ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަނުން ފޯރުކޮށްދެމުން އަންނަ ކުށުގެ ރެކޯޑާއި ދަރަނީގެ ރެކޯޑް ސާފުކޮށްދިނުމުގެ ޚިދުމަތް އީފާސް މެދުވެރިކޮށް ހުށަހެޅޭގޮތަށް ހަމަޖައްސައިފިއެވެ.

ޑީޖޭއޭއިން ބުނީ ރައްޔިތުންނަށް ފަސޭހަކުރުމަށްޓަކައި، މިހިނގާ މެއިމަހުގެ 15 ވާ ބުރާސްފަތި ދުވަހުން ފެށިގެން، އެ ޑިޕާޓްމަންޓުގެ ޕަބްލިކް ޕޯޓަލް ކަމަށްވާ records.judiciary.gov.mv އިން އީފާސް މެދުވެރިކޮށް މި ޚިދުމަތް ފޯރުކޮށްދޭގޮތަށް ނިންމާފައިވާކަމަށެވެ. ގެޒެޓްގައި އާއްމުކޮށްފައިވާ ބަޔާނުގައި ޑީޖޭއިން ބުނެފައިވަނީ، ކުށާއި ދަރަނީގެ ރެކޯޑް ސާފުކުރުމަށް މިހާރު ބޭނުންކުރާ ފޯމު މެދުވެރިކޮށް  ވަކިވަކި ފަރުދުން ހުށަހަޅާ ހުށަހެޅުންތައް އަންނަ ޖޫންމަހުގެ 1 ވަނަ ދުވަހުގެ ފަހުން ބަލައި ނުގަންނާނެ ކަމަށެވެ.

އެހެންނަމަވެސް، ދައުލަތުގެ އޮފީސްތަކުން ރެކޯޑް ސާފުކުރުމަށް އެދި ހުށަހަޅާ ލިސްޓުތަކާއި ކުންފުނިތަކުން ރެކޯޑް ސާފުކުރުމަށް ހުށަހަޅާ ފޯމުތައް ބަލައިގަންނާނީ، ކުރިއެކޭވެސް އެއްގޮތަށް، އެ އޮފީހެއް ނުވަތަ ކުންފުންޏެއްގެ ސިޓީއަކާއެކު ރެކޯޑް ސާފުކުރުމަށް އެދި ހުށަހެޅުމުންނެވެ.

އީ-ފާސް އުފެއްދީ އީ-ގަވަރމަންޓް ޚިދުމަތްތައް ފޯރުކޮށްދޭ ވެބް ޕޯޓަލްތަކުގައި ބޭނުންކުރާނެ އޮތެންޓިކޭޝަން (ހުއްދަ ދިނުމުގެ) ވަސީލަތެއްގެ ގޮތުގަ 2012 އަހަރުގައިއެވެ. ސަރުކާރުން ރައްޔިތުންނަށް ޚިދުމަތްތައް ފޯރުކޮށްދިނުމަށް 40 އަށްވުރެ ގިނަ ވެބް ޕޯޓަލްތައް ވަނީ ޤާއިމްކޮށްފައެވެ