ސްޕެނިޝް ލަލީގާގެ ނިމިދިޔަ ސީޒަނުގެ މޮޅު ކުޅުންތެރިއަކަށް ޗެންޕިއަން ބާސެލޯގެ ބްރެޒިލް ފޯވާޑް ރަފީނިހާ ހޯދިއިރު، އެންމެ މޮޅު ޒުވާން ކުޅުންތެރިޔާގެ އެވޯޑް އެޓީމުގެ ޒުވާން ފޯވާޑް ލަމީން ޔަމާލް ހޯދައިފިއެވެ.

ޕްރެމިއާ ލީގުގެ ލީޑްސް ޔުނައިޓެޑުން 2022 ވަނަ އަހަރު 50 މިލިއަން ޔޫރޯގެ ޓްރާންސްފާ ފީއެއްގައި ބާސެލޯނާއަށް ބަދަލުވި އުމުރުން 28 އަހަރުގެ ފޯވާޑް ވަނީ ނިމިދިޔަ ސީޒަނުގައި ލަލީގާ ޗެންޕިއަންކަން ބާސެލޯނާއަށް ހޯދައިދިނުމުގައި މުހިންމު ދައުރެއް އަދާކޮށްދީފައެވެ.

އެގޮތުން ލީގުގައި ކުޅުނު 36 މެޗުގައި ރަފީނިހާ ވަނީ އެޓީމަށް 18 ލަނޑު ކާމިޔާބުކޮށްދިނުމުގެ އިތުރުން އިތުރު ނުވަ ލަނޑުޖެހުމަށް އެހީތެރިވެދީފައެވެ. އަދި މިދިޔަ ސީޒަނުގެ ޗެންޕިއަންސް ލީގު ސެމީފައިނަލުން  ބާސެލޯ ކެޓި ނަމަވެސް އެ މުބާރާތުގެ އެންމެ ގިނަ ލަނޑު ޖެހުމުގެ އިތުރުން އެންމެ ގިނަ ލަނޑު ޖެހުމަށް އެހީތެރިވެދިނީ ވެސް މިދިޔަ ސީޒަނުގައި ތަފާތު މޮޅު ކުޅުމެއްދެއްކި ރަފީނިހާ އެވެ.

މީގެ އިތުރުން މިދިޔަ ސީޒަނުގެ ލަލީގާ ރަންބޫޓް ކާމިޔާބުކުރީ ރެއާލް މެޑްރިޑްގެ ފޯވާޑް ކިލިއަން އެމްބާޕޭ އެވެ. ލީގުގައި ކުޅުނު 34 މެޗުގައި އެމްބާޕޭ 31 ލަނޑު ކާމިޔާބުކުރިއިރު، ލަނޑު ލިސްޓްގެ ދެވަނަ ލިބުނީ ބާސެލޯނާގެ ތަޖްރިބާކާރު ފޯވާޑް ރޮބަޓް ލެވަންޑޮސްކީ އަށެވެ.

ލީގުގައި ކުޅުނު 35 މެޗުގައި ލެވަންޑޮސްކީ 27 ލަނޑު ކާމިޔާބުކުރިއިރު، އެންމެ މޮޅު ޒުވާން ކުޅުންތެރިޔާގެ އެވޯޑް ހޯދީ އުމުރުން 17 އަހަރު ލަމީން ޔަމާލް އެވެ. ލީގުގައި ކުޅުނު 35 މެޗުގައި ޔަމީލް ވަނީ ނުވަ ލަނޑު ކާމިޔާބުކުރުމުގެ އިތުރުން އިތުރު 13 ލަނޑު ޖެހުމަށް އެހީތެރިވެދީފައެވެ.