަ އަހަރު އެސްޓޯނިއާގެ ވެރިރަށް ޓެލިންގައި އުޅޭ އިންޖިނިއަރުންގެ ގްރޫޕަކުންނެވެ. އެ ޚިދުމަތް ބިނާވެފައިވަނީ ވީއޯއައިޕީ (ވޮއިސް އޯވަރ އިންޓަރނެޓް ޕްރޮޓޮކޯލް) ޓެކްނޮލޮޖީގެ މައްޗަށެވެ. މިއީ އަޑު ޑިޖިޓަލް ސިގްނަލަކަށް ބަދަލުކޮށް އިންޓަރނެޓް މެދުވެރިކޮށް ފޮނުވާ ޓެކްނޮލޮޖީއެކެވެ. 2005 ވަނަ އަހަރު އޮންލައިން ވިޔަފާރި ކުންފުނި އީބޭއިން ސްކައިޕް ގަތުމަށްފަހު ވީޑިއޯ ކޯލްގެ ޚިދުމަތް އިތުރުކުރިއެވެ.

Advertisement

ނަމަވެސް، އިތުރުވަމުން އައި ޑިމާންޑާއެކު، މައިކްރޯސޮފްޓުން 2011 ވަނަ އަހަރު 8.5 ބިލިއަން ޑޮލަރަށް ސްކައިޕް ގަތެވެ. އެ ވިޔަފާރި އެއްކުރުމަށް ރޭވިފައިވާކަން އިޢުލާނުކުރި ޙަފްލާއެއްގައި އޭރުގެ މައިކްރޯސޮފްޓްގެ ސީއީއޯ ސްޓީވް ބޯލްމަރ ވިދާޅުވި ގޮތުގައި 2011 ވަނަ އަހަރު ދުނިޔޭގައި ސްކައިޕް ބޭނުންކުރާ 170 މިލިއަން މީހުން ތިބިއެވެ.

ސްކައިޕް ބަންދުކުރުމަށް ނިންމި ނިންމުމަކީ މައިކްރޯސޮފްޓުން ޓީމްސްއަށް އިސްކަންދިނުމަށާއި އެ ކުންފުނީގެ މައިގަނޑު މުވާސަލާތީ އެޕްލިކޭޝަން ވާދަވެރިންނާ ވާދަކުރެވޭ ގޮތަށް ހަރުދަނާކުރުމަށް ގެންގުޅޭ ސްޓްރެޓެޖީގެ ތެރެއިން ނިންމި ނިންމުމެއްކަމަށް ގިނަ މާހިރުން ޤަބޫލުކުރެއެވެ.