ސީ-ޓު-އެއަރ ކާގޯގެ ޚިދުމަތް ފެށިތާ އަހަރެއްގެ ތެރޭގައި ދެ މިލިޔަން ކިލޯގެ ކާގޯ އުފުލާފައިވާކަމަށް މޯލްޑިވްސް އެއަރޕޯޓްސް ކޮންޕެނީ ލިމިޓެޑް (އެމްއޭސީއެލް) އިން ބުނެފިއެވެ.
ސީ-ޓު-އެއަރ ކާގޯ މެދުވެރިކޮށް 2 މިލިޔަން ކިލޯގެ މުދާ އުފުލުމާއި ގުޅިގެން އެމްއޭސީއެލްއިން ވަނީ އެ ކާމިޔާބީ ފާހަގަކޮށް ޚާއްސަ ރަސްމިއްޔާތެއް ބާއްވާފައެވެ.
މި ރަސްމިއްޔާތުގައި އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދާއި، ޑެޕިއުޓީ މެނޭޖިންގ ޑިރެކްޓަރ އަދި ކުންފުނީގެ އިސްވެރިން ވަނީ ބައިވެރިވެވަޑައިގަންނަވާފައެވެ.
އެ ރަސްމިއްޔާތުގައި ވާހަކަފުޅު ދައްކަވަމުން އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު ވިދާޅުވީ، ކާގޯ ޚިދުމަތުގައި މަސައްކަތްކުރާ ހުރިހައި މުވައްޒަފުންނާއި މި މަސައްކަތުގައި ޝާމިލުވާ ހުރިހާ ފަރާތްތަކުގެ މިންނެތް މަސައްކަތުން މި ކާމިޔާބީ ހާސިލުކުރެވުނީ ކަމަށެވެ.
ސީ-ޓު-އެއަރ ކާގޯ ޚިދުމަތަކީ، ކަނޑުމަގުން މުދާ ރާއްޖެ ގެނެސް، ވައިގެ މަގުން އެކި މަންޒިލްތަކަށް އަވަހަށް ފޮނުވައިދިނުމަށްޓަކައި، މޯލްޑިވްސް ޕޯޓްސް ލިމިޓެޑް، މޯލްޑިވްސް ސްޓޭޓް ޝިޕިން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އަދި ބައިނަލްއަޤްވާމީ އެއަރލައިންތަކާ ގުޅިގެން ފަށާފައިވާ ޚިދުމަތެކެވެ.
މިދިޔަ އަހަރުގެ މާޗުމަހު ތައާރަފްކުރި މިހިދުމަތުގެ ފުރަތަމަ ޝިޕްމަންޓް މޭމަހު ފޮނުވާފައިވާއިރު، އެއީ ބަންގްލަދޭޝްއިން ރާއްޖެއަށް ކަނޑުމަގުން ގެނައި ގާމެންޓް ޝިޕްމަންޓެކެވެ.
ސީ-ޓު-އެއަރ ކާގޯގެ ޚިދުމަތް މެދުވެރިކޮށް މުދާ ފޮނުވަމުންދަނީ އެމެރިކާ، ކެނެޑާ، އިނގިރޭސިވިލާތް އަދި ޔޫރަޕުގެ ގައުމުތަކަށެވެ. މި ޚިދުމަތް މެދުވެރިކޮށް އާންމުކޮށް ރާއްޖޭން ބޭރުކުރަނީ ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ.
Advertisement
This content is created and paid for by advertisers and does not involve Voice Journalists
