އެމެރިކާގެ ރައީސް ޑޮނަލްޑް ޓްރަމްޕް އާއި ސީރިއާގެ އައު ރައީސް އަހްމަދް އަލް-ޝަރާ އާ ދެމެދު ތާރީޚީ ބައްދަލުވުމެއް ބާއްވައިފިއެވެ. މި ބައްދަލުވުން ބާއްވާފައިވަނީ ޓްރަމްޕްގެ މެދުއިރުމައްޗަށް ކުރަމުންދާ ދަތުރުގެ ތެރެއިން ސައުދީ އަރަބިއްޔާގައެވެ.

މިއީ ފާއިތުވި 25 އަހަރު ތެރޭގައި ސީރިއާގެ ރައީސަކާއި އެމެރިކާގެ ރައީސަކު ބައްދަލުކުރި ފުރަތަމަ ފަހަރު ކަމަށްވާއިރު މި ބައްދަލުވުމާއެކު ގިނަ ބައެއް އަންނަނީ އެކިއެކި ޝުޢޫރުތައް ފާޅުކުރަމުންނެވެ. ސަބަބެއް ނެތިއެއްވެސް ނޫނެވެ. 

ނިމިދިޔަ އަހަރުގެ ޑިސެންބަރު މަހާ ހަމައަށް، އެމެރިކާއިން ވަނީ އަލް-ޝަރާ އަކީ ޓެރަރިސްޓެއް ކަމަށް ލޭބަލްކޮށް އޭނާ ހައްޔަރުކުރާ މީހަކަށް 10 މިލިއަން ޑޮލަރުގެ އިނާމެއް ހުށަހަޅާފައެވެ.

އަދި އެމެރިކާއިން އޮތީ އަލް-ޝަރާ އެ ގުރޫޕަކަށް ނިސްބަތްވެވަޑައިގަންނަވާ ޙަޔާތު ތަޙްރީރު އައް-ޝާމް (އެޗްޓީއެސް)، އެއީ "ބޭރުގެ ޓެރަރިސްޓް ޖަމާޢަތެއް" ގެ ގޮތުގައި ލިސްޓުކޮށްފައެވެ. އެއީ އެ ޖަމާޢަތާ އަލް-ޤާޢިދާއާ އޮތް ގުޅުމުގެ ސަބަބުން ކަމަށް އެމެރިކާއިން އޭރު ބުނެފައިވެއެވެ. 

ނަމަވެސް އެޗްޓީއެސް އިސްވެ އެކުލަވާލި ކޯލިޝަނަކުން ޑިސެންބަރު މަހު ސީރިއާގެ ރައީސް ބަޝާރު އަލް-އަސަދުގެ ސަރުކާރު ވައްޓާލުމާ ގުޅިގެން، އެމެރިކާއިން މިހާރު މަސައްކަތް ކުރަމުންދަނީ އެ ޖަމާޢަތާއި ޖަމާޢަތުގެ ލީޑަރޝިޕާ އެކުގައި އޮތް ގުޅުން އަލުން ވަޒަންކޮށް ގުޅުން ބަދަހިކުރަން މަސައްކަތް ކުރަމުންނެވެ.

އެމެރިކާއިން މިކުރަމުންދާ މަސައްކަތުގެ ފަހަތުގައި ފޮރުވިފައިވާ އެޖެންޑާ އަދި ހާމަ ނުވި ނަމަވެސް، އިއްޔެ ސަޢުދީ ޢަރަބިއްޔާގައި ބޭއްވުނު ބައްދަލުވުމުގެ ތެރެއިން ދެކެވުނު ބައެއް ވާހަކަތަކުގައި، ޓްރަމްޕް ވަނީ ސީރިޔާއިން ”ފަލަސްޠީނުގެ ޓެރަރިސްޓުން“ ނެރެ، އިސްރާއިލާއެކު ރަނގަޅު ގުޅުމެއް ބޭއްވުމަށް ހުށަހަޅާފައެވެ. 

އިއްޔެ ސައުދީގައި ސީރިޔާގެ ރައީސް އާއި ޓްރަމްޕްގެ މި ބައްދަލުވުމުގައި ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ވެސް ބައިވެރިވެ ވަޑައިގަތެވެ. އަދި ތުރުކީގެ ރައީސް ރަޖަބް ޠައްޔިބް އުރުދުޣާންވެސް ފޯނުން ބައިވެރިވެ ވަޑައިގަތެވެ.

