ގުޅީ ބިންހިއްކުމުގެ 95 އިންސައްތަ ނިމިފައިވާކަމަށް އެ މަޝްރޫޢުގެ މަސައްކަތް ކުރިއަށްގެންދާ އެމްޓީސީސީން ބުނެފިއެވެ.

އެމްޓީސީސީން ގުޅީގެ ބިން ހިއްކަން ފަށާފައިވަނީ މިދިޔަ އޭޕްރިލްމަހުގެ 4 ވަނަ ދުވަހުއެވެ. މިފަހަރު ކަނޑައަޅާފައިވަނީ ގުޅީފަޅުން 10.15 ހެކްޓަރު ހިއްކާށެވެ. އެމްޓީސީސީން މިރޭ އެކްސްގައި ކުރި ޕޯސްޓެއްގައި ބުނެފައިވަނީ، ހަލުވި ސްޕީޑެއްގައި ކުރިއަށްގޮސް އެރަށު ބިން ހިއްކުމުގެ 95 އިންސައްތަ ނިމިފައިވާކަމަށެވެ.

ގުޅީގެ ބިން ހިއްކުމަކީ މި ސަރުކާރުގެ ވައުދެކެވެ. ސަރުކާރުން ވަނީ، ގުޅީގެ ބިން ހިއްކުމަށް 89.6 މިލިއަން ރުފިޔާ ހަރަދުކުރުމަށް ނިންމާފައެވެ. ގުޅީގެ ބިން ހިއްކުމަކީ އެރަށުގެ ރައްޔިތުން ވަރަށް އެދިއެދިތިބި ކަމެކެވެ. އެރަށުން ގޯތި ދޭނޭ ބިން ހުސްވެފައިވާއިރު، ރަށުފަޅުން އިތުރު 10.15 ހެކްޓަރު ހިއްކިގެން ދިއުމަކީ ރަށުގެ ރައްޔިތުންނަށް ލިބިގެންދާނޭ ވަރަށްބޮޑު ހިތްހަމަ ޖެހުމެއްކަމަށް ސަރުކާރުން ބުނެއެވެ.

Advertisement

ސަރުކާރުން ބުނީ އަލަށް ހިއްކި ސަރަހައްދުގައި ގޯތި ބޯހިޔާވަހިކަމަށް ބިން ހާއްސަ ކުރުމުގެ އިތުރުން ވިޔަފާރިއާ އިގްތިސާދީ މަސައްކަތްތަކަށްވެސް ބިން އެކަށައެޅިގެންދާނޭ ކަމަށެވެ.

އެމްޓީސީސީގެ ސީއީއޯ ރިޓަޔަޑް އަހުމަދު ސަޢުދީ ވިދާޅުވީ ގުޅީގެ ރައްޔިތުން އެދުނުގޮތަށް ބާރު ސްޕީޑެއްގައި މަސައްކަތް ނިންމާލެވޭއިރު، ކުރިއަށް މިއޮތް ހަފްތާއެއްހާ ދުވަހުގެ ތެރޭގައި ބާކީ އޮތްބައި ހިއްކާ ނިންމާލެވޭނެ ކަމަށެވެ. ބިން ހިއްކާ ނިމުމާއެކު އަތިރިމަތި ހިމާޔަތްކުރުމުގެ މަސައްކަތް ފެށިގެންދާނޭކަމަށްވެސް އޭނާ ވިދާޅުވިއެވެ. އަތިރިމަތި ހިމާޔަތްކުރުމަށް 22 ހާސް ޓަނުގެ ހިލަ ބޭނުންވާއިރު އޭގެ ތެރެއިން 10ހާސް ޓަނުގެ ހިލަ މިހާރުވަނީ އެރަށަށް ގެނެސްފައެވެ. 

ގުޅީގެ ބިން ހިއްކައި ނިމުމުން މިހާރު އެރަށުގެ ބިމުގެ ސައިޒް ދެ ގުނައަށް ބޮޑުވާނެއެވެ. ގުޅީގެ ބިންހިއްކުމުގެ މި މަޝްރޫޢު އެއްކޮށް ނިންމާލުމަށް ދީފައިވާ މުއްދަތަކީ އަންނަ އަހަރުގެ ސެޕްޓެމްބަރުމަހެވެ. ނަމަވެސް މިއަހަރުގެ ސެޕްޓެމްބަރުގެ ތެރޭގައި އެ މަސައްކަތް މުޅިން ނިންމާލެވޭނޭކަމަށް އެމްޓީސީސީން ބުނެއެވެ.