ރައީސުލްޖުމްހޫރިއްޔާ، ސިފައިންގެ އެންމެމަތީ ވެރިޔާ ޑރ. މުޙައްމަދު މުޢިއްޒު، ގައުމީ ޚާއްޞަ މަސައްކަތެއްގެ ގޮތުގައި ސިފައިންނާ ހަވާލުކުރައްވައިގެން ތެލެސީމިއާ ސެންޓަރު ހުޅުމާލޭ އޮރެންޖްހިޔާއަށް ބަދަލުކުރުމަށް ފެށި މަސައްކަތް ނިންމައި، މިއަދު މިނިސްޓްރީ އޮފް ހެލްތާ ހަވާލުކޮށްފިއެވެ.

މިކަން ހާމަކުރައްވާފައިވަނީ، އެމްއެންޑީއެފް ސޯޝަލް މީޑިއާގައި ކުރެއްވި ޕޯސްޓެއްގައެވެ.  

ތެލަސީމިއާ ސެންޓަރ އޮރެންޖް ހިޔާއަށް ބަދަލުކުރެއްވުމަށް ސަރުކާރުން ނިންމީ ދާދި ފަހުން ތެލަސީމިއާ ސެންޓަރުގައި ހިނގައިދިޔަ ކަންކަމަށް ބައްލަވާ، އެތަނުގެ ޙާލަތު ބެއްލެވުމަށްފަހު ކަންކަން ރަނގަޅުކުރުމަށް އެޅުއްވި މުހިންމު ފިޔަވަޅުތަކުގެ ތެރެއިން ފިޔަވަޅެއްގެ ގޮތުގައެވެ.

މީގެ އިތުރުން، ތެލަސީމިއާ ޕޭޝަންޓާއި އެހީތެރިޔާއަށް ހިލޭ އެމްޓީސީސީ ބަހުގައި ދަތުރުކުރެވޭނެ ގޮތް ހަމަޖައްސައި ދެއްވާނެކަމުގެ ޔަގީންކަންވެސް މީގެކުރިން ރައީސުލްޖުމްހޫރިއްޔާ ޑރ.މުހައްމަދު މުއިއްޒުވަނީ ދެއްވާފައެވެ. ރައީސް މިފަދައިން ވިދާޅުވެފައި ވަނީ "ރައްޔިތުންނާއެކު" މި ނަމުގައި އެމަނިކުފާނު ކުރިޔަށްގެންދަވާ ޕޮޑްކާސްޓްގެ ފުރަތަމަ އެޕިސޯޑްގައި ވާހަކަފުޅު ދައްކަވަމުންނެވެ.

"އެތަނުގެ ހިދުމަތް ހޯދަން ހަމަ ވަރަށް ގިނަ މާލޭގައި ތިބި ތެލެސީމިއާ ކުދިން ވެސް ދާނެ. އަޅުގަނޑު މި ކަނޑައެޅީ، އެމްޓީސީސީގައި މި އޮންނަ ބަސް ސާވިސްގެ ތެރެއިން އެތަނަށް ހާއްސަ  ބަސް ސްޓޮޕެއް ކަނޑައަޅަން، އެތަނަށް މަޑުކުރާ ގޮތަށް.  އެތަން ހުޅުވެން ވާއިރަށް، އޮރެންޖް ހިޔާ  ހުޅުވެން ވާއިރަށް ހުންނާނީ ހަމަޖެހިފައި" - ރައީސުލްޖުމްހޫރިއްޔާ ޑރ.މުހައްމަދު މުއިއްޒު

އަދި، ސެންޓަރުގައި މަސައްކަތް ކުރަމުންދާ ނަރުހުންގެ އަދަދު މަދުވުމުން، އެ ދަތިކަން ޙައްލުކުރެއްވުމަށްވެސް ރައީސް ވަނީ އަވަސް ފިޔަވަޅުތަކެއް އަޅުއްވާފައެވެ. އެތަނުގެ ހާލަތު ރަނގަޅު ކުރުމަށް ގިނަ މަސައްކަތް ކުރެވެމުން ދާއިރު، އެ މަސައްކަތްތަށް އެމަނިކުފާނު ވަރަށް ގާތުން ބައްލަވަމުންދާކަމީ، މިކަމަށް އެމަނިކުފާނު ދެއްވާ އަޙައްމިއްޔަތު ކަމުގެ އަލިގަދަ ޙެއްކެކެވެ.

ދުނިޔޭގެ ތެލަސީމިއާދުވަސް މިއަދު ފާހަގަކުރަމުންދާއިރު، މިކަން ވެގެންދަނީ، ގިނަ ޢާއިލާތަކަކަށް ވަރަށް އުފާވެރި ޚަބަރަކަށެވެ.