އިއްޔެ މެލޭޝިޔާއަށް ވަޑައިގެންނެވިތާ މާ ގިނައިރެއް ނުވެ، ކުއްލި ގޮތަކަށް ނިޔާވި އައްޝައިހް އިބްރާހިމް ފަރީދު އަހްމަދުގެ ޖަނާޒާގެ ކަންކަން މޭލޭޝިޔާގައި ކުރިއަށް ގެންދަން ޢާއިލާއިން ނިންމައިފިއެވެ. 

ޝައިހް ނިޔާވީ މެލޭޝިޔާއަށް ވަޑައިގަތްތާ ކުޑައިރުކޮޅެއްގެ ތެރޭގައި އެއާޕޯޓްގަ އެވެ. ނިޔާވީ އެއާޕޯޓްގައި ހުއްޓާ ވެއްޓި، ފަރުވާ ދެމުންދަނިކޮށެވެ.

އާއިލާއާ ހަވާލާދީ ޝެއިހްއާ އެކު މެލޭޝިޔާއަށް ދިޔަ ޓީމުގެ މެންބަރަކު މީގެ ކުރިން ބުނީ އާއިލާ އިން ބޭނުން ވަނީ ޝެއިހްގެ ހަށިގަނޑު މާލެ ގެނެސް ޖަނާޒާގެ ކަންކަން މާލޭގައި ބޭއްވުމަށް ކަމަށެވެ.

ނަމަވެސް، ޝައިޚް ފަރީދުގެ ހަށިގަނޑު، ދިވެހި ރާއްޖެއަށް ގެންނަ ނަމަ، ޕޯސްޓްމޯޓަމްވެސް ހަދަންޖެހޭއިރު، އެކަންކަމަކީ ޝައިޚް އަބަދުވެސް އިންކާރު ކުރައްވާ ކަންކަމަށްވުމުން، މެލޭޝިޔާގައި، ޝެއިޚްގެ ޖަނާޒާ ކުރިއަށް ގެންދާ ގޮތަށް، ޢާއިލާއިން ނިންމާފައިވާ ކަމަށް ”ވޮއިސް“ އަށް ވަނީ މައުލޫމާތު ލިބިފައެވެ. 

ޝެއިހް ފަރީދު ފާހަގަ ކުރެވިފައި ވަނީ ދިވެހީންގެ މެދުގައި ވަރަށް މަގުބޫލު އިލްމުވެރިއެއްގެ ގޮތުގަ އެވެ. ދީނީ ގޮތުން ދިވެހީން ހޭލުންތެރި ކުރުވުމަށް އެންމެ ބޮޑަށް މަސައްކަތް ކުރެއްވި އެއް ޝެއިހަކީ ފަރީދެވެ. އެ މަސައްކަތުގައި އެތައް އަނިޔާއަކާއި ދުތުރާލަކާ ކުރިމަތިލާން ޖެހުނެވެ.

އެންމެ އުނދަގޫ ވަގުތު އެ މަސައްކަތުގައި އެންމެ އިސް ދައުރެއް އަދާކުރެއްވި ބޭފުޅަކީ ޝެއިހް ފަރީދެވެ. 

ޝެއިހް ފަރީދު ނިޔާވުމާއި ގުޅިގެން ވަރަށް ގިނަ ބަޔަކު އެކަމުގެ ހިތާމަފާޅުކޮށް އާއިލާއަށް ތައުޒިޔާ ކިޔަމުންނެވެ.