ފިންލޭންޑްގެ ދެކުނު ހުޅަނގުގައި ހުރި އޫރާ އެއަރފީލްޑް ކައިރީގައި ދުއްވަމުން ދިޔަ ދެ ހެލިކޮޕްޓަރެއް ޖެހި، ނުރައްކާތެރި އެކްސިޑެންޓެއް ހިނގައިފިއެވެ. އެ ހާދިސާގައި ހެލިކޮޕްޓަރުން ދަތުރުކުރަމުންދިޔަ 5 މީހުން ވަނީ މަރުވެފައެވެ.

17 މެއި 2025 ވަނަ ދުވަހު ހިނގި މި ހާދިސާގައި ޖެހުނު ދެ ހެލިކޮޕްޓަރަކީވެސް ރޮބިންސަން އާރް44 މޮޑެލްގެ ހެލިކޮޕްޓަރެވެ. މި ދެ ހެލިކޮޕްޓަރު އެ ދުވަހުގެ ހެނދުނު އެސްޓޯނިއާގެ ވެރިރަށް ޓެލިންއިން ފުރައިގެން ދަތުރުކުރަމުން ދިޔައީ ކޮކެމާކީގައި ހުންނަ ޕީކަޖާރްވީ އެއަރފީލްޑްގައި ބޭއްވުމަށް ހަމަޖެހިފައިވާ ވައިގެ ދަތުރުފަތުރާ ގުޅޭ ހަރަކާތަކަށެވެ.

މި ހާދިސާ ދުށް ފަރާތްތަކުން ބުނާ ގޮތުގައި ދެ ހެލިކޮޕްޓަރު ދަތުރުކުރަމުން ދިޔައީ ގާތްގަނޑަކަށް އެއް ހަމައެއްގައެވެ. ނަމަވެސް ކުއްލިއަކަށް އެއް ހެލިކޮޕްޓަރު ދަތުރުކުރަމުންދިޔަ މަގު ބަދަލުވެ، އަނެއް ހެލިކޮޕްޓަރާ ޖެހުނެވެ. މި ހާދިސާގައި ވެއްޓުނު ދެ ހެލިކޮޕްޓަރުގެ ބައިތައް ފެނިފައިވަނީ ގަސްގަހާގެހި ހުރި ސަރަހައްދެއްގައި، ގާތްގަނޑަކަށް 100 މީޓަރު ދުރުމިނުގައެވެ.

މި ހާދިސާގައި މަރުވި 5 މީހުންގެ ތެރޭގައި އެސްޓޯނިއާގެ މަޝްހޫރު ވިޔަފާރިވެރިއެއް އަދި ޕައިލެޓެއް ކަމަށްވާ އޯލެގް ސޮނަޖަލްގް ހިމެނެއެވެ. މި ހާދިސާގައި ޖެހުނު ދެ ހެލިކޮޕްޓަރުގެ ތެރެއިން އެއް ހެލިކޮޕްޓަރު ރަޖިސްޓްރީ ކުރެވިފައިވަނީ އެސްޓޯނިއާގައެވެ. އަނެއް ހެލިކޮޕްޓަރު ރަޖިސްޓްރީ ކުރެވިފައިވަނީ އޮސްޓްރިއާގައެވެ.

މި ހާދިސާއާ ގުޅިގެން ފިންލޭންޑްގެ ކަމާބެހޭ އިދާރާތަކުން ތަހުގީގު ފަށާފައިވާ ކަމަށް މީޑިއާ ރިޕޯޓުތަކުގައި ބުނެއެވެ. އަދި މި ހާދިސާގެ ސަބަބު ދެނެގަތުމަށް މަސައްކަތްތަކެއް ކުރަމުންދާ ކަމަށްވެސް ބުނެއެވެ.