ކޮރަޕްޝަންގެ ތުހުމަތުކޮށް މޯލްޑިވްސް އިމިގްރޭޝަންގެ ކޮންޓްރޯލަރުކަމުން ވަކިކުރި މުހައްމަދު ޝަމްއާން ވަހީދުގެ މައްޗަށް ހިންގާ ތަހުގީގު ހިންގާ ދައުވާކޮށްދޭން އެދި ޕީޖީ އޮފީހަށް ފޮނުވާފައިވާ ކަމަށް ދިވެހި ފުލުހުންގެ ޚިދުމަތުން ބުނެފި އެވެ. 

ފުލުހުން އެކަން ހާމަކުރީ މިއަދު ބޭއްވި ނޫސްވެރީންގެ ބައްދަލްވުމުގަ އެވެ. ފުލުހުން ބުނީ ޝަމްއާންގެ މައްޗަށް ހިންގި ތަހުގީގު ނިންމާ މި މަހުގެ 11 ވަނަ ދުވަހު އެ މައްސަލަ ޕީޖީ އޮފީހަށް ފޮނުވާފައިވާ ކަމަށެވެ. ޝަމްއާންގެ އިތުރުން އިމިގްރޭޝަންގެ އިތުރު ހަތަރު އޮފިސަރަކު ވެސް ހައްޔަރު ކުރި އެވެ. އެ މީހުންގެ މައްޗަށް ވެސް ދައުވާ ކޮށްދޭން ވަނީ އެދިފަ އެވެ.

ފުލުހުން މިއަދުގެ ނޫސްވެރީންގެ ބައްދަލްވުމުގައި ވެސް ދެން ހިއްސާކޮށްފައި ވަނީ ޝަމްއާން ހައްޔަރު ކުރުމުގެ ކުރީން ހިންގި އޮޕަރޭޝަނާއި ގުޅޭ މައުލޫމާތެވެ.

Advertisement

ބިދޭސީން އަތުން ނާޖައިޒު މަންފާ ހޯދުމުގެ ތުހުމަތުގައި ޝަމްއާން ހައްޔަރު ކުރީގެ މާޗް މަހުގެ 21 ވަނަ ދުވަހުގެ ރޭގެ ވަގުތެއްގަ އެވެ. ފުލުހުން ބުނީ މާޗް މަހުގެ 12 ވަނަ ދުވަހު އިމިގްރޭޝަންގެ މުވައްޒިފުން މާފަންނުގައި ހުރި ގެއެއްގައި ދިރިއުޅޭ ބިދޭސީ މަސައްކަތްތެރީންނަށް އަމާޒު ކޮށްގެން އޮޕަރޭޝަނެއް ހިންގާފައިވާ ކަމަށާ އޮޕަރޭޝަން ހިންގީ ޝަމްއާން ވަހީދަށް އެނގިގެން ކަމަށެވެ.

ނަމަވެސް އެ އޮޕަރޭޝަން ހިންގީ އެފަދަ އޮޕަރޭޝަނަކަށް ބޭނުންވާ ލިޔެކިޔުންތައް ވެސް ފުރިހަމަ ނުކޮށް އިމިގްރޭޝަނުން އަމަލު ކުރަމުންދާ އުސޫލާ ހިލާފަށް ކަމަށާ ފުރަތަމަ އެ ގެއަށް ދިޔައީ އޮޕަރޭޝަންތައް ހިންގުމުގެ ވަޒީފާގެ މަސްއޫލިއްޔަތު ނެތް ތިން މުވައްޒިން ކަމަށެވެ. އަދި އެއީ ކޮންޓްރޯލާ ޖެނެރަލްގެ ބިއުރޯގައި އަދި ބިއުރޯގެ ދަށުން ހިންގާ ޕްލޭނިން އަދި މީޑިއާގައި މަސައްކަތް ކުރާ ތިން މުވައްޒިފުން ކަމަށެވެ.

އެ އޮޕަރޭޝަންގައި ހަތް ބިދޭސީއަކު ފާސްކޮށް އެ މީހުންގެ ތެރެއިން އެކަކު އަތުން ގިނަ އަދަދެއްގެ ފައިސާ ފެނުނު ކަމަށާ އެ މީހާ މާޗް 13 ވަނަ ދުވަހު މ. ސްޓާ ކްލައުޑްގައި ހިންގާ އިމިގްރޭޝަންގެ އޮފީހަށް ގެންގޮސް އެ މީހާ ދޫކޮށްލީ ޝަމްއާންގެ އިރުޝާދުގެ ދަށުން "އާޖެންޓް" ކަމެއްގެ ގޮތުގައި އަމަލު ކުރަން އަންގައިގެން ކަމަށް ތަހުގީގަށް އެނގިފައިވާ ކަމަށެވެ.

އަދި އޭނާގެ އަތުން ފެނުނު ފައިސާ ކޮތަޅަކަށް އަޅާ އަނބުރާ ހަވާލުކުރި ކަމަށާ އޭގެ ފަހުން އިމިގްރޭޝަންގެ މުވައްޒިފުން ސައިކަލެއްގައި ވެލާނާ ބިލްޑިން ކައިރިއަށް ގޮސް އިމިގްރޭޝަންގެ ވެހިކަލަކުން ފައިސާ އެޅި ކޮތަޅު ނަގާ ޝަމްއާންގެ ގެއަށް ގެންގޮސްފައިވާ ކަމަށް ވެސް ފުލުހުން ވަނީ ބުނެފަ އެވެ.