މިދިޔަ އޭޕްރިލްމަހުގެ 18 ވަނަ ދުވަހު ހެންވޭރު ގުދަނެއްގެ މައްޗަށް ހައްވާ ޔުމްނު ރަޝީދު ވެއްޓުނު މައްސަލާގައި ތުހުމަތުކުރެވޭ އަހުމަދު ރައުދު ޛިލާލާ، އެ މައްސަލަ ބަލާ ކޮމިޝަނުން ފުރަތަމަ ފަހަރަށް ސުވާލުކޮށްފިއެވެ.

ޔުމްނު ވެއްޓުނު މައްސަލަ ބެލުމަށް ރައީސުލްޖުމްހޫރިއްޔާ ހައްދަވާފައިވާ ރިޔާސީ ކޮމިޝަނުން މިއަދު ވަނީ، ރައުދު އާ ބައްދަލުކޮށް ސުވާލުކޮށްފައެވެ. ނަމަވެސް މިކަމާ ބެހޭ އިތުރު މައުލޫމާތެއް ކޮމިޝަނަކުން އަދި ނުބުނެއެވެ. ޔުމްނު ވެއްޓުނު މައްސަލައިގެ ތުހުމަތުގައި ރައުދު އަދިވެސް ހުރީ ފުލުހުންގެ ބަންދުގައެވެ. އެ މައްސަލާގައި ރައުދު ހައްޔަރުކުރީ މިދިޔަ މަހުގެ 24 ވަނަ ދުވަހުއެވެ. 

ޔުމްނު ވެއްޓުނު މައްސަލާގައި ރިޔާސީ ކޮމިޝަނެއް އެކުލަވާލާފައިވަނީ، އޭޕްރިލްމަހުގެ 27 ވަނަ ދުވަހުއެވެ. މި ކޮމިޝަނުގެ ރައީސްއަކީ ކުރީގެ ބަންޑާރަނައިބު ޑރ.މުހައްމަދު މުނައްވަރެވެ. ޔުމްނު ވެއްޓުނު މައްސަލާގައި ހިމެނޭ ބައެއް ފަރާތްތަކާ ސުވާލު ކުރަމުންގެންދާކަމަށް އިއްޔެ އެ ކޮމިޝަނުން ވަނީ ބުނެފައެވެ. އެގޮތުން ޔުމްނު ވެއްޓުނު މައްސަލައާ ގުޅުންހުރި ތަންތަނަށް ގޮސް ބައެއް މީހުންނާ ސުވާލުކުރަން ވަނީ ފަށާފައެވެ. 

ޔުމްނު ވެއްޓުނު މައްސަލާގައި ހިމެނޭ ރައުދު އަހްމަދު ޛިލާލް

ޔުމްނު ވެއްޓުނު މައްސަލަ އާއި ގުޅިގެން އުފެއްދި ކޮމިޝަނުން މިހާރު ވަނީ، ޔުމްނު ވެއްޓުނު ހާދިސާއާ ގުޅޭގޮތުން، މަޢުލޫމާތާއި، ފޮޓޯ/ވީޑިއޯ ނުވަތަ އެނޫންވެސް ލިޔުންތައް އެ ކޮމިޝަނާ ޙިއްސާކުރުމަށާ، އެ ކޮމިޝަނުގެ މަސައްކަތާ ގުޅޭގޮތުން ސުވާލު ކުރަން ޚާއްސަ ޕޯޓަލެއް ޤާއިމް ކޮށްފައެވެ.

ޔުމްނު ވެއްޓުނު ހާދިސާއާ ގުޅިގެން ފުލުހުން އެންމެ ފަހުން ހާމަކުރި މައުލޫމާތުގައި ބުނެފައިވަނީ، އޭނާގެ ސިއްހީ ހާލަތު ހުރި ގޮތުންނާއި އިތުރު އެކި ސަބަބުތަކާހުރެ، ސުވާލުކުރުމުގެ ފުރުސަތު މިހާތަނަށް ނުލިބޭ ކަން ހާމަކޮށްފައެވެ. އަދި އެކަން މަގުފަހިވިހާ އަވަހަކަށް ތަހުގީގުން އަންހެން މީހާއާ ސުވާލުކުރަން ބޭނުންވާ ކަމަށް ބުނެފައިވެއެވެ.