މޯލްޑިވްސް ޗެސް އެސޯސިއޭޝަނުން އިންތިޒާމުކޮށްގެން ބާއްވާ އިންޓަރ ސްކޫލް ޗެސް ފެސްޓިވަލް 2025 ގައި ބައިވެރިވުމަށް ހުޅުވާލައިފި އެވެ.
މޯލްޑިވްސް ޗެސް އެސޯސިއޭޝަނުން މިއަދު ގެޒެޓު ކުރި އިއުލާނެއްގައި ބުނީ އެ އެސޯސިއޭޝަނުން މިއަހަރު ބޭއްވުމަށް ހަމަޖެހިފައިވާ އިންޓަރ ސްކޫލް ޗެސް ފެސްޓިވަލް 2025 ގައި ބައިވެރިވުމަށް ބޭނުންވާ ސްކޫލުތަކަށް މިއަދުން ފެށިގެން އެފުރުސަތު ހުޅުވާލާފައިވާ ކަމަށެވެ.
އެގޮތުން މި މުބާރާތުގައި ބައިވެރިވުމަށް ޝައުގުވެރިވާ ސްކޫލުތަކުން ޓީމް ރެޖިސްޓްރޭޝަން ފޯމް ފުރުމަށް ވަނީ އެދިފައި އެވެ. ޓީމް ރެޖިސްޓްރޭޝަން ފޯމް ހުށަހެޅުމުގެ ސުންގަޑި އަކީ 4 ޖޫން 2025 ވަނަ ދުވަހުގެ 14:00 އެވެ. އަދި ޓީމް ލިސްޓު ހުށަހެޅުމުގެ ސުންގަޑިއަކީ ޖޫން މަހުގެ 7 ވަނަ ދުވަހެވެ.
ޓީމް ރެޖިސްޓްރޭޝަން ފޯމު ހުށަހެޅުއްވުމުން، ޓީމް ލިސްޓް ހުށަހަޅާ ފޯމާއި މުބާރާތުގެ ޤަވާއިދު، ބައިވެރިވާ ޓީމުތަކަށް ފޮނުވޭނެ ކަމަށް އެއެސޯސިއޭޝަންގެ އިއުލާނުގައި ބުނެފައި ވެއެވެ.
މިއަހަރުގެ އިންޓަރ ސްކޫލް ޗެސް ފެސްޓިވަލް 2025 ފެށުމަށް ތާވަލުކޮށްފައިވަނީ ޖޫން މަހުގެ 16 ވަނަ ދުވަހު އެވެ.
Advertisement
This content is created and paid for by advertisers and does not involve Voice Journalists
