މި މަހުގެ 18 ވަނަ ދުވަހު ހ. ފެންޓެނޯއީ ގެއިން, ގުދަނެއްގެ ފުރާޅު މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދު ނަމަކަށް ކިޔާ އަންހެންމީހާ ވެއްޓުނު ހާދިސާއާ ގުޅޭ ތަހުގީގު ނިންމައި، އޭގެ ފައިނަލް ރިޕޯޓް ދެ ހަފުތާ ތެރޭ ރައީސް ޑރ. މުޙައްމަދު މުއިއްޒަށް ހުށަހެޅޭނެ ކަމަށް މައްސަލަ ތަހުގީގު ކުރުމަށް އުފައްދާފައިވާ އިންކުއަރީ ކޮމިޝަނުން ބުނެފިއެވެ.
އެ ކޮމިޝަނުން މިއަދު އެކްސްގައި ކުރި ޕޯސްޓެއްގައި ބުނީ، އެ ކޮމިޝަނާ ހަވާލުކޮށްފައިވާ މަސައްކަތް މިހާރު ނިމެން ގާތްވެފައިވާ ކަމަށެވެ.
އަދި ކުރިއަށް އޮތް ދެ ހަފުތާއެއް ތެރޭ، ކޮމިޝަނުން އެ މައްސަލައިގައި ތައްޔާރުކުރާ ރިޕޯޓު ރައީސްއާ ހިއްސާ ކުރެވޭނެކަމަށް އުންމީދުކުރާ ކަމަށް ބުނެފައިވެއެވެ.
ޔުމްނު ވެއްޓުނު މައްސަލަ ބަލައި، އެ މައްސަލައާ ގުޅިގެން މިނިވަން، މުސްތަގިއްލު އަދި އިތުބާރު ހިފޭ ތަހުގީގެއްކުރުމަށް ކުރުމަށް ރައީސުލްޖުމްހޫރިއްޔާ އުފެއްދެވި މި ކޮމިޝަނުން ދާދިފަހުން، މި މައްސަލާގައި ހިމެނޭ ރައުދު އަހުމަދު ޒިލާލް އާވެސް ވަނީ ސުވާލު ކޮށްފައެވެ. ރައުދު އަކީ ޔުމްނު ވެއްޓުމާ ޖެހެންދެން ފަހުވަގުތާ ހަމައަށް އޭނާއާއެކު އުޅުނު މީހާއެވެ.
މީގެ އިތުރުން، އެ ކޮމިޝަނުން ވަނީ މި މައްސަލައާއި ގުޅުން ހުރި ތަންތަނަށްވެސް ޒިޔާރަތް ކޮށްފައެވެ.
ކޮމިޝަނުން މީގެ ކުރިން ބުނެފައިވާ ގޮތުން، ކޮމިޝަނުން މަސައްކަތް ކުރާނީ ވީހާވެސް އަވަހަށް މައްސަލައިގެ ތަހްގީގު ނިންމައި ރިޕޯޓް ރައީސް މުޢިއްޒަށް ހުށަހެޅުމަށެވެ.
Advertisement
This content is created and paid for by advertisers and does not involve Voice Journalists
