ތެލަސީމިއާ ސެންޓަރާއި މޯލްޑިވިއަން ބްލަޑް ސާރވިސް، ދިހަ ދުވަހުގެ ތެރޭގައި މާލޭ ގްރޫޕް އޮފް ހޮސްޕިޓަލްގެ ދަށުން ހިންގަން ފަށްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރައްޔިތުންގެ އަޑު ނަމުގައި ކުރިއަށްގެންދާ ޕޮޑުކާސްޓުގެ ފަސްވަނަ އެޕިސޯޑުގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ މީގެ ދުވަސްކޮޅެއް ކުރިން ތެލަސީމިއާ ސެންޓަރަށް ދިމާވެފައިވާ ދަތިތަކަށް ޙައްލެއް ހޯދައިދިނުމުގެ  މަސައްކަތް ފެށިގެން ދިޔަކަމަށާއި، އެގޮތުން މިއަދާއި ހަމައަށް ވަރަށް ބޮޑެތި ކުރިއެރުންތަކެއް ލިބިފައިވާކަމަށެވެ. އެގޮތުން ކުރެވުނު މަސައްކަތްތަކުގެ ތެރެއިން ތެލަސީމިއާ ސެންޓަރ މާލޭގައި ހިންގަމުން ދިޔަ ތަން، ހުޅުމާލޭގައި ހުންނަ އޮރެންޖް ހިޔާ އިމާރާތަކަށް ބަދަލުކުރެވިގެން ދިޔަކަމަށް ރައީސް ވިދާޅުވިއެވެ. އެ ތަނަކީ ވަރަށް ޖާގައިގެ ގޮތުން ތަނަވަސް، ވަޞީލަތްތައް ރަނގަޅު ތަނެއްކަމަށް ރައީސް ފާހަގަ ކުރެއްވިއެވެ. އަދި މިތަން ތައްޔާރުކުރެވިގެން މިދިޔައީ ދިވެހި ސިފައިން ރެއާއި ދުވާލު ކުރެއްވި ބުރަ މަސައްކަތުން ކަމަށް ފާހަގަ ކުރައްވާ، ސިފައިންނަށް ޚާއްސަ ޝުކުރެއް އެމަނިކުފާނު ވަނީ އަދާކުރައްވާފައެވެ.

Advertisement

ތެލަސީމިއާ ސެންޓަރަށް ކުރިމަތިވެފައިއޮތް މުވައްޒަފުންގެ ދަތިކަމާއި، ބޭނުންވާ ތަކެތި ހޯދުމުގެ މައްސަލަ ޙައްލުކުރުމަށްވެސް މާލީ ވުޒާރާއަށް އަންގާފައިވާނެކަމަށްވެސް އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މިހާރު ކުރިއަށްދަނީ ތެލެސީމިއާ ސެންޓަރު ހިންގާގޮތައް ބަދަލުތައް ގެނެވި، ހޮސްޕިޓަލެއްގެ ގޮތުގައި ހިންގުމަށް ބޭނުންވާ ކަންކަން ފުރިހަމަކުރުމުގެ މަރުހަލާކަމަށެވެ. އެގޮތުން ދާދި އަވަހަށް މޯލްޑިވިއަން ބްލަޑް ސަރވިސަސްއާއި ތެލަސީމިއާ ސެންޓަރު، މާލޭ ގްރޫޕް އޮފް ހޮސްޕިޓަލްގެ ދަށައް ބަދަލުކުރެވޭނެކަމަށާއި، މިހާރު އެކަމުގެ މަސައްކަތްތައް ކުރިއަށްދާކަމަށެވެ. އެއާއެކު ތެލެސީމިއާ ކުދިން ސްޕެޝަލިސްޓް ޑޮކްޓަރަށް ދެއްކުމުގެ އިތުރަށް، އެހެނިހެން އިތުރު ފައިދާތަކެއް ލިބިގެންދާންކަންވެސް ރައީސް ވިދާޅުވިއެވެ.