މުޖުތަމަޢުގައި ހުރި ތަފާތުތަކާއި ފަރަގުތައް ބަލައިގަތުމަކީ ޤައުމުގެ ތަރައްޤީއަށް މަގުފަހިކުރުވާ ކަމެއް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ބައިނަލްއަޤްވާމީ ސުލްޙަވެރިކަމާއެކު އެކުގައި ދިރިއުޅުމުގެ ދުވަހާއި ގުޅިގެން، ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މުޖުތަމަޢުގައި ހުރި ތަފާތުތަކާއި ފަރަގުތައް ބަލައިގަނެ، އެއީ ތަރައްޤީއަށް ލިބޭ ބާރެއްގެ ގޮތުގައި ދެކެން ޖެހޭ ކަމަށެވެ.

”އަޅުގަނޑުމެން އެންމެން އެއްބައިވަންތަކަމާއެކު ދިރިއުޅެ، ކުރިއަރައި ދިއުމަށްޓަކައި، ކުރިއަށްވުރެ ބޮޑަށް އެކުވެރިވެ، ދޫދިނުމާއި، ޝާމިލްކުރުމުގެ ސަގާފަތެއް އާލާކުރަން އެބަޖެހޭ.“ ރައީސް މުޢިއްޒު ވިދާޅުވިއެވެ. 

Advertisement

ތަފާތު އެކި ފަރާތްތައް ޝާމިލްކޮށް ޝާމިލް މުޖުތަމަޢުއެއް ޤާއިމް ކުރުމަށް ސަރުކާރުން އަންނަނީ ގިނަ މަސައްކަތް ކުރަމުންނެވެ.

އެގޮތުން، ތަފާތު ނުކުޅެދުންތެރިކަން ހުންނަ ފަރާތްތަކަކީވެސް، ދިވެހި ޤައުމުގެ ކުރިއެރުމުގައި ދައުރައް އަދާކުރެވިދާނެ ބަޔަކަށް ހެދުމަށް ތަފާތު ޕްރޮގުރާމްތައް ދަނީ ހިންގަމުންނެވެ.

ބައިނަލްއަޤުވާމީ ގުޅިގެން ސުލްޙައާއި އަމާންކަމާއެކު ދިރިއުޅުމުގެ ދުވަހެއް ފާހަގަކުރުމުގެ ބޭނުމަކީ އެކި މިޒާޖުތަކުގެ މީހުން އުޅޭކަން ޤަބޫލުކޮށް އެހެން މީހުންނަށް އިޙުތިރާމްކޮށް، ބަލައިގަނެ، އެމީހުންގެ ވާހަކަތައް އަޑު އަހައި އެއްބައިވަންތަކަމާއެކު ދިރިއުޅުމެވެ.