މި ބައްދަލުވުމުގެ ކުރިން، ޓްރަމްޕް ވަނީ އަލް-އަސަދުގެ ވެރިކަމުގައި ސީރިއާގެ މައްޗަށް އަޅާފައިވާ ދަތިކުރުމުގެ ފިޔަވަޅުތައް ނަގާނެ އިޢުލާނުކޮށްފައެވެ. މިއީ އިޤްތިޞާދީ ގޮތުން ފައިދާކުރާނެ އަދި ގައުމުގެ ހަމަޖެހުމަށް އެޅޭ ފިޔަވަޅެއްގެ ގޮތުގައި އަލް-ޝަރާގެ ސަރުކާރުން ވަނީ ސިފަކޮށްފައެވެ. 

އަދި މި ބޭއްވުނު ބައްދަލުވުމާއި ގުޅޭގޮތުން ވައިޓް ހައުސްއިން ނެރުނު ބަޔާނެއްގައިވާ ގޮތުން، ޓްރަމްޕް ވަނީ "ރައީސް އަލް-ޝަރާއަށް އޭނާގެ ޤައުމަށް ތާރީޚީ ބަދަލުތަކެއް ގެނައުމުގެ ވަރަށް ބޮޑު ފުރުޞަތެއް އޮތްކަމަށް" ބުނެފައެވެ.

އަދި ސީރިއާގެ ސަރަޙައްދުތަކުން "ބޭރުގެ ޓެރަރިސްޓުން" އަދި "ފަލަސްޠީނު ޓެރަރިސްޓުން" ފޮނުވާލުމަށާއި، އިސްރާއީލާ އެކު ގުޅުން އާދައިގެ ފެންވަރަށް ރަނގަޅު ކުރުމަށްވެސް އެދިފައިވާ ކަމަށް ވައިޓްހައުސްގެ ބަޔާނުގައިވެއެވެ.

ބަޔާނުގައި އިތުރަށް ބުނެފައިވާ ގޮތުގައި އަލް-ޝަރާ ވަނީ "ޓެރަރިޒަމާ ދެކޮޅަށް މަސައްކަތްކުރުމާއި ކެމިކަލް ހަތިޔާރު ނައްތާލުމުގައި" އެމެރިކާއިން ކުރާ މަސައްކަތަށް ތައުރީފްކުރައްވާފައެވެ. 

އަދި އޭނާ ވަނީ އެމެރިކާއިން ސީރިއާގެ ތެލުގެ ދާއިރާގައި އިންވެސްޓުކުރުމަށް އެދިފައެވެ.

އެ ބައްދަލުވުމަށްފަހު ޤަތަރަށް ފުރަންދިޔަ މަގުމަތީގައި ނޫސްވެރިން ވަނީ އަލް-ޝަރާ އާ އެކު ފުރަތަމަ ފަހަރަށް ބޭއްވުނު ބައްދަލުވުމާއި އޭނާއާމެދު ޓްރަމްޕް ދެކޭ ގޮތާމެދު ސުވާލު ކޮށްފައެވެ. 

"ވަރަށް ރަނގަޅު. ވަރަށް ރަނގަޅު ކަމަށް އަޅުގަނޑު ދެކެން. ޒުވާން، ރީތި މީހެއް. ހަރުދަނާ މީހެއް. ވަރުގަދަ މާޒީއެއް. ވަރަށް ވަރުގަދަ މާޒީއެއް އޮތް މީހެއް. ހަނގުރާމަވެރިއެއް. އޭނާއަށް މިކަން (ސީރިޔާ ހިންގުމުގެ) ރަނގަޅު ފުރުޞަތެއް އެބައޮތް،" ޓްރަމްޕް ބުންޏެވެ.

33 މިނެޓު ދިގުދެމިގެންދިޔަ ޓްރަމްޕް އަދި އަލް-ޝަރާގެ ބައްދަލުވުމަކީ ވަރަށް ބޮޑު ޑިޕްލޮމެޓިކް ފިޔަވަޅެއް ކަމަށް ބޭރުގެ މީޑިއާތަކުން ސިފަ ކުރާއިރު، އެމެރިކާއިން ހުށަހެޅި ކަންކަމަށް ސީރިޔާއިން އެއްބަސްވާނެ ކަމާމެދު ގިނަ ބަޔަކު ސުވާލު އުފައްދައެވެ.