ބިލިއަނަރު އެލޮން މަސްކްގެ ކޮމާޝަލް ސްޕޭސް ފްލައިޓް ކުންފުނި، ސްޕޭސްއެކްސްގެ 9 ވަނަ ސްޓާޝިޕް ޓެސްޓް ފްލައިޓް ދަތުރު ފެށި 30 މިނެޓަށްފަހު ކޮންޓްރޯލް ގެއްްލި، އިންޑިޔާ ކަނޑަށް ވެއްޓިއްޖެއެވެ.

ރޮއިޓަރސް ނިއުސް އެޖެންސީން ރިޕޯޓްކޮށްފައިވާ ގޮތުގައި ޓެކްސަސްގެ ސްޓާބޭސް އިން ލޯންޗްކުރި މި މިޝަންގެ މަގްސަދަކީ އޯބިޓަށް ވަނުމާއި ރީއެންޓްރީއަށް ސްޓާޝިޕްގެ ގާބިލްކަން އިތުރަށް ކަށަވަރުކުރުމެވެ.

ބުދަ ދުވަހު ރޭ 11:36 ލޯންޗުކުރި މި މެގާ-ރޮކެޓް މިއަދު ވެއްޓިފައިވަނީ ރޮކެޓުގައި ހުރި ތެލުގެ ލީކެއްގެ ސަބަބުން ސްޕޭސްގައި ކޮންޓްރޯލް ނުކުރެވޭ ގޮތަށް ދައުރުވާން ފެށުމުން ކަމަށް ރޮއިޓަރސްއިން ބުނެފައިވެއެވެ.

މިކަމާ ގުޅިގެން ސްޕޭސްއެކްސްއިން އެކްސްގައި ކުރި ޕޯސްޓެއްގައި ބުނެފައިވަނީ މި ހާދިސާ ހިނގީ ކުއްލި އަކަށް ކަމަށާ، އޭގެ ސަބަބުން ރޮކެޓް ހަލާކުވެފައިވާ ކަމަށެވެ.

"މިފަދަ ޓެސްޓެއްގައި، ކާމިޔާބު ލިބެނީ އަޅުގަނޑުމެންނަށް ދަސްވާ އެއްޗަކުން. އަދި މިއަދުގެ ޓެސްޓުން ސްޓާޝިޕަށް އޮންނަ އިތުބާރު އިތުރުކުރުމަށް އެހީތެރިވާނެ. ސްޕޭސްއެކްސްއިން ކުރިއަށް އޮތް ތަނުގައިވެސް މަސައްކަތް ކުރަމުންދާނީ އިންސާނުންނަށް ގިނަ ގުރަހަތަކުގައި ދިރިއުޅެވޭނެ ގޮތް ހޯދަމުން،" އެކްސް އިން ބުނެފައިވެއެވެ.

403 ފޫޓު (123 މީޓަރު) ދިގު މި ރޮކެޓްގެ ކޮންޓްރޯލް ގެއްލުމުގެ ކުރިން، އޭތި ވަނީ މީގެކުރިން ފެއިލްވި ޓެސްޓް-ލޯންޗްތައް ދަތުރުކުރި ހިސާބަށްވުރެ އިތުރަށް ދަތުރުކޮށްފައެވެ.

މަސްކް ވަނީ ސްޓާޝިޕް ތަރައްގީކުރުމަށް ބިލިއަން ޑޮލަރުތަކެއް ހޭދަކޮށްފައެވެ. އޭނާގެ ސްޕޭސްއެކްސްއިން އަންނަނީ ނާސާއާ ގުޅިގެން މީގެ 50 އަހަރު ފަހުން އިންސާނުން ހަނދަށް ފޮނުވުމުގެ މަސައްކަތްވެސް ކުރަމުންނެވެ.