ޝައްކެއްވެސް ނެތެވެ. ދަރިންނަކީ މި ދުނިޔެ މަތީގައި އިންސާނަކަށް ލިބޭނެ އެންމެ އަގުހުރި އެއް ނިޢުމަތެވެ. އެއީ އަހަރެމެންގެ ލޮލުގެ ފިނިކަމާއި ހިތުގެ ހަމަޖެހުމެވެ. އެތަކެއް އަހަރު ވަންދެން ކުރަމުން އައި ދުޢާގެ އިޖާބައެވެ. 
ކަންމިހެން ހުރި އިރު، އެ ދަރިން ހެޔޮ ގޮތުގައި ތަރުބިއްޔަތު ކުރުމަކީ އަހަރުމެން އެންމެންވެސް ނުހަނު އަހައްމިއްޔަތު ކަމެއް ދޭންޖެހޭ ކަމެކެވެ. އެކަމުގެ އެންމެ ފުރަތަމަ މަރުހަލާ ފެށެނީ ތިމާއާ ހަމައިންނެވެ. އަދި ތިމާ ޚިޔާރު ކުރާ ޙަޔާތުގެ ބައިވެރިޔާއިންނެވެ. 

އަހަރެމެންގެ ތެރެއިން ކޮންމެ ދެމަފިރިއެއްގެ އެންމެ ބޮޑު އެއް އެދުމަކީ އަދި ދުޢާ އަކީ ދަރިން ކަމުގައި ވާނެކަމީ ޝައްކެއް އޮތް ކަމެއް ނޫނެވެ. މިވާހަކަ ދެކެވޭއިރު ފުރަތަމަ އުފެދޭ ސުވާލަކަށް ވަނީ ދަރިން ދެއްވުން އެދި ދުޢާ ކުރަންވީ މީހަކާ އިނުމަށްފަހުގައި ތޯ އެވެ؟

ނޫނެވެ. ޙަޔާތުގެ ބައިވެރިއެއް ޚިޔާރު ކުރުމުގެ މާ ކުރިންވެސް އެކަމަށް އެދި ދުޢާ ކުރަން ފެށުން މުހިންމެވެ. އަދި އެ ދުޢާއާއި އެކު، ހެޔޮލަފާ ޞާލިޙް ޙަޔާތުގެ ބައިވެރިއެއް ދެއްވުން އެދި ދުޢާ ކުރުމަކީ އަދި މާ މުހިންމު ކަމެކެވެ. ސަބަބުތައް ވަރަށް ގިނައެވެ. 

ދަރިން ހެޔޮ ގޮތުގައި ތަރުބިއްޔަތު ކުރެވޭނީ ތަރުބިއްޔަތު ކުރަން ހުންނަ މީހާ ރަނގަޅު ވެގެންނެވެ. ދަރިން ނަމޫނާ އަކަށް ބަލާނީ އެކުދިންގެ މައިންބަފައިންނެވެ. ޚާއްސަކޮށް މަންމަ އެވެ. ކުއްޖާއާއެކު އެންމެ ގިނަ ވަގުތު ހޭދަކުރާނީ އެ މަންމަ އެވެ. އެއަށްފަހު ބައްޕައެވެ.

ކަން މިހެން ހުރުމުން، ހެޔޮލަފާ ޞާލިޙް ބައިވެރިއެއް ދެއްވުން އެދި ދުޢާ ކޮށް، އެކަމަށްޓަކައި މަސައްކަތްކޮށް އެފަދަ މީހަކު ޚިޔާރުކުރުމަކީ، ތިމާގެ ދަރިފަސްކޮޅު ހެޔޮ ގޮތުގައި ތަރުބިއްޔަތު ކުރުމަށް ކޮށާލެވޭ މަގެކެވެ. 

ހަޔާތުގެ ބައިވެރިޔާއަށްފަހު ދެން ދަރިންގެ ވާހަކަ ދައްކާއިރު، އުފެދޭ ސުވާލަކީ ދަރިން ދެއްވުން އެދި ދުޢާ ކުރާއިރު ހަމައެކަނި ދުޢާ ކުރާންވީ ދަރިއެއް ދެއްވުން އެދި ތޯއޭ ނުވަތަ ނޫން ތޯއެވެ. 

ދަރިންނަށް އޮންނަ ލޯތްބާއި މައިވަންތަ ކަމާއި ބަފައިވަންތަ ކަމުގެ ކުލުނު ހިތުގައި އޮންނަ މިންވަރުން، އަހަރެމެންނަށް އާއްމުކޮށް ދުޢާ ކުރާއިރު ދުޢާ ކުރެވެނީ ހަމައެކަނި ދަރިން ދެއްވުން އެދިއެވެ. 

ނަމަވެސް، ދުޢާކުރަންވީ ހަމައެކަނި ދަރިން ދެއްވުން އެދި އެކަންޏެއް ނޫނެވެ. އޭގެ ބަދަލުގައި ދުޢާކުރަންވީ، ހެޔޮލަފާ، ޞާލިޙް، ތަޤުވާވެރި، ދީންވެރި، އިލްމީ ގޮތުން ޤާބިލް، ހަރުދަނާ، އަދި ތިމާއަށާ މުޅި މުޖުތަމައު އަށާއި ދީނަށް ފައިދާ ހުރި ދަރިންދެއްވުން އެދިއެވެ. އެ ދަރިންނަކީ ތިމާ މަރުވެ ދިޔުމަށްފަހުވެސް ތިމާއަށްޓަކައި ހެޔޮ ދުޢާ ކޮށްދޭނެ ފަދަ ދަރިންނަށް ވުން އެދިއެވެ. އެ ދަރިން ފެނުމުންވެސް ތިމާގެ ހިތްހަމަޖެހޭފަދަ ދަރިން ދެއްވުންއެދިއެވެ. 

ހެޔޮލަފާ ޞާަލިޙް ހަޔާތުގެ ބައިވެރިއެއް ދެއްވުން އެދި ދުޢާ ކުރާއިރު، ދަރިންނަށްޓަކައިވެސް މިފަދައިން ދުޢާ ކުރާށެވެ. އަދި އެފަދަ ދަރިން ތަރުބިއްޔަތު ކުރުމަށް ގަދަ އަޅައި މަސައްކަތް ކުރާށެވެ. 

މުޖުތަމަޢު އިސްލާޙް ކުރެވޭނީ އެފަދަ ޞާލިޙް އެތައް ދަރިންނެއް ތަރުބިއްޔަތު ކުރެވިގެންނެވެ. އެ މަސައްކަތް ފަށަންވީ ތިމާގެ ގެއިންނެވެ. ތިމާއާ ހަމައިންނެވެ.