ބުރަދާސް އެކަޑަމީގެ ފަރާތުން އިންތިޒާމުކޮށް ބާއްވާ "ކުޑަހުވަދޫ ބޮޑު ޢީދު ފުޓްސަލް ޗެލެންޖު 1446" ގެ ގުރުނެގުމުގެ ހަފްލާ ރޭ ބާއްވައިފިއެވެ. 

ކުޑަހުވަދޫ ވިއޯލާ ރެސްޓޯރެންޓްގައި ރޭ ބޭއްވެ ގުރުނެގުމުގެ ރަސްމިއްޔާތުގައި މުބާރާތުގައި ބައިވެރިވި ޓީމުތަކުގެ އޮފިޝަލުންނާއި ބައެއް ކުޅުންތެރިން ވަނީ ބައިވެރިވެފައެވެ.

މުބާރާތުގައި މިއަހަރު ޖުމްލަ ނުވަ ޓީމަކުން ބައިވެރިވެފައިވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ނުވަ ޓީމު ދެގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ސެމީފައިނަލުން ޖާގަ ލިބިގެންދާނެއެވެ.

ރޭގެ ގުރުނެގުމުގެ ރަސްމިއްޔާތުގައި ވާހަކަދައްކަމުން މުބާރާތް އިންތިޒާމު ކޮމިޓީގެ ރައީސް އަލްފާޟިލް އިސްމާޢީލް އާދިލް ވިދާޅުވީ މިފަދަ މުބާރާތެއް ކާމިޔާބުކަމާއެކު ކުރިއަށް ގެންދިއުމަށް ހުރިހާ ޓީމެއްގެ ވެސް ފުރިހަމަ އެއްބާރުލުމާއި އެހީތެރިކަން ބޭނުންވާނެ ކަމަށާއި، މުބާރާތް ކާމިޔާބުކަމާއެކު ކުރިއަށް ގެންދިއުމަށް ޓީމުތަކުގެ މެނޭޖަރުންގެ ދައުރު ވަރަށް މުހިންމުކަމަށެވެ.

މިމުބާރާތަކީ ބްރަދާސް އެކަޑަމީގެ ފަރާތުން އިންތިޒާމުކޮށް ކުޑަހުވަދޫގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން އީދު ބަންދާއި ދިމާކޮށް ރަށުގެ ޒުވާނުންގެ މެދުގައި ގުޅުން ބަދަހިކޮށް އެކުވެރި މާހައުލެއްގައި އީދުގެ އުފާ ހާސިލްކުރުމުގެ މަގުސަދުގައި ބާއްވާ މުބާރާތެކެވެ. 

6 ޖޫން 2025 ވަނަ ދުވަހު ފެށުމަށް ހަމަޖެހިފައިވާ މިމުބާރާތުގެ ޗެންޕިއަން ޓީމަށް 25،000 އަދި ރަނަރަޕް ޓީމަށް 12،000 ރުފިޔާގެ ފައިސާގެ އިނާމެއް ބްރާދާސް އެކަޑަމީގެ ފަރާތުން ވަނީ ހުށަހަޅާފައެވެ